CopSahBible2 - Numbers - 7

7:1  ⲁⲩⲱ ⲁⲥϣⲱⲡⲉ ϩⲣⲁⲓ ϩⲙ ⲡⲉϩⲟⲟⲩ ⲛⲧⲁⲙⲱⲩⲥⲏⲥ ϫⲱⲕ ⲉⲃⲟⲗ ⲛⲧⲉⲥⲕⲩⲛⲏ ⲉⲧⲁϩⲟⲥ ⲉⲣⲁⲧⲥ ⲁϥⲧⲱϩⲥ ⲙⲙⲟⲥ ⲁϥⲧⲃⲃⲟ ⲙⲙⲟⲥ ⲙⲛ ⲛⲉⲥⲥⲕⲉⲩⲏ ⲧⲏⲣⲟⲩ ⲁⲩⲱ ⲡⲉⲑⲩⲥⲓⲁⲥⲧⲏⲣⲓⲟⲛ ⲙⲛ ⲛⲉϥⲥⲕⲉⲩⲏ ⲧⲏⲣⲟⲩ ⲁϥⲧⲁϩⲥⲟⲩ ⲟⲛ ⲁϥⲧⲃⲃⲟⲟⲩ

7:2  ⲁⲩⲱ ⲁⲩⲉⲓⲛⲉ ⲛϭⲓ ⲛⲁⲣⲭⲱⲛ ⲙⲡ ⲡⲙⲛⲧⲥⲛⲟⲟⲩⲥ ⲛⲁⲣⲭⲱⲛ ⲛⲧⲉ ⲛⲏⲓ ⲛⲛⲉⲩⲡⲁⲧⲣⲓⲁ ⲁⲩⲱ ⲛⲁⲓ ⲛⲉ ⲛⲁⲣⲭⲱⲛ ⲛⲛⲉⲫⲩⲗⲟⲟⲩⲉ ⲛⲁⲓ ⲉⲧⲁϩⲉⲣⲁⲧⲟⲩ ⲉϫⲛ ⲧⲉⲡⲓⲥⲕⲟⲡⲏ

7:3  ⲁⲩⲱ ⲁⲩⲉⲓⲛⲉ ⲙⲡⲉⲩⲇⲱⲣⲟⲛ ⲙⲡⲉⲙⲧⲟ ⲉⲃⲟⲗ ⲙⲡϫⲟⲉⲓⲥ ⲥⲟ ⲛⲁϭⲟⲗⲧⲉ ⲉⲩⲃⲁϩⲛ ⲁⲩⲱ ⲙⲛⲧⲥⲛⲟⲟⲩⲥ ⲙⲙⲁⲥⲉ ⲟⲩⲁϭⲟⲗⲧⲉ ⲉⲃⲟⲗ ϩⲓⲧⲛ ⲥⲛⲁⲩ ⲛⲁⲣⲭⲱⲛ ⲁⲩⲱ ⲟⲩⲙⲁⲥⲉ ⲉⲃⲟⲗ ϩⲓⲧⲙ ⲡⲟⲩⲁ ⲡⲟⲩⲁ ⲁⲩⲛⲧⲟⲩ ⲙⲡⲉⲙⲧⲟ ⲉⲃⲟⲗ ⲛⲧⲉⲥⲕⲩⲛⲏ

7:4  ⲁⲩⲱ ⲡⲉϫⲁϥ ⲛϭⲓ ⲡϫⲟⲉⲓⲥ ⲛⲛⲁϩⲣⲙ ⲙⲱⲩⲥⲏⲥ ⲉϥϫⲱ ⲙⲙⲟⲥ

7:5  ϫⲉ ϫⲓ ⲛⲧⲟⲟⲧⲟⲩ ⲛⲥⲉϣⲱⲡⲉ ⲉⲛⲉϩⲃⲏⲩⲉ ⲛϣⲙϣⲉ ⲛⲧⲉⲥⲕⲩⲛⲏ ⲙⲡⲙⲛⲧⲣⲉ ⲛⲅϯ ⲙⲙⲟⲟⲩ ⲛⲛⲗⲉⲩⲉⲓⲧⲏⲥ ⲡⲟⲩⲁ ⲡⲟⲩⲁ ⲕⲁⲧⲁ ⲧⲉϥⲗⲓⲧⲟⲩⲣⲅⲓⲁ

7:6  ⲁⲩⲱ ⲙⲱⲩⲥⲏⲥ ⲁϥϫⲓ ⲛⲛⲁϭⲟⲗⲧⲉ ⲙⲛ ⲙⲙⲁⲥⲉ ⲁϥⲧⲁⲁⲩ ⲛⲛⲗⲉⲩⲉⲓⲧⲏⲥ

7:7  ⲥⲛⲧⲉ ⲛⲁϭⲟⲗⲧⲉ ⲙⲛ ϥⲧⲟⲟⲩ ⲙⲙⲁⲥⲉ ⲁϥⲧⲁⲁⲩ ⲛⲛϣⲏⲣⲉ ⲛⲅⲉⲇⲥⲱⲛ ⲕⲁⲧⲁ ⲛⲉⲩⲗⲓⲧⲟⲩⲣⲅⲓⲁ

7:8  ⲁⲩⲱ ⲧⲉϥⲧⲟ ⲛⲁϭⲟⲗⲧⲉ ⲙⲛ ⲡⲉϣⲙⲟⲩⲛ ⲙⲙⲁⲥⲉ ⲁϥⲧⲁⲁⲩ ⲛⲛϣⲏⲣⲉ ⲙⲙⲉⲣⲁⲣⲉⲓ ⲕⲁⲧⲁ ⲛⲉⲩⲡⲁϣⲛⲉ ⲉⲃⲟⲗ ϩⲓⲧⲛ ⲓⲑⲁⲙⲁⲣ ⲡϣⲏⲣⲉ ⲛⲁⲁⲣⲱⲛ ⲡⲟⲩⲏⲏⲃ

7:9  ⲁⲩⲱ ⲛϣⲏⲣⲉ ⲛⲕⲁⲁⲑ ⲙⲡⲉϥϯ ⲛⲁⲩ ϫⲉ ⲛϣⲙϣⲉ ⲙⲡⲉⲧⲟⲩⲁⲁⲃ ⲛⲧⲟⲟⲧⲟⲩ ⲛⲥⲉϥⲓ ϩⲁⲣⲟⲟⲩ ϩⲣⲁⲓ ϩⲓϫⲛ ⲛⲉⲩⲛⲁϩⲃ

7:10  ⲁⲩⲱ ⲛⲁⲣⲭⲱⲛ ⲁⲩⲉⲓⲛⲉ ⲉⲡϫⲓⲁⲉⲓⲕ ⲙⲡⲉⲑⲩⲥⲓⲁⲥⲧⲏⲣⲓⲟⲛ ϩⲣⲁⲓ ϩⲙ ⲡⲉϩⲟⲟⲩ ⲡⲁⲓ ⲛⲧⲁϥⲧⲱϩⲥ ⲙⲙⲟϥ ⲛϩⲏⲧϥ ⲛⲁⲣⲭⲱⲛ ⲁⲩⲛ ⲛⲉⲩⲇⲱⲣⲟⲛ ⲙⲡⲉⲙⲧⲟ ⲉⲃⲟⲗ ⲙⲡⲉⲑⲩⲥⲓⲁⲥⲧⲏⲣⲓⲟⲛ

7:11  ⲁⲩⲱ ⲡⲉϫⲁϥ ⲛϭⲓ ⲡϫⲟⲉⲓⲥ ⲛⲛⲁϩⲣⲙ ⲙⲱⲩⲥⲏⲥ ϫⲉ ⲟⲩⲁⲣⲭⲱⲛ ⲛⲟⲩⲱⲧ ⲙⲙⲏⲛⲉ ⲉϥⲉⲁⲣⲭⲉⲓ ⲕⲁⲧⲁ ϩⲟⲟⲩ ⲉⲩⲉⲧⲁⲗⲟ ⲉϩⲣⲁⲓ ⲛⲛⲉⲩⲇⲱⲣⲟⲛ ϩⲙ ⲡϫⲓⲁⲉⲓⲕ ⲙⲡⲉⲑⲩⲥⲓⲁⲥⲧⲏⲣⲓⲟⲛ

7:12  ⲁⲩⲱ ϩⲣⲁⲓ ϩⲙ ⲡϣⲟⲣⲡ ⲛϩⲟⲟⲩ ⲛⲉⲡⲉⲛⲧⲁϥⲛⲡⲉϥⲇⲱⲣⲟⲛ ⲡⲉ ⲛⲁⲁⲥⲥⲱⲛ ⲡϣⲏⲣⲉ ⲛⲁⲙⲓⲛⲁⲇⲁⲃ ⲡⲁⲣⲭⲱⲛ ⲛⲧⲉⲫⲩⲗⲏ ⲛⲓⲟⲩⲇⲁ

7:13  ⲁⲩⲱ ⲁϥⲛⲡⲉϥⲇⲱⲣⲟⲛ ⲟⲩϩⲛⲁⲁⲩ ⲛⲉⲓⲁⲧⲟⲟⲧⲟⲩ ⲛϩⲁⲧ ⲉϣⲉ ⲙⲁⲁⲃ ⲛⲥⲓⲕⲗⲟⲥ ⲡⲉ ⲡⲉϥϣⲓ ⲟⲩⲫⲓⲁⲗⲏ ⲛϩⲁⲧ ⲛϣϥⲉ ⲛⲥⲓⲕⲗⲟⲥ ⲕⲁⲧⲁ ⲡⲥⲓⲕⲗⲟⲥ ⲉⲧⲟⲩⲁⲁⲃ ⲡⲉⲥⲛⲁⲩ ⲉⲩⲙⲏϩ ⲛⲥⲁⲙⲓⲧ ⲉϥⲧⲁⲙⲓⲏⲩ ϩⲓ ⲛⲉϩ ⲉⲩⲑⲩⲥⲓⲁ

7:14  ⲟⲩϫⲏⲏⲥ ⲙⲙⲏⲧⲉ ⲛⲭⲣⲩⲥⲟⲩⲥ ⲉⲥⲙⲏϩ ⲛϣⲟⲩϩⲏⲛⲉ

7:15  ⲟⲩⲙⲁⲥⲉ ⲉⲃⲟⲗ ϩⲛ ⲛⲉϩⲟⲟⲩ ⲟⲩⲓⲉⲓⲃ ⲛⲟⲩⲣⲟⲙⲡⲉ ⲉⲩϭⲗⲓⲗ

7:16  ⲟⲩϭⲓⲉ ⲉⲃⲟⲗ ϩⲛ ⲛⲃⲁⲁⲙⲡⲉ ϩⲁ ⲛⲟⲃⲉ

7:17  ⲁⲩⲱ ⲉⲩⲑⲩⲥⲓⲁ ⲛⲟⲩϫⲁⲓ ⲃⲁϩⲥⲉ ⲥⲛⲧⲉ ϯⲟⲩ ⲛⲟⲓⲗⲉ ϯⲟⲩ ⲛϭⲓⲉ ϯ ⲛϩⲓⲁⲓⲃⲉ ⲛⲟⲩⲣⲟⲙⲡⲉ ⲡⲁⲓ ⲡⲉ ⲡⲇⲱⲣⲟⲛ ⲛⲛⲁⲁⲥⲥⲱⲛ ⲡϣⲏⲣⲉ ⲛⲁⲙⲓⲛⲁⲇⲁⲃ

7:18  ϩⲙ ⲡⲙⲉϩⲥⲛⲁⲩ ⲛϩⲟⲟⲩ ⲁϥⲉⲓⲛⲉ ⲛϭⲓ ⲛⲁⲑⲁⲛⲁⲏⲗ ⲡϣⲏⲣⲉ ⲛⲥⲱⲅⲁⲣ ⲡⲁⲣⲭⲱⲛ ⲛⲧⲉⲫⲩⲗⲏ ⲛⲓⲥⲥⲁⲭⲁⲣ

7:19  ⲁⲩⲱ ⲁϥⲛⲡⲉϥⲇⲱⲣⲟⲛ ⲟⲩϩⲛⲁⲁⲩ ⲛⲉⲓⲁⲧⲟⲟⲧⲟⲩ ⲛϩⲁⲧ ⲛϣⲉ ⲙⲁⲁⲃ ⲛϩⲣⲏϣⲉ ⲟⲩⲫⲓⲁⲗⲏ ⲛϩⲁⲧ ⲉⲥⲉⲓⲣⲉ ⲛϣⲃⲉ ⲥⲓⲕⲗⲟⲥ ⲕⲁⲧⲁ ⲡⲥⲓⲕⲗⲟⲥ ⲉⲧⲟⲩⲁⲁⲃ ⲉⲩⲙⲉϩ ϩⲓ ⲟⲩⲥⲟⲡ ⲛⲥⲁⲙⲓⲧ ⲉϥⲟⲩⲟϣⲙ ϩⲓ ⲛⲉϩ ⲉⲁⲁⲩ ⲛⲑⲩⲥⲓⲁ

7:20  ⲟⲩⲑⲩⲥⲕⲏⲛ ⲛⲛⲟⲩⲃ ⲉⲥⲉⲓⲣⲉ ⲙⲙⲏⲧ ⲛⲭⲣⲩⲥⲟⲩⲥ ⲉⲥⲙⲉϩ ⲛϣⲟⲩϩⲏⲛⲉ

7:21  ⲟⲩⲙⲁⲥⲉ ⲉⲃⲟⲗ ϩⲛ ⲛⲉϩⲟⲟⲩ ⲟⲩⲟⲉⲓⲗⲉ ⲟⲩϩⲓⲉⲓⲃ ⲛⲟⲩⲣⲟⲙⲡⲉ ⲉⲁⲁⲩ ⲛϩⲟⲗⲟⲕⲁⲩⲧⲱⲙⲁ

7:22  ⲁⲩⲱ ⲟⲩϭⲓⲉ ⲉⲃⲟⲗ ϩⲛ ⲛⲃⲁⲁⲙⲡⲉ ϩⲁ ⲛⲟⲃⲉ

7:23  ⲁⲩⲱ ⲉⲧⲉⲑⲩⲥⲓⲁ ⲙⲡⲟⲩϫⲁⲓ ⲃⲁⲥϩⲉ ⲥⲛⲧⲉ ϯⲟⲩ ⲛⲟⲉⲓⲗⲉ ϯⲟⲩ ⲛϭⲓⲉ ϯ ⲛϩⲓⲁⲓⲃⲉ ⲛⲟⲩⲣⲟⲙⲡⲉ ⲡⲁⲓ ⲡⲉ ⲡⲇⲱⲣⲟⲛ ⲛⲛⲁⲑⲁⲛⲁⲏⲗ ⲡϣⲏⲣⲉ ⲛⲥⲱⲅⲁⲣ

7:24  ⲡⲙⲉϩϣⲟⲛⲧ ⲛϩⲟⲟⲩ ⲡⲁⲣⲭⲱⲛ ⲛⲛϣⲏⲣⲉ ⲛⲍⲁⲃⲟⲩⲗⲱⲛ ⲉⲗⲓⲁⲃ ⲡϣⲏⲣⲉ ⲛⲭⲁⲓⲗⲱⲛ

7:25  ⲡⲉϥⲇⲱⲣⲟⲛ ⲉⲛⲧⲁϥⲛⲧϥ ⲉϩⲟⲩⲛ ⲡⲉ ⲟⲩϩⲛⲁⲁⲩ ⲛϩⲁⲧ ⲉϥⲉⲓⲣⲉ ⲛϣⲉ ⲙⲁⲁⲃ ⲛϩⲣⲏϣⲉ ⲟⲩⲫⲓⲁⲗⲏ ⲛϩⲁⲧ ⲉⲥⲉⲓⲣⲉ ⲛϣⲃⲉ ⲛⲥⲓⲕⲗⲟⲥ ⲕⲁⲧⲁ ⲡⲥⲓⲕⲗⲟⲥ ⲉⲧⲟⲩⲁⲁⲃ ⲉⲩⲙⲉϩ ϩⲓ ⲟⲩⲥⲟⲡ ⲛⲥⲁⲙⲓⲧ ⲉϥⲟⲩⲟϣⲙ ϩⲓ ⲛⲉϩ ⲉⲁⲁⲩ ⲛⲟⲩⲑⲩⲥⲓⲁ

7:26  ⲟⲩⲑⲩⲥⲕⲏ ⲛⲛⲟⲩⲃ ⲉⲥⲉⲓⲣⲉ ⲙⲙⲏⲧ ⲛⲭⲣⲩⲥⲟⲩⲥ ⲉⲥⲙⲉϩ ⲛϣⲟⲩϩⲏⲛⲉ

7:27  ⲟⲩⲙⲁⲥⲉ ⲉⲃⲟⲗ ϩⲛ ⲛⲉϩⲟⲟⲩ ⲟⲩⲟⲉⲓⲗⲉ ⲟⲩϩⲓⲉⲓⲃ ⲛⲟⲩⲣⲟⲙⲡⲉ ⲉⲁⲁⲩ ⲛϩⲟⲗⲟⲕⲁⲩⲧⲱⲙⲁ

7:28  ⲟⲩϭⲓⲉ ⲉⲃⲟⲗ ϩⲛ ⲛⲃⲁⲁⲙⲡⲉ ϩⲁ ⲛⲟⲃⲉ

7:29  ⲁⲩⲱ ⲉⲧⲉⲑⲩⲥⲓⲁ ⲙⲡⲟⲩϫⲁⲓ ⲃⲁϩⲥⲉ ⲥⲛⲧⲉ ϯⲟⲩ ⲛⲟⲉⲓⲗⲉ ϯⲟⲩ ⲛϭⲓⲉ ϯ ⲛϩⲓⲁⲉⲓⲃⲉ ⲛⲟⲩⲣⲟⲙⲡⲉ ⲡⲁⲓ ⲡⲉ ⲡⲇⲱⲣⲟⲛ ⲛⲉⲗⲓⲁⲃ ⲡϣⲏⲣⲉ ⲛⲭⲁⲓⲗⲱⲛ

7:30  ⲡⲙⲉϩϥⲧⲟⲟⲩ ⲛϩⲟⲟⲩ ⲡⲁⲣⲭⲱⲛ ⲛⲛϣⲏⲣⲉ ⲛϩⲣⲟⲩⲃⲏⲛ ⲉⲗⲓⲥⲟⲩⲣ ⲡϣⲏⲣⲉ ⲛⲥⲉⲇⲓⲟⲩⲣ

7:31  ⲁϥⲉⲓⲛⲉ ⲙⲡⲉϥⲇⲱⲣⲟⲛ ⲟⲩϩⲛⲁⲁⲩ ⲛϩⲁⲧ ⲉϥⲉⲓⲣⲉ ⲛϣⲉ ⲙⲁⲁⲃ ⲛϩⲣⲏϣⲉ ⲟⲩⲫⲓⲁⲗⲏ ⲛϩⲁⲧ ⲉⲥⲉⲓⲣⲉ ⲛϣⲃⲉ ⲛⲥⲓⲕⲗⲟⲥ ⲕⲁⲧⲁ ⲡⲥⲓⲕⲗⲟⲥ ⲉⲧⲟⲩⲁⲁⲃ

7:32  ⲉⲩⲙⲉϩ ϩⲓ ⲟⲩⲥⲟⲡ ⲛⲥⲁⲙⲓⲧ ⲉϥⲟⲩⲟϣⲙ ϩⲓ ⲛⲉϩ ⲉⲁⲁⲩ ⲛⲑⲩⲥⲓⲁ ⲁⲩⲱ ⲟⲩⲑⲩⲥⲕⲏ ⲛⲛⲟⲩⲃ ⲉⲥⲉⲓⲣⲉ ⲙⲙⲏⲧ ⲛⲭⲣⲩⲥⲟⲩⲥ ⲉⲥⲙⲉϩ ⲛϣⲟⲩϩⲏⲛⲉ

7:33  ⲟⲩⲙⲁⲥⲉ ⲉⲃⲟⲗ ϩⲛ ⲛⲉϩⲟⲟⲩ ⲟⲩⲟⲉⲓⲗⲉ ⲟⲩϩⲓⲉⲓⲃ ⲛⲟⲩⲣⲟⲙⲡⲉ ⲉⲁⲁⲩ ⲛϩⲟⲗⲟⲕⲁⲩⲧⲱⲙⲁ

7:34  ⲁⲩⲱ ⲟⲩϭⲓⲉ ⲉⲃⲟⲗ ϩⲛ ⲛⲃⲁⲁⲙⲡⲉ ϩⲁ ⲛⲟⲃⲉ

7:35  ⲁⲩⲱ ⲉⲧⲉⲑⲩⲥⲓⲁ ⲙⲡⲟⲩϫⲁⲓ ⲃⲁϩⲥⲉ ⲥⲛⲧⲉ ϯⲟⲩ ⲛⲟⲉⲓⲗⲉ ϯⲟⲩ ⲛϭⲓⲉ ϯ ⲛϩⲓⲁⲉⲓⲃⲉ ⲛⲟⲩⲣⲟⲙⲡⲉ ⲡⲁⲓ ⲡⲉ ⲡⲇⲱⲣⲟⲛ ⲛⲉⲗⲓⲥⲟⲩⲣ ⲡϣⲏⲣⲉ ⲛⲉⲉⲇⲓⲟⲩⲣ

7:36  ⲡⲙⲉϩϯⲟⲩ ⲛϩⲟⲟⲩ ⲡⲁⲣⲭⲱⲛ ⲛⲛϣⲏⲣⲉ ⲛⲥⲩⲙⲉⲱⲛ ⲥⲁⲗⲁⲙⲓⲏⲗ ⲡϣⲏⲣⲉ ⲛⲥⲟⲩⲣⲁⲥⲁⲇⲁⲓ

7:37  ⲁϥⲉⲓⲛⲉ ⲙⲡⲉϥⲇⲱⲣⲟⲛ ⲟⲩϩⲛⲁⲁⲩ ⲛϩⲁⲧ ⲉⲥⲉⲓⲣⲉ ⲛϣⲉ ⲙⲁⲁⲃ ⲛϩⲣⲏϣⲉ ⲟⲩⲫⲓⲁⲗⲏ ⲛϩⲁⲧ ⲛⲥⲓⲕⲗⲟⲥ ⲕⲁⲧⲁ ⲡⲥⲓⲕⲗⲟⲥ ⲉⲧⲟⲩⲁⲁⲃ ⲡⲉⲥⲛⲁⲩ ⲉⲩⲙⲏϩ ⲛⲥⲁⲙⲓⲧ ⲉϥⲧⲁⲙⲓⲏⲩ ϩⲓ ⲛⲉϩ ⲉⲩⲑⲩⲥⲓⲁ

7:38  ⲟⲩϫⲏⲏⲥ ⲙⲙⲏⲧ ⲛⲭⲣⲩⲥⲟⲥ ⲉⲥⲙⲏϩ ⲛϣⲟⲩϩⲏⲛⲉ

7:39  ⲟⲩⲙⲁⲥⲉ ⲉⲃⲟⲗ ϩⲛ ⲛⲉϩⲟⲟⲩ ⲟⲩⲟⲓⲗⲉ ⲟⲩϩⲓⲉⲓⲃ ⲛⲛⲟⲩⲣⲟⲙⲡⲉ ⲉⲩϭⲗⲓⲗ

7:40  ⲟⲩϭⲓⲉ ⲉⲃⲟⲗ ϩⲛ ⲛⲃⲁⲁⲙⲡⲉ ϩⲁ ⲛⲟⲃⲉ

7:41  ⲁⲩⲱ ⲉⲩⲑⲩⲥⲓⲁ ⲛⲟⲩϫⲁⲓ ⲃⲁϩⲥⲉ ⲥⲛⲧⲉ ϯⲟⲩ ⲛⲟⲓⲗⲉ ϯⲟⲩ ⲛϭⲓⲉ ϯ ⲛϩⲓⲁⲓⲃⲉ ⲛⲟⲩⲣⲟⲙⲡⲉ ⲡⲁⲓ ⲡⲉ ⲡⲇⲱⲣⲟⲛ ⲛⲥⲁⲗⲁⲙⲓⲏⲗ ⲡϣⲏⲣⲉ ⲛⲥⲟⲩⲣⲓⲥⲁⲇⲁⲓ

7:42  ϩⲙ ⲡⲙⲉϩⲥⲟⲟⲩ ⲛϩⲟⲟⲩ ⲡⲁⲣⲭⲱⲛ ⲛⲛϣⲏⲣⲉ ⲛⲅⲁⲇ ⲉⲗⲓⲥⲁⲫ ⲡϣⲏⲣⲉ ⲛϩⲣⲁⲅⲟⲩⲏⲗ

7:43  ⲡⲉϥⲇⲱⲣⲟⲛ ⲟⲩϩⲛⲁⲁⲩ ⲛⲉⲓⲁⲧⲟⲟⲧⲟⲩ ⲛϩⲁⲧ ⲛϣⲉ ⲙⲁⲁⲃ ⲛⲥⲓⲕⲗⲟⲥ ⲡⲉ ⲡⲉϥϣⲓ ⲟⲩⲫⲓⲁⲗⲏ ⲛϩⲁⲧ ⲛϣϥⲉ ⲛⲥⲓⲕⲗⲟⲥ ⲕⲁⲧⲁ ⲡⲉⲥⲓⲕⲗⲟⲥ ⲉⲧⲟⲩⲁⲁⲃ ⲡⲉⲥⲛⲁⲩ ⲉⲩⲧⲁⲙⲓⲏⲩ ϩⲓ ⲛⲉϩ ⲉⲩⲑⲩⲥⲓⲁ

7:44  ⲟⲩϫⲏⲏⲥ ⲙⲙⲏⲧⲉ ⲛⲭⲣⲩⲥⲟⲥ ⲉⲥⲙⲏϩ ⲛϣⲟⲩϩⲏⲛⲉ

7:45  ⲟⲩⲙⲁⲥⲉ ⲉⲃⲟⲗ ϩⲛ ⲛⲉϩⲟⲟⲩ ⲟⲩⲟⲓⲗⲉ ⲟⲩϩⲓⲉⲓⲃ ⲛⲟⲩⲣⲟⲙⲡⲉ ⲉⲩϭⲗⲓⲗ

7:46  ⲟⲩϭⲓⲉ ⲉⲃⲟⲗ ϩⲛ ⲛⲃⲁⲁⲙⲡⲉ ϩⲁ ⲛⲟⲃⲉ

7:47  ⲁⲩⲱ ⲉⲩⲑⲩⲥⲓⲁ ⲛⲟⲩϫⲁⲓ ⲃⲁϩⲥⲉ ⲥⲛⲧⲉ ϯⲟⲩ ⲛⲟⲓⲗⲉ ϯⲟⲩ ⲛϭⲓⲉ ϯ ⲛϩⲓⲁⲓⲃⲉ ⲛⲟⲩⲣⲟⲙⲡⲉ ⲡⲁⲓ ⲡⲉ ⲡⲇⲱⲣⲟⲛ ⲛⲉⲗⲓⲥⲁⲫ ⲡϣⲏⲣⲉ ⲛϩⲣⲁⲅⲟⲩⲏⲗ

7:48  ϩⲙ ⲡⲙⲉϩⲥⲁϣϥ ⲛϩⲟⲟⲩ ⲡⲁⲣⲭⲱⲛ ⲛⲛϣⲏⲣⲉ ⲛⲉⲫⲣⲁⲓⲙ ⲉⲗⲓⲥⲁⲙⲁ ⲡϣⲏⲣⲉ ⲛⲉⲙⲓⲟⲩⲇ

7:49  ⲡⲉϥⲇⲱⲣⲟⲛ ⲟⲩϩⲛⲁⲁⲩ ⲛⲉⲓⲁⲧⲟⲟⲧⲟⲩ ⲛϩⲁⲧ ⲛϣⲉ ⲙⲁⲁⲃ ⲛⲥⲓⲕⲗⲟⲥ ⲡⲉ ⲡⲉϥϣⲓ ⲟⲩⲫⲓⲁⲗⲏ ⲛϩⲁⲧ ⲛϣϥⲉ ⲛⲥⲓⲕⲗⲟⲥ ⲕⲁⲧⲁ ⲡⲥⲓⲕⲗⲟⲥ ⲉⲧⲟⲩⲁⲁⲃ ⲡⲉⲥⲛⲁⲩ ⲉⲩⲙⲏϩ ⲛⲥⲁⲙⲓⲧ ⲉϥⲧⲁⲙⲓⲏⲩ ϩⲓ ⲛⲉϩ ⲉⲩⲑⲩⲥⲓⲁ

7:50  ⲟⲩϫⲏⲏⲥ ⲙⲙⲏⲧⲉ ⲛⲭⲣⲩⲥⲟⲥ ⲉⲥⲙⲏϩ ⲛϣⲟⲩϩⲏⲛⲉ

7:51  ⲟⲩⲙⲁⲥⲉ ⲉⲃⲟⲗ ϩⲛ ⲛⲉϩⲟⲟⲩ ⲟⲩⲟⲓⲗⲉ ⲟⲩϩⲓⲉⲓⲃ ⲛⲟⲩⲣⲟⲙⲡⲉ ⲉⲩϭⲗⲓⲗ

7:52  ⲟⲩϭⲓⲉ ⲉⲃⲟⲗ ϩⲛ ⲛⲃⲁⲁⲙⲡⲉ ϩⲁ ⲛⲟⲃⲉ

7:53  ⲁⲩⲱ ⲉⲩⲑⲩⲥⲓⲁ ⲛⲟⲩϫⲁⲓ ⲃⲁϩⲥⲉ ⲥⲛⲧⲉ ϯⲟⲩ ⲛⲟⲓⲗⲉ ϯⲟⲩ ⲛϭⲓⲉ ϯ ⲛϩⲓⲁⲉⲓⲃⲉ ⲛⲟⲩⲣⲟⲙⲡⲉ ⲡⲁⲓ ⲡⲉ ⲡⲇⲱⲣⲟⲛ ⲛⲉⲗⲓⲥⲁⲙⲁ ⲡϣⲏⲣⲉ ⲛⲉⲙⲓⲟⲩⲇ

7:54  ϩⲙ ⲡⲙⲉϩϣⲙⲟⲩⲛ ⲛϩⲟⲟⲩ ⲡⲁⲣⲭⲱⲛ ⲛⲛϣⲏⲣⲉ ⲙⲙⲁⲛⲁⲥⲥⲏ ⲅⲁⲙⲁⲗⲓⲏⲗ ⲡϣⲏⲣⲉ ⲙⲫⲁⲗⲇⲁⲥⲟⲩⲣ

7:55  ⲡⲉϥⲇⲱⲣⲟⲛ ⲟⲩϩⲛⲁⲁⲩ ⲛⲉⲓⲁⲧⲟⲟⲧⲟⲩ ⲛϩⲁⲧ ⲛϣⲉ ⲙⲁⲁⲃ ⲛⲥⲓⲕⲗⲟⲥ ⲡⲉ ⲡⲉϥϣⲓ ⲟⲩⲫⲓⲁⲗⲏ ⲛϩⲁⲧ ⲛϣϥⲉ ⲛⲥⲓⲕⲗⲟⲥ ⲕⲁⲧⲁ ⲡⲥⲓⲕⲗⲟⲥ ⲉⲧⲟⲩⲁⲁⲃ ⲡⲉⲥⲛⲁⲩ ⲉⲩⲙⲏϩ ⲛⲥⲁⲙⲓⲧ ⲉⲩⲧⲁⲙⲓⲏⲩ ϩⲓ ⲛⲉϩ ⲉⲩⲑⲩⲥⲓⲁ

7:56  ⲟⲩϫⲏⲏⲥ ⲙⲙⲏⲧⲉ ⲛⲭⲣⲩⲥⲟⲥ ⲉⲥⲙⲏϩ ⲛϣⲟⲩϩⲏⲛⲉ

7:57  ⲟⲩⲙⲁⲥⲉ ⲉⲃⲟⲗ ϩⲛ ⲛⲉϩⲟⲟⲩ ⲟⲩϩⲓⲉⲓⲃ ⲛⲟⲩⲣⲟⲙⲡⲉ ⲉⲩϭⲗⲓⲗ

7:58  ⲟⲩϭⲓⲉ ⲉⲃⲟⲗ ϩⲛ ⲛⲃⲁⲁⲙⲡⲉ ϩⲁ ⲛⲟⲃⲉ

7:59  ⲉⲩⲑⲩⲥⲓⲁ ⲛⲛⲟⲩϫⲁⲓ ⲃⲁϩⲥⲉ ⲥⲛⲧⲉ ϯⲟⲩ ⲛⲟⲓⲗⲉ ϯⲟⲩ ⲛϭⲓⲉ ϯ ⲛϩⲓⲁⲓⲃⲉ ⲛⲟⲩⲣⲟⲙⲡⲉ ⲡⲁⲓ ⲡⲉ ⲡⲇⲱⲣⲟⲛ ⲛⲅⲁⲙⲁⲗⲓⲏⲗ ⲡϣⲏⲣⲉ ⲛⲫⲁⲗⲇⲁⲥⲟⲩⲣ

7:60  ϩⲙ ⲡⲙⲉϩⲯⲓⲥ ⲛϩⲟⲟⲩ ⲡⲁⲣⲭⲱⲛ ⲛⲛϣⲏⲣⲉ ⲛⲃⲉⲛⲓⲁⲙⲓⲛ ⲁⲃⲓⲇⲁⲛ ⲡϣⲏⲣⲉ ⲛⲅⲁⲇⲉⲱⲛⲓ

7:61  ⲡⲉϥⲇⲱⲣⲟⲛ ⲟⲩϩⲛⲁⲁⲩ ⲛⲉⲓⲁⲧⲟⲟⲧⲟⲩ ⲛϩⲁⲧ ⲛϣⲉ ⲙⲁⲁⲃ ⲛⲥⲓⲕⲗⲟⲥ ⲡⲉ ⲡⲉϥϣⲓ ⲟⲩⲫⲓⲁⲗⲏ ⲛϩⲁⲧ ⲛϣϥⲉ ⲛⲥⲓⲕⲗⲟⲥ ⲕⲁⲧⲁ ⲡⲥⲓⲕⲗⲟⲥ ⲉⲧⲟⲩⲁⲁⲃ ⲡⲉⲥⲛⲁⲩ ⲉⲩⲙⲏϩ ⲛⲥⲁⲙⲓⲧ ⲉϥⲧⲁⲙⲓⲏⲩ ϩⲓ ⲛⲉϩ ⲉⲩⲑⲩⲥⲓⲁ

7:62  ⲟⲩϫⲏⲏⲥ ⲙⲙⲏⲧⲉ ⲛⲭⲣⲩⲥⲟⲥ ⲉⲥⲙⲏϩ ⲛϣⲟⲩϩⲏⲛⲉ

7:63  ⲟⲩⲙⲁⲥⲉ ⲉⲃⲟⲗ ϩⲛ ⲛⲉϩⲟⲟⲩ ⲟⲩⲟⲓⲗⲉ ⲟⲩϩⲓⲉⲓⲃ ⲛⲟⲩⲣⲟⲙⲡⲉ ⲉⲩϭⲗⲓⲗ

7:64  ⲟⲩϭⲓⲉ ⲉⲃⲟⲗ ϩⲛ ⲛⲃⲁⲁⲙⲡⲉ ϩⲁ ⲛⲟⲃⲉ

7:65  ⲁⲩⲱ ⲉⲩⲑⲩⲥⲓⲁ ⲛⲟⲩϫⲁⲓ ⲃⲁϩⲥⲉ ⲥⲛⲧⲉ ϯⲟⲩ ⲛⲟⲓⲗⲉ ϯⲟⲩ ⲛϭⲓⲉ ϯ ⲛϩⲓⲁⲓⲃⲉ ⲛⲟⲩⲣⲟⲙⲡⲉ ⲡⲁⲓ ⲡⲉ ⲡⲇⲱⲣⲟⲛ ⲛⲁⲃⲓⲇⲁⲛ ⲡϣⲏⲣⲉ ⲛⲅⲁⲇⲉⲱⲛⲓ

7:66  ϩⲙ ⲡⲙⲉϩⲙⲏⲧ ⲛϩⲟⲟⲩ ⲡⲁⲣⲭⲱⲛ ⲛⲛϣⲏⲣⲉ ⲛⲇⲁⲛ ⲁⲭⲓⲉⲍⲉⲣ ⲡϣⲏⲣⲉ ⲛⲁⲙⲓⲥⲁⲇⲁⲓ

7:67  ⲡⲉϥⲇⲱⲣⲟⲛ ⲟⲩϩⲛⲁⲁⲩ ⲛⲉⲓⲁⲧⲟⲟⲧⲟⲩ ⲛϩⲁⲧ ⲛϣⲉ ⲙⲁⲁⲃ ⲛⲥⲓⲕⲗⲟⲥ ⲡⲉ ⲡⲉϥϣⲓ ⲟⲩⲫⲓⲁⲗⲏ ⲛϩⲁⲧ ⲛϣϥⲉ ⲛⲥⲓⲕⲗⲟⲥ ⲕⲁⲧⲁ ⲡⲥⲓⲕⲗⲟⲥ ⲉⲧⲟⲩⲁⲁⲃ ⲡⲉⲥⲛⲁⲩ ⲉⲩⲙⲏϩ ⲛⲥⲁⲙⲓⲧ ⲉϥⲧⲁⲙⲓⲏⲩ ϩⲓ ⲛⲉϩ ⲉⲩⲑⲩⲥⲓⲁ

7:68  ⲟⲩϫⲏⲏⲥ ⲙⲙⲏⲧⲉ ⲛⲭⲣⲩⲥⲟⲥ ⲉⲥⲙⲏϩ ⲛϣⲟⲩϩⲏⲛⲉ

7:69  ⲟⲩⲙⲁⲥⲉ ⲉⲃⲟⲗ ϩⲛ ⲛⲉϩⲟⲟⲩ ⲟⲩⲟⲓⲗⲉ ⲟⲩϩⲓⲉⲓⲃ ⲛⲟⲩⲣⲟⲙⲡⲉ ⲉⲩϭⲗⲓⲗ

7:70  ⲟⲩϭⲓⲉ ⲉⲃⲟⲗ ϩⲛ ⲛⲃⲁⲁⲙⲡⲉ

7:71  ⲉⲩⲑⲩⲥⲓⲁ ⲛⲟⲩϫⲁⲓⲃⲁϩⲥⲉ ⲥⲛⲧⲉ ϯⲟⲩ ⲛⲟⲓⲗⲉ ϯⲟⲩ ⲛϭⲓⲉ ϯⲟⲩ ⲛϩⲓⲁⲓⲃⲉ ⲛⲟⲩⲣⲟⲙⲡⲉ ⲡⲁⲓ ⲡⲉ ⲡⲇⲱⲣⲟⲛ ⲛⲁⲭⲓⲉⲍⲉⲣ ⲡϣⲏⲣⲉ ⲛⲁⲙⲓⲥⲁⲇⲁⲓ

7:72  ϩⲙ ⲡⲙⲉϩⲙⲛⲧⲟⲩⲉ ⲛϩⲟⲟⲩ ⲡⲁⲣⲭⲱⲛ ⲛⲛϣⲏⲣⲉ ⲛⲁⲥⲥⲏⲣ ⲫⲁⲅⲉⲏⲗ ⲡϣⲏⲣⲉ ⲛⲉⲭⲣⲁⲛ

7:73  ⲡⲉϥⲇⲱⲣⲟⲛ ⲟⲩϩⲛⲁⲁⲩ ⲛϩⲁⲧ ⲛⲉⲓⲁⲧⲟⲟⲧⲟⲩ ⲛϣⲉ ⲙⲁⲁⲃ ⲛⲥⲓⲕⲗⲟⲥ ⲡⲉ ⲡⲉϥϣⲓ ⲟⲩⲫⲓⲁⲗⲏ ⲛϩⲁⲧ ⲛϣϥⲉ ⲛⲥⲓⲕⲗⲟⲥ ⲕⲁⲧⲁ ⲡⲥⲓⲕⲗⲟⲥ ⲉⲧⲟⲩⲁⲁⲃ ⲡⲉⲥⲛⲁⲩ ⲉⲩⲧⲁⲙⲓⲏⲩ ϩⲓ ⲛⲉϩ ⲉⲩⲑⲩⲥⲓⲁ

7:74  ⲟⲩϫⲏⲏⲥ ⲙⲙⲏⲧⲉ ⲛⲭⲣⲩⲥⲟⲥ ⲉⲥⲙⲏϩ ⲛϣⲟⲩϩⲏⲛⲉ

7:75  ⲟⲩⲙⲁⲥⲉ ⲉⲃⲟⲗ ϩⲛ ⲛⲉϩⲟⲟⲩ ⲟⲩⲟⲓⲗⲉ ⲟⲩϩⲓⲉⲓⲃ ⲛⲟⲩⲣⲟⲙⲡⲉ ⲉⲩϭⲗⲓⲗ

7:76  ⲟⲩϭⲓⲉ ⲉⲃⲟⲗ ϩⲛ ⲛⲃⲁⲁⲙⲡⲉ ϩⲁ ⲛⲟⲃⲉ

7:77  ⲁⲩⲱ ⲉⲩⲑⲩⲥⲓⲁ ⲛⲟⲩϫⲁⲓ ⲃⲁϩⲥⲉ ⲥⲛⲧⲉ ϯⲟⲩ ⲛⲟⲓⲗⲉ ϯⲟⲩ ⲛϭⲓⲉ ϯ ⲛϩⲓⲁⲓⲃⲉ ⲛⲟⲩⲣⲟⲙⲡⲉ ⲡⲁⲓ ⲡⲉ ⲡⲇⲱⲣⲟⲛ ⲙⲫⲁⲅⲉⲏⲗ ⲡϣⲏⲣⲉ ⲛⲉⲭⲣⲁⲛ

7:78  ϩⲙ ⲡⲙⲉϩⲙⲛⲧⲥⲛⲟⲟⲩⲥ ⲛϩⲟⲟⲩ ⲡⲁⲣⲭⲱⲛ ⲛⲛϣⲏⲣⲉ ⲉⲛⲉⲫⲑⲁⲗⲓⲙ ⲁⲭⲓⲏⲗ ⲡϣⲏⲣⲉ ⲛⲁⲓⲛⲁⲛ

7:79  ⲡⲉϥⲇⲱⲣⲟⲛ ⲟⲩϩⲛⲁⲁⲩ ⲛⲉⲓⲁⲧⲟⲟⲧⲟⲩ ⲛϩⲁⲧ ⲛϣⲉ ⲙⲁⲁⲃ ⲛⲥⲓⲕⲗⲟⲥ ⲡⲉ ⲡⲉϥϣⲓ ⲟⲩⲫⲓⲁⲗⲏ ⲛϩⲁⲧ ⲛϣϥⲉ ⲛⲥⲓⲕⲗⲟⲥ ϩⲙ ⲡⲥⲓⲕⲗⲟⲥ ⲉⲧⲟⲩⲁⲁⲃ ⲡⲉⲥⲛⲁⲩ ⲉⲩⲙⲏϩ ⲛⲥⲁⲙⲓⲧ ⲉϥⲧⲁⲙⲓⲏⲩ ϩⲓ ⲛⲉϩ ⲉⲩⲑⲩⲥⲓⲁ

7:80  ⲟⲩϫⲏⲏⲥ ⲙⲙⲏⲧⲉ ⲛⲭⲣⲩⲥⲟⲥ ⲉⲥⲙⲏϩ ⲛϣⲟⲩϩⲏⲛⲉ

7:81  ⲟⲩⲙⲁⲥⲉ ⲉⲃⲟⲗ ϩⲛ ⲛⲉϩⲟⲟⲩ ⲟⲩⲟⲓⲗⲉ ⲟⲩϩⲓⲉⲓⲃ ⲛⲟⲩⲣⲟⲙⲡⲉ ⲉⲩϭⲗⲓⲗ

7:82  ⲟⲩϭⲓⲉ ⲉⲃⲟⲗ ϩⲛ ⲛⲃⲁⲁⲙⲡⲉ ϩⲁ ⲛⲟⲃⲉ

7:83  ⲁⲩⲱ ⲉⲩⲑⲩⲥⲓⲁ ⲛⲟⲩϫⲁⲓ ⲃⲁϩⲥⲉ ⲥⲛⲧⲉ ϯⲟⲩ ⲛϭⲓⲉ ϯⲟⲩ ⲛⲟⲓⲗⲉ ϯ ⲛϩⲓⲁⲓⲃⲉ ⲛⲟⲩⲣⲟⲙⲡⲉ ⲡⲁⲓ ⲡⲉ ⲡⲇⲱⲣⲟⲛ ⲛⲁⲭⲓⲏⲗ ⲡϣⲏⲣⲉ ⲛⲁⲓⲛⲁⲛ

7:84  ⲡⲁⲓ ⲡⲉ ⲡϫⲓⲁⲉⲓⲕ ⲛⲡⲉⲑⲩⲥⲓⲁⲥⲧⲏⲣⲓⲟⲛ ϩⲣⲁⲓ ϩⲙ ⲡⲉϩⲟⲟⲩ ⲛⲧⲁϥⲧⲱϩⲥ ⲙⲙⲟϥ ⲉⲃⲟⲗ ϩⲓⲧⲛ ⲛⲁⲣⲭⲱⲛ ⲙⲡ ⲙⲛⲧⲥⲛⲟⲟⲩⲥ ⲛⲧⲣⲩⲃⲁⲓⲟⲛ ⲛϩⲁⲧ ⲙⲛⲧⲥⲛⲟⲟⲩⲥ ⲛⲫⲓⲁⲗⲏ ⲛϩⲁⲧ ⲙⲛⲧⲥⲛⲟⲟⲩⲥ ⲛϫⲏⲏⲥ ⲛⲛⲟⲩⲃ

7:85  ϣⲉ ⲙⲁⲃⲥⲛⲟⲟⲩⲥ ⲛⲥⲓⲕⲗⲟⲥ ⲡⲉ ⲡⲉⲧⲣⲓⲃⲩⲗⲗⲱⲛ ⲉϣϥⲉ ⲛⲥⲓⲕⲗⲟⲥ ⲉⲛⲉⲫⲓⲁⲗⲏ ⲡϩⲁⲧ ⲧⲏⲣϥ ⲛⲛⲉⲥⲕⲉⲩⲏ ⲥⲛⲁⲩ ⲛϣⲟ ⲙⲛ ϥⲧⲟⲩϣⲉ ⲛⲉ ⲛⲥⲓⲕⲗⲟⲥ ϩⲙ ⲡⲥⲓⲕⲗⲟⲥ ⲉⲧⲟⲩⲁⲁⲃ

7:86  ⲙⲛⲧⲥⲛⲟⲟⲩⲥⲉ ⲛϫⲏⲏⲥ ⲛⲛⲟⲩⲃ ⲉⲩⲙⲏϩ ⲛϣⲟⲩϩⲏⲛⲉ ⲡⲛⲟⲩⲃ ⲧⲏⲣϥ ⲛⲛⲉϫⲏⲏⲥ ϣⲉ ϫⲟⲩⲱⲧⲉ ⲛⲭⲣⲩⲥⲟⲥ ⲛⲉ

7:87  ⲙⲙⲁⲥⲉ ⲧⲏⲣⲟⲩ ⲙⲡⲉϭⲗⲓⲗ ⲙⲛⲧⲥⲛⲟⲟⲩⲥ ⲙⲙⲁⲥⲉ ⲛⲉ ⲙⲛⲧⲥⲛⲟⲟⲩⲥ ⲛⲟⲓⲗⲉ ⲛⲉ ⲙⲛⲧⲥⲛⲟⲟⲩⲥ ⲛϩⲓⲉⲓⲃ ⲛⲟⲩⲣⲟⲙⲡⲉ ⲁⲩⲱ ⲛⲉⲩⲑⲩⲥⲓⲁ ⲙⲛ ⲧⲉⲩⲥⲡⲟⲛⲇⲏ ⲁⲩⲱ ⲙⲛⲧⲥⲛⲟⲟⲩⲥ ⲛϭⲓⲉ ⲉⲃⲟⲗ ϩⲛ ⲛⲃⲁⲁⲙⲡⲉ ϩⲁ ⲛⲟⲃⲉ

7:88  ⲛⲉϩⲟⲟⲩ ⲛⲧⲉⲑⲩⲥⲓⲁ ⲛⲥⲱⲧⲏⲣⲓⲟⲛ ϫⲟⲩⲧⲁϥⲧⲉ ⲛⲃⲁϩⲥⲉ ⲛⲉ ⲥⲉ ⲛϭⲓⲉ ⲥⲉ ⲛⲟⲓⲗⲉ ⲥⲉ ⲛϩⲓⲉⲓⲃ ⲛⲟⲩⲣⲟⲙⲡⲉ ⲉⲙⲛϫⲃⲓⲛ ϩⲓⲱⲟⲩ ⲡⲁⲓ ⲡⲉ ⲡϫⲓⲁⲉⲓⲕ ⲙⲡⲉⲑⲩⲥⲓⲁⲥⲧⲏⲣⲓⲟⲛ ⲙⲛⲛⲥⲁ ⲧⲣⲉϥϫⲱⲕ ⲉⲃⲟⲗ ϩⲛ ⲧⲉϥϭⲓϫ

7:89  ⲁⲩⲱ ⲙⲛⲛⲥⲁ ⲧⲣⲉϥⲧⲱϩⲥ ⲙⲙⲟϥ ⲉⲣⲉⲙⲱⲩⲥⲏⲥ ⲛⲁⲃⲱⲕ ⲉϩⲟⲩⲛ ⲉⲧⲉⲥⲕⲩⲛⲏ ⲙⲡⲙⲛⲧⲣⲉ ⲉⲧⲣⲉⲩϣⲁϫⲉ ⲛⲙⲙⲁϥ ⲁϥⲥⲱⲧⲙ ⲉⲧⲉⲥⲙⲏ ⲙⲡϫⲟⲉⲓⲥ ⲉϥϣⲁϫⲉ ⲛⲙⲙⲁϥ ϩⲓ ⲧⲡⲉ ⲙⲡϩⲓⲗⲁⲥⲧⲏⲣⲓⲟⲛ ⲡⲁⲓ ⲉⲧⲛϩⲣⲁⲓ ϩⲓϫⲛ ⲧⲕⲓⲃⲱⲧⲟⲥ ⲙⲡⲙⲛⲧⲣⲉ ϩⲛ ⲧⲙⲏⲧⲉ ⲙⲡⲉⲥⲛⲁⲩ ⲛⲭⲁⲓⲣⲟⲩⲃⲓⲛ ⲁⲩⲱ ⲛⲉϥϣⲁϫⲉ ⲛⲙⲙⲁϥ