CSlElizabeth - Sirach - 28

28:1  Отмщаяй от Господа обрящет отмщение, и грехи своя соблюдаяй соблюдет.

28:2  Остави обиду искреннему твоему, и тогда помольшутися, греси твои разрешатся.

28:3  Человек на человека сохраняет гнев, а от Господа ищет изцеления:

28:4  над человеком подобным себе не имать милости, а о гресех своих молится:

28:5  сам сый плоть, хранит гнев: кто очистит грехи его?

28:6  Помяни последняя и престани враждовати, (помяни) истление и смерть и пребывай в заповедех.

28:7  Помяни заповеди и не гневайся на ближняго,

28:8  и завет Вышняго и презирай невежество.

28:9  Удаляйся от свара и умалиши грехи:

28:10  человек бо яр разжизает свар, и муж грешник возмятет други и посреде мирных вложит клевету.

28:11  Яково вещество огня, тако возгорится: якова крепость свара, такожде и огнь разгорится:

28:12  якова крепость человеча, такожде ярость его будет, и якоже богатство его, возвысит гнев свой.

28:13  Рвение скорое возжигает огнь, и свар наглый проливает кровь.

28:14  Аще подуеши на искру, возгорится: и аще плюнеши на ню, угаснет: обоя же изо уст твоих исходят.

28:15  Шепотника и двоязычника подобает клясти: многих бо мирных погубиша.

28:16  Язык трегубый многи потрясе и разлучи я от языка во язык,

28:17  и грады тверды разори и домы вельможей преврати:

28:18  язык трегубый жены доблия изгна и лиши я от трудов их:

28:19  внемляй ему не имать обрести покоя, ниже вселится со безмолвием.

28:20  Язва бичная струпы творит, язва же язычная сокрушает кости.

28:21  Мнози падоша острием меча, но не якоже падшии языком:

28:22  блажен, иже укрыется от него, иже не пройде в ярости его, иже не повлече ига его и узами его не связан бысть:

28:23  иго бо его иго железно, и узы его узы медяны:

28:24  смерть люта смерть его, и паче его лучше есть ад.

28:25  Не обладает благоверными, и в пламени его не сгорят.

28:26  Оставляющии Господа впадутся в онь, и в них возгорится и не угаснет: послан будет на ня яко лев, и яко пард погубит я.

28:27  Виждь, огради стяжание твое тернием,

28:28  сребро твое и злато твое свяжи,

28:29  и словесем твоим сотвори вес и меру, и устам твоим сотвори дверь и завору.

28:30  Внимай, да не како поползнешися им, ниже падеши прямо ловящему.