Kapingamarangi - Isaiah - 41

41:1  God e-helekai boloo, “Gii-noho dee-muu, hagalongo-mai gi-di-Au, goodou go nia henua mogowaa-loo! Hagatogomaalia e-haga-modongoohia godou baahi i-di gowaa hai-gabunga. Goodou godou madagoaa e-helekai-iei goodou. Lloomoi gi-di gowaa e-dahi e-hilihili be koai dela e-donu.

41:2  “Ma koai dela ne-laha-mai tagi-dauwa mai i-bahi-i-dua, mo-di hai a-mee gi-aali i-nia gowaa huogodoo ala e-hana ginai mee? Ma koai dela ne-wanga gi mee di aali i-hongo nia king mono henua huogodoo? Dana hulumanu-dauwa e-daaligi digaula gi-lala be nia gohu gelegele. Ana amu-maalei gaa-tale i digaula gaa-hai digaula gi-mamaangi be nia geinga popo e-angiangina i-di madangi.

41:3  Gei mee e-waluwalu digaula hua beelaa, e-haele i-di aumaalia, dono lauwa ai, geia e-limalima huoloo dela hagalee tale ono wae gi-di gelegele.

41:4  Gei di-ma koai dela ne-hai di-mee deenei gii-gila? Ma koai dela ne-hagamaanadu ana adu-daangada i nadau hagangalungalua mai taamada? Ko-Au go Dimaadua nogo i-golo i taamada-loo, gei Au go Dimaadua dela ga-i-golo i-di madagoaa ga-hagaodi.

41:5  “Nia daangada ala i-nia henua mogowaa-loo gu-gidee-ginaadou agu mee ala ne-hai. Digaula gu-mmaadagu gu-polepole. Digaula ga-dagabuli-mai gi-di gowaa e-dahi ga-lloomoi.

41:6  Nia daangada gu-wouwou ginaadou di ngalua ga-hagadau-maamaa ge e-hagadau hagamaaloo-aga ginaadou.

41:7  Tangada paa-mee e-helekai gi tangada tugi-goolo boloo, ‘Gu-humalia huoloo go dau moomee!’ Taane dela e-haluhalu dana ada-mee ga-hagamaaloo-aga tangada dela e-dogi di-maa gi-di gowaa e-dahi gi-nia baalanga. Meemaa ga-helekai, ‘Di haga-punipuni-mai gu-humalia!’ Meemaa gaa-dogi di balu-ada-mee deelaa gi dono lohongo.

41:8  “Gei goe, go Israel, go dagu dangada hai-hegau, goodou ala go agu daangada ala ne-hilihili, go di madawaawa Abraham, go dogu ihoo hagaaloho.

41:9  Au ne-laha-mai goodou i-nia mada o henuailala, Au ne-haga-gahi goodou haga-mogowaa-loo i-nia madaaduge, ga-helekai-adu gi goodou boloo, ‘Goodou go agu gau hai-hegau.’ Au digi haga-de-iloo-e-Au goodou. Au ne-hilihili goodou.

41:10  Hudee mmaadagu, Au e-madalia goodou. Au go di-godou God. Hudee uli-godou-gai, Au gaa-hai goodou gi-maaloo ge e-hagamaamaa goodou. Au ga-duuli goodou gi-daha mo godou haingadaa, gei e-benebene goodou.

41:11  “Digau huogodoo ala e-hagawelewele-adu gi goodou, ga-iloo-ginaadou di langaadia di-nadau magedaa. Digau ala e-heebagi-adu gi goodou la-gaa-mmade.

41:12  Ma e-aha maa goodou ga-halahala godou hagadaumee, gei goodou ga-deemee di-gida digaula. Digau ala e-hai-tauwa adu gi goodou, ga-de-i-golo i henuailala.

41:13  Au go Dimaadua, go di-godou God. Au e-hagamaaloo-aga goodou, ge e-hagi-adu gi goodou bolo gi-hudee mmaadagu, Au ga-hagamaamaa goodou.”

41:14  Dimaadua e-helekai boloo, “Goodou go digau Israel, ma e-aha maa goodou e-lligi ge e-paagege, goodou hudee mmaadagu, Au ga-hagamaamaa goodou. Au go di God Dabu o Israel, ko-Au dela e-benebene goodou.

41:15  Au gaa-hai goodou gii-hai be-di laubaba hili-meegai, dela e-gaa ono ngudu ge hoou. Goodou gaa-olo nia gonduu ga-mooho gi-lala. Nia gowaa nnoonua gaa-oho gi-ligiligi-loo gaa-hai nia gohu gelegele.

41:16  Goodou ga-mmaga-aga nia maa gi-di ahiaalangi, gei di madangi ga-ili nia maa gi-daha, gei di madangi damana gaa-oho nia maa dagidahi-loo. Gei goodou ga-tenetene, idimaa Au dela go di-godou God. Goodou ga-hagaamu Au, dela go di God Dabuaahia o Israel.

41:17  “Di madagoaa agu daangada ala ga-halahala nadau wai e-inu, i nadau akii la-gu-maangoo i di-nadau hieinu, gei Au go Dimaadua ga-hagagila nadau dalodalo. Au di God o Israel ga-hagalee-loo di-de-langahia digaula.

41:18  Au gaa-hai nia monowai gii-mmidi laa-lodo nia gonduu ala e-maangoo, ga-haga-hali agu wai laa-lodo nia gowaa mehanga nia gonduu. Au gaa-hai di anggowaa gii-hai nia monowai, gei nia henua ala maangoo gi-hali-eia nia wai no-lodo.

41:19  Au gaa-hai nia laagau-‘cedar’, mono laagau-‘acacia’, ‘myrtle’ mono laagau-olib la-gii-tomo i-lodo di anggowaa. Nia waa-laagau gaa-tomo i-lodo nia henua maangoo, aalaa go nia laagau-‘pine’, ‘juniper’ mono ‘cypress’.

41:20  Nia daangada ga-gidee-ginaadou ga-iloo-ginaadou bolo ma ko-Au, go Dimaadua dela ne-hai nia maa. Digaula ga-modongoohia-ginaadou bolo di God Dabuaahia o Israel la-ne-hai nia mee aanei gii-kila.”

41:21  Dimaadua, di king o Israel e-helekai nia mee aanei boloo, “Goodou go nia god o-nia henua llauehe, haga-gila-aga-ina godou donu. Gaamai godou lagamaaloo ala i godou baahi.

41:22  Lloomoi gi kinei, haga-modongoohia-ina-aga nia mee ala ga-kila-aga, gi-iloo-ai gidaadou be nia maa e-kila-aga ma-gaa-hee. Haga-donudonu-ina gi-di gowaa hai-gabunga i-nia mee ala ne-too gi-daha, gei gi-hagia-mai gi gimaadou ono hadinga.

41:23  Hagia-mai gi gimaadou nia mee ala ma-ga-lloomoi maalia, gei gimaadou ga-iloo bolo goodou nia god! Heia-mai nia mee humalia be heia di haingadaa mai gi gimaadou. Heia gimaadou gi-uli madau gai gi-mmaadagu!

41:24  Goodou mo godou mee huogodoo ala e-hai la-hagalee nia mee. Digau ala e-daumaha adu gi goodou le e-gulugulua huoloo!

41:25  “Au gu-hilihili dagu daane dela e-noho i-di bahi-i-dua. Au gaa-hai a-mee gii-hai dana dauwa adu gi goodou mai i-bahi-i-ngeia. Mee dela e-dagadagahi nia dagi gadoo be nia gelegele gulugulua, gadoo be tangada hai pileedi-hadu e-dagadagahi ana gelegele hai-pileedi.

41:26  Ma koai i goodou gu-haga-modongoohia bolo di-mee deenei e-gila, gei gidaadou gaa-mee di-helekai bolo goodou e-donu? Deai tangada i goodou ne-helekai i di-maa ai!

41:27  Au go Dimaadua dela ne-hagi-anga matagidagi-loo gi Zion di longo deenei. Au gu-hagau dagu dangada kae-hegau gi Jerusalem gi-helekai boloo, ‘Au daangada le e-lloomoi! Digaula e-lloomoi gi nadau guongo!’

41:28  Gei Au gaa-mmada gi-hongo nia god aalaa, tangada e-dahi i digaula e-helekai ai, tangada e-dahi ne-helekai-mai gi agu heeu ai.

41:29  Nia god aanei huogodoo le e-balumee-hua. Digaula e-deemee di-hai nadau mee, nia ada-mee aanei la nadau mahi ai, nadau mogobuna ai!”