Kapingamarangi - Ezekiel - 33

33:1  Dimaadua ga-helekai-mai,

33:2  “Kooe go tangada-dangada, goe haga-modongoohia-ina gi digau o do henua nia mee ala gaa-hai dogu madagoaa ma-ga-hagau dagu dauwa gi dahi henua. Nia gau tenua deelaa e-hili di-nadau dangada e-dahi, e-hai di-nadau dangada hagaloohi.

33:3  Malaa, di madagoaa di hagaloohi deelaa ma-ga-gidee-ia nadau hagadaumee e-lloomoi gi-di guongo deelaa, geia ga-ili dana buu gi--modongoohia digau o-di guongo deelaa.

33:4  Maa e-iai tangada ga-longono-ia, ge hagalee daudali, gei nia hagadaumee aalaa ga-daaligi a-mee gii-made. Malaa, di made o-maa le e-hai-mee-hua ginai mee.

33:5  Dono made le e-dau-hua ginai mee, i mee dela hagalee daudali di haga-iloo o-di buu. Maa nei bolo mee ne-daudali di haga-iloo deelaa, gei mee guu-mee-hua di-doo gi-daha mo-di made.

33:6  Maa di hagaloohi deelaa, i dono madagoaa ne-gidee-ia nia hagadaumee e-lloomoi, gei mee digi ilihia dana buu belee haga-iloo gi-nia daangada, malaa, nia hagadaumee aalaa ga-lloomoi ga-daaligi digau huaidu la-gii-mmade. Au gaa-dugu ang-gi tangada hagaloohi deelaa e-hai-mee gi-di mmade o digau aalaa.

33:7  “Kooe go tangada-dangada, dolomeenei gei Au gaa-hai goe di hagaloohi ni digau Israel. Goe ga-haga-modongoohia gi digaula nia hai aanei ala ga-hagi-adu ko-Au.

33:8  Maa Au ga-hagailoo bolo tangada huaidu gaa-made, gei goe digi haga-modongoohia gi mee bolo gii-mee-ai di-huli dono mouli, gei mee gaa-made-hua i-lodo ono huaidu. Gei au ga-dugu-adu gi-di-goe e-hai-mee gi-di made o-maa.

33:9  Gei goe ga-haga-modongoohia gi tangada huaidu, gei mee digi lawa-mai gi-daha, mee gaa-made i-lodo ono huaidu. Gei goe e-haga-mouli.”

33:10  Dimaadua ga-helekai-mai, “Kooe go tangada-dangada, hagalangahia-ina gi digau Israel nadau mee aanei ala nogo helehelekai-ai: Gimaadou gu-daamaha gi madau huaidu mono hala ala nogo haihai. Gimaadou gu-mooho-hua gi-daha. Gimaadou e-haga-mouli behee?

33:11  Haga-modongoohia-ina gi digaula bolo Au go Tagi go Yihowah go-di God mouli, Au hagalee manawa lamalia gi-di made o tangada huaidu. Au bolo mee gii-huli hoou gi-daha mo ana haihai huaidu gi-mouli ia. Goodou go digau Israel, goodou lawa-mai gi-daha mo godou haihai huaidu. Goodou e-aha ala e-hiihai gi-di made?

33:12  “Dolomeenei, kooe go tangada-dangada, haga-modongoohia-ina gi digau Israel bolo di madagoaa tangada humalia ma-gaa-hai di huaidu, ana haihai humalia ala ne-hai e-deemee di-haga-mouli ia. Maa tangada huaidu ga-lawa-mai gi-daha mo ana haihai huaidu, mee hagalee hai-mee gi-di hagaduadua. Gei maa tangada humalia ga-daamada gaa-hai di huaidu, geia hagalee mouli.

33:13  Maa Au ga-hagababa ang-gi tangada humalia bolo ia ga-mouli, gei mee ga-hagabau bolo ana haihai humalia la-guu-dohu, gei mee ga-daamada gaa-hai di huaidu, malaa, Au hagalee langahia nia haihai humalia a-maa ala ne-hai. Mee gaa-made gi ana hai huaidu ala e-hai.

33:14  Maa Au ga-hagi-anga gi tangada huaidu bolo ia gaa-made, gei mee ga-lawa-mai gi-daha mo ana haihai huaidu, gaa-hai nia mee humalia ge donu,

33:15  gei mee gaa-wanga gi-muli di mee dela belee hai-ai tigagi dela e-pono di boibana o tangada, be-di mee dela ne-gaiaa koia. Geia ga-lawa-mai gi-daha mo-di haihai huaidu, ga-daudali nia haganoho ala e-haga-mouli ia, malaa, ia ga-hagalee made, mee ga-haga-mouli.

33:16  Au ga-dumaalia gi ana huaidu ala ne-hai. Mee e-haga-mouli, idimaa mee guu-hai nia mee humalia ge donu.

33:17  “Gei digau o do guongo e-helehelekai-mai bolo Au e-hai nia mee hai-gee! Gei deeai! Ma go nadau hangaahai ala e-hai-gee.

33:18  Tangada donu ma-gaa-lawa-mai gi-daha mo-di humalia, ga-daamada gaa-hai nia mee huaidu, mee gaa-made.

33:19  Gei tangada huaidu dela ma-ga-lawa-mai gi-daha mo-di haihai huaidu, gaa-hai nia mee humalia ge donu, malaa, ia ga-mouli.

33:20  Gei-ogo goodou go digau Israel, goodou e-hai bolo Au e-hai nia mee hai-gee. Au ga-hagi-aga goodou gi godou hangahaihai.”

33:21  I-di lima laangi o-di madangaholu malama o-di madangaholu maa-lua ngadau o di-madau lahi gi-daha mo Israel, taane dela ne-lele gi-daha mo Jerusalem, ga-hanimoi gi-di-au, ga-hagi-mai di mooho o Jerusalem.

33:22  Hiahi i-mua taane deelaa dono dau-mai, au gu-longono-eau di mogobuna mahi o Dimaadua dela gu-haga-honu au hagatau. Di madagoaa taane deelaa ne-dau-mai luada, Dimaadua ga-haga-uda-mai gi-di-au di mogobuna gii-mee au di-helekai. Gei au guu-mee di-helekai labelaa.

33:23  Dimaadua ga-helekai-mai,

33:24  “Kooe go tangada-dangada, goe gi-iloo bolo nia daangada ala e-nohonoho i-lodo nia waahale mooho o Israel le e-helehelekai boloo: Abraham la tangada hua e-dahi, gei tenua deenei hagatau la-guu-wanga gi mee. Gei gidaadou digau dogologowaahee, dolomeenei tenua deenei la tenua ni gidaadou.

33:25  Haga-modongoohia-ina gi digaula nia mee ala e-helekai-iei Au go Tagi go Yihowah: Goodou e-gai nia goneiga ala e-iai nia dodo. Goodou e-daumaha gi-nia ada balu-ieidu. Goodou e-daaligi tangada gii-made. Ma di-aha dela e-hai goodou bolo tenua deelaa la tenua ni goodou?

33:26  Goodou e-hagadagadagagee gi godou hulumanu-dauwa. Godou hangahaihai la-koia e-huaidu. Goodou huogodoo e-hai di huaidu be-di manu. Ma di-aha dela e-hai goodou bolo tenua deelaa la tenua ni goodou?

33:27  “Haga-modongoohia-ina gi digaula bolo Au, go Tagi go Yihowah, go di God mouli, Au e-haga-iloo ang-gi digaula bolo digau huogodoo ala e-noho i-lodo nia waahale mooho la-ga-dadaaligi gii-mmade, ge digau ala e-noho i-lodo henua gaa-gai go nia manu lodo-geinga. Gei digau ala e-pala hagammuni i tomo nia gonduu mo i-lodo nia bongoo la-gaa-hai nadau magi gaa-mmade.

33:28  Au gaa-hai tenua deelaa gii-hai di anggowaa, gei di mogobuna dela nogo hagadagadagagee mo-di hagapuu ginai digaula la-ga-hagaodi. Nia gonduu o Israel gaa-hai di lodo-geinga ga-deai tangada e-haele laa-laa ai.

33:29  Au ga-hagaduadua nia daangada i nadau ihala, gaa-huli tenua la-gii-hai di anga-henua, deenei la di madagoaa digaula ga-modongoohia-ginaadou bolo ma ko-Au dela go Dimaadua.”

33:30  Dimaadua ga-helekai-mai, “Kooe go tangada-dangada, goe gi-iloo bolo nia daangada le e-helehelekai i di-goe i-di nadau madagoaa ma-ga-dagabuli i-nia daalinga nia waahale mo nia ngudu nia bontai o nadau hale. Digaula e-helehelekai i nadau mehanga boloo, ‘Gidaadou gaa-hula dolomeenei e-hagalongo be nia maa nnelekai bolo-aha ala e-hai-mai i-baahi o Dimaadua.’

33:31  Agu daangada le e-dagabuli-mai e-hagalongo be nia maa ni-aha ala e-hagi-anga kooe gi digaula, gei digaula hagalee e-haga-kila-aga nia maa. Digaula e-helehelekai hagahumalia mo-di aloho, gei digaula e-duudagi-hua beelaa nadau mouli hagagailaa.

33:32  Digaula e-hai goe be tangada dela e-haihai ana daahili haga-manawa lamalia dangada, be tangada e-badubadu dana ‘harp’. Digaula gu-longono-ginaadou au helekai, gei digaula hagalee daudali nia maa.

33:33  Di madagoaa au helekai huogodoo ala ma-ga-kila-aga, gaa-donu e-hai be nia maa, deelaa di madagoaa o-nia daangada ga-iloo bolo ma di soukohp gu-i nadau baahi.”