CSlElizabeth - Luke - 4

4:1  Иисус же исполнь Духа Свята возвратися от Иордана: и ведяшеся Духом в пустыню,

4:2  дний четыридесять искушаемь от диавола: и не яст ничесоже во дни тыя: и скончавшымся им, последи взалка.

4:3  И рече Ему диавол: аще Сын еси Божий, рцы каменеви сему, да будет хлеб.

4:4  И отвеща Иисус к нему, глаголя: писано есть, яко не о хлебе единем жив будет человек, но о всяцем глаголголе Божии.

4:5  И возвед Его диавол на гору высоку, показа Ему вся царствия вселенныя в часе временне,

4:6  и рече Ему диавол: Тебе дам власть сию всю и славу их: яко мне предана есть, и, емуже аще хощу, дам ю:

4:7  Ты убо аще поклонишися предо мною, будут Тебе вся.

4:8  И отвещав рече ему Иисус: иди за Мною, сатано: писано есть: поклонишися Господу Богу твоему, и Тому единому послужиши.

4:9  И веде Его во Иерусалим, и постави Его на криле церковнем, и рече Ему: аще Сын еси Божий, верзися отсюду долу:

4:10  писано бо есть, яко Ангелом Своим заповесть о Тебе сохранити Тя:

4:11  и на руках возмут Тя, да не когда преткнеши о камень ногу Твою.

4:12  И отвещав рече ему Иисус, яко речено есть: не искусиши Господа Бога твоего.

4:13  И скончав все искушение диавол, отиде от Него до времене.

4:14  И возвратися Иисус в силе духовней в Галилею: и весть изыде по всей стране о Нем.

4:15  И той учаше на сонмищих их, славимь всеми.

4:16  И прииде в Назарет, идеже бе воспитан. И вниде, по обычаю Своему, в день субботный в сонмище, и воста чести.

4:17  И даша Ему книгу Исаии пророка: и разгнув книгу, обрете место, идеже бе написано:

4:18  Дух Господень на Мне: Егоже ради помаза Мя благовестити нищым, посла Мя изцелити сокрушенныя сердцем, проповедати плененным отпущение и слепым прозрение, отпустити сокрушенныя во отраду,

4:19  проповедати лето Господне приятно.

4:20  И согнув книгу, отдав слузе, седе: и всем в сонмищи очи беху зряще Нань.

4:21  И начат глаголати к ним, яко днесь сбыстся писание сие во ушию вашею.

4:22  И вси свидетелствоваху Ему, и дивляхуся о словесех благодати, исходящих из уст Его, и глаголаху: не Сей ли есть сын Иосифов?

4:23  И рече к ним: всяко речете Ми притчу сию: врачу, изцелися Сам: елика слышахом бывшая в Капернауме, сотвори и зде во отечествии Своем.

4:24  Рече же: аминь глаголю вам, яко ни который пророк приятен есть во отечествии своем:

4:25  поистинне же глаголю вам: многи вдовицы беша во дни Илиины во Израили, егда заключися небо три лета и месяц шесть, яко бысть глад велик по всей земли:

4:26  и ни ко единей их послан бысть Илиа, токмо в Сарепту Сидонскую к жене вдовице:

4:27  и мнози прокажени беху при Елиссеи пророце во Израили: и ни един же от них очистися, токмо Нееман Сирианин.

4:28  И исполнишася вси ярости в сонмищи, слышавшии сия:

4:29  и воставше изгнаша Его вон из града, и ведоша Его до верху горы, на нейже град их создан бяше, да быша Его низринули:

4:30  Он же прошед посреде их, идяше.

4:31  И сниде в Капернаум град Галилейский: и бе учя их в субботы.

4:32  И ужасахуся о учении Его: яко со властию бе слово Его.

4:33  И в сонмищи бе человек имый духа беса нечиста, и возопи гласом велиим,

4:34  глаголя: остави, что нам и Тебе, Иисусе Назарянине? Пришел еси погубити нас: вем Тя, кто еси, Святый Божий.

4:35  И запрети ему Иисус, глаголя: премолчи и изыди из него. И поверг его бес посреде, изыде из него, никакоже вредив его.

4:36  И бысть ужас на всех, и стязахуся друг ко другу, глаголюще: что слово сие, яко властию и силою велит нечистым духовом, и исходят?

4:37  И исхождаше глас о Нем во всяко место страны.

4:38  Востав же из сонмища, вниде в дом Симонов: теща же Симонова бе одержима огнем велиим: и молиша Его о ней.

4:39  И став над нею, запрети огню, и остави ю. Абие же воставши служаше им.

4:40  Заходящу же солнцу, вси, елицы имеяху болящыя недуги различными, привождаху их к Нему: Он же на единаго коегождо их руце возложь, изцеляше их.

4:41  Исхождаху же и беси от многих, вопиюще и глаголюще, яко Ты еси Христос Сын Божий. И запрещая не даяше им глаголати, яко ведяху Христа Самаго суща.

4:42  Бывшу же дню, изшед иде в пусто место: и народи искаху Его, и приидоша к Нему, и удержаваху Его, дабы не отшел от них.

4:43  Он же рече к ним, яко и другим градовом благовестити Ми подобает Царствие Божие: яко на се послан есмь.

4:44  И бе проповедая на сонмищих галилейских.