SPVar - Leviticus - 22

22:1  וידבר יהוה אל משה לאמר

22:2  דבר אל אהרן ואל בניו וינזרו מקדשי בני ישראל ולא יחללו את שם קדשי אשר הם מקדשים לי אני יהוה

22:3  אמר אליהם לדרתיכם כל איש אשר יקרב מכל זרעכם אל הקדשים אשר יקדישו בני ישראל ליהוה וטמאתו עליו ונכרתה הנפש ההיא מלפני אני יהוה

22:4  איש איש מזרע אהרן והוא צרוע או זב בקדשים לא יאכל עד אשר יטהר והנגע בכל טמא נפש או איש אשר תצא ממנו שכבת זרע

22:5  או איש אשר יגע בכל שרץ טמא אשר יטמא לו או באדם אשר יטמא לו לכל טמאתו

22:6  נפש אשר תגע בו וטמא עד הערב ולא יאכל מן הקדשים כי אם רחץ בשרו במים

22:7  ובא השמש וטהר ואחר יאכל מן הקדשים כי לחמו הוא

22:8  נבלה וטרפה לא יאכלו לטמאה בה אני יהוה

22:9  ושמרו את משמרתי ולא ישאו עליו חטא ומתו בו כי יחללהו אני יהוה מקדשם

22:10  וכל זר לא יאכל קדש תושב כהן ושכיר לא יאכל קדש

22:11  וכהן כי יקנה נפש קנין כספו הוא יאכל בו וילדי ביתו הם יאכלו בלחמו

22:12  ובת כהן כי תהיה לאיש זר היא בתרומת הקדשים לא תאכל

22:13  ובת כהן כי תהיה אלמנה וגרושה וזרע אין לה ושבה אל בית אביה כנעריה מלחם אביה תאכל וכל זר לא יאכל בו

22:14  ואיש כי יאכל קדש בשגגה ויסף חמישתו עליו ונתן לכהן את הקדש

22:15  ולא יחללו את קדשי בני ישראל אשר ירימו ליהוה

22:16  והשיאו אתם עון אשמה באכלם את קדשיהם כי אני יהוה מקדשם

22:17  וידבר יהוה אל משה לאמר

22:18  דבר אל אהרן ואל בניו ואל כל בני ישראל ואמרת אליהם איש איש מבית ישראל ומן הגר הגר בישראל אשר יקריב קרבנו לכל נדריהם ולכל נדבתם אשר יקריבו ליהוה לעלה

22:19  לרצונכם תמים זכר בבקר בכשבים ובעזים

22:20  כל אשר בו מום לא תקריבו כי לא לרצון יהיה לכם

22:21  ואיש כי יקריב זבח שלמים ליהוה לפלא נדר או נדבה בבקר או בצאן תמים יהיה לרצון וכל מום לא יהיה בו

22:22  עורת או שבור או חרוץ או יבלת או גרב או ילפת לא תקריבו אלה ליהוה ואשה לא תתנו מהם על המזבח ליהוה

22:23  ושור ושה שרוע וקלוט נדבה תעשו אתו ולנדר לא ירצה

22:24  מעוך וכתות ונתוק וכרות לא תקריבו ליהוה ובארצכם לא תעשו

22:25  ומיד בן נכר לא תקריבו את לחם אלהיכם מכל אלה כי משחתים בהם מום בם לא ירצו לכם

22:26  וידבר יהוה אל משה לאמר

22:27  שור או כשב או עז כי יולד והיה שבעת ימים תחת אמו ומיום השמיני והלאה ירצה לקרבן אשה ליהוה

22:28  ושור ושה אתו ואת בנו לא תשחטו ביום אחד

22:29  וכי תזבחו זבח תודה ליהוה לרצונכם תזבחהו

22:30  ביום ההוא יאכל לא תותירו ממנו עד בקר אני יהוה

22:31  ושמרתם את מצותי ועשיתם אתם

22:32  ולא תחללו את שם קדשי ונקדשתי בתוך בני ישראל אני יהוה מקדשם

22:33  המוצא אתכם מארץ מצרים להיות לכם לאלהים אני יהוה