Kapingamarangi - Isaiah - 29

29:1  Jerusalem di gowaa dudu-tigidaumaha a God la-ga-mooho! Di waahale dela nogo noho-ai David la-ga-mooho! Heia tuai ngadau e-dahi be lua gi-dau-mai mo gii-hana, mo ono hagamiami llauehe,

29:2  gei God ga-hagau-mai-laa dana haingadaa damana gi-hongo di waahale dela e-hagaingoo bolo “Di Gowaa Dudu Tigidaumaha a God.” Tangidangi manawa gee gaa-hai, gei di waahale dogomaalia gaa-hai be di gowaa dudu tigidaumaha ne-gahu gi-nia dodo.

29:3  God ga-heebagi gi-di waahale deelaa, ga-haganiga dono gili, ga-duuli di-maa.

29:4  Jerusalem gaa-hai be di ieidu dela e-duadua-aga i-lodo di gelegele bolo ia e-leelee, tama-lee e-lee-mai i-lodo di gohu dogolia.

29:5  Jerusalem, digau mai daha huogodoo ala nogo heebagi-adu gi-di-goe la-ga-ili gi-daha be nia gohu dogolia, gei nadau gau-dauwa hagamadagudagu-dangada ga-angiangina gi-daha be nia geinga maangoo. Limalima-hua gei e-hagahomouli,

29:6  Yihowah, di Gowaa Aamua, ga-haga-dagaloaha goe i-di hamuhamumu lee atili, mo-di lullulu o tenua. Mee ga-hagau-mai dana madangi gono mo-di ahi maaloo.

29:7  Nomuli, gei nia buini dauwa huogodoo o-nia henua llauehe ga-heebagi gi-di waahale o di gowaa dudu tigidaumaha Dimaadua, nadau goloo heebagi, nadau goloo-huogodoo ga-de-i-golo gaa-hai be di midi, gadoo be di-mee ne-hagamaanadu i-di boo.

29:8  Nia henua llauehe huogodoo ala ga-dagabuli belee heebagi gi Jerusalem, gaa-hai gadoo be taane hiigai e-midi bolo ia e-miami, ga-ala-aga hiigai, be gaa-hai be tangada hieinu e-midi bolo ia e-inu, ga-ala-aga dono akii le e-maangoo.

29:9  Heia goodou gi-dadaulia! Heia goodou gi-dee-gida. Haga-libaliba-ina-hua goodou, ma e-aha maa nia waini ai! Haga-hingahinga-ina-hua goodou, ma e-aha maa di madaua dagaao ai.

29:10  Dimaadua guu-hai goodou gi-moloaa, bolo gii-kii danu mmoe. Nia soukohp belee hai nia golomada o-nia daangada, gei Dimaadua gu-haga-dee-gida digaula.

29:11  Nia hadinga o-nia mee kokohp ga-hagammuni i goodou, gaa-hai be di beebaa dela ma-gaa-tai. Maa goe gaa-kae di-maa gi tangada e-iloo di-dau gi-daulia, mee ga-helekai-hua bolo ia e-deemee, idimaa ma e-tai.

29:12  Maa goe gaa-kae di-maa gi tangada e-de-iloo di-dau gi-daulia, mee ga-helekai-hua bolo ia e-de-iloo di-dau.

29:13  Dimaadua ga-helekai, “Nia daangada aanei e-hai bolo ginaadou e-daumaha-mai gi-di-Au, gei nadau helekai la ono hadinga ai, nadau manawa la i-tuai gowaa hua. Nadau hai-daumaha la-hagalee di-mee, la nia haganoho dangada hua mo nia hangaahai mouli o tenua ala ne-hagamaumau ga-daahi go-digaula.

29:14  Malaa, Au ga-hagahomouli digaula gi dagu hagamamaawa hagagoboina. Ginaadou ala e-kabemee la-gaa-huli gii-hai digau dadaulia, nadau iloo ga ono hadinga ai.”

29:15  Digau ala e-hagamada e-hagammuni nadau haganohonoho i Dimaadua la-ga-halauwa! Digaula e-hai nadau mee hagammuni, e-hagamaanadu bolo ma tangada e-gidee ginaadou ai, be e-iloo nadau mee ala e-hai ai.

29:16  Digaula guu-huli nia mee huogodoo gi-hai-gee. Ma di-aha dela koia e-hagalabagau: go tangada dela e-hai ana loaabi gi-nia gelegele pigi, be go nia gelegele pigi ala e-hai nia loaabi? Di-mee tangada dela ne-hai le e-deemee di-helekai gi tangada dela ne-hai di-maa boloo, “Goe digi heia au,” be e-helekai boloo, “Goe e-de-iloo dau mee dela e-hai!”

29:17  Gadoo be telekai dela e-hai boloo: ‘Hagalimalima-hua, gei nia gowaa lodo-henua geinga gaa-hai nia gowaa dogi-mee, gei nia gowaa dogi-mee gaa-hai labelaa nia gowaa geinga lodo-henua.’

29:18  Di laangi deelaa ma-ga-dau-mai, digau longoduli ga-longono di beebaa e-dau gi-nua, gei digau dee-gida ala nogo noho i-lodo di bouli ga-maahuge nadau golomada ga-gidee.

29:19  Digau hagaloale mo digau hila gi-lala ga-gidee labelaa di hagatenetene dela e-wanga go Dimaadua, di God Dabuaahia o Israel gi digaula.

29:20  Digau ala e-hagaduadua nia daangada, ge hagabalumee a God ga-hagalawa gi-daha. Digau hai-hala huogodoo ga-daaligi gi-daha.

29:21  God ga-daaligi gi-daha digau ala e-hagahuaidu nia ingoo o-nia daangada ala i-golo, go digau ala e-duuli di hagaduadua o digau hai-huaidu, mo digau ala e-helekai kai tilikai e-duuli digau ala e-donu belee kae di tonu.

29:22  Dolomeenei Dimaadua, di God of Israel dela ne-benebene Abraham gi-daha mo-di haingadaa, e-helekai, “Agu daangada, goodou ga-hagalee hagabalumee hua igolo, ga-hagalee hagalangaadia.

29:23  Di-godou madagoaa ma-ga-gidee agu dama ala ma-ga-gowadu, gei goodou ga-iloo-laa bolo Au go di God Dabuaahia o Israel. Goodou ga-hagalaamua dogu ingoo, ga-hagamadagu Au.

29:24  Digau dadaulia gaa-kabe di iloo-mee, digau e-helehelekai hai-baahi ga-tenetene di-kae nadau aago.”