Vulgate - Exodus - 38

38:1  fecit et altare holocausti de lignis setthim quinque cubitorum per quadrum et trium in altitudine

38:2  cuius cornua de angulis procedebant operuitque illud aeneis lamminis

38:3  et in usus eius paravit ex aere vasa diversa lebetas forcipes fuscinulas uncinos et ignium receptacula

38:4  craticulamque eius in modum retis fecit aeneam et subter eam in altaris medio arulam

38:5  fusis quattuor anulis per totidem retiaculi summitates ad inmittendos vectes ad portandum

38:6  quos et ipsos fecit de lignis setthim et operuit lamminis aeneis

38:7  induxitque in circulos qui in altaris lateribus eminebant ipsum autem altare non erat solidum sed cavum ex tabulis et intus vacuum

38:8  fecit et labrum aeneum cum base sua de speculis mulierum quae excubabant in ostio tabernaculi

38:9  et atrium in cuius australi plaga erant tentoria de bysso retorta cubitorum centum

38:10  columnae aeneae viginti cum basibus suis capita columnarum et tota operis celatura argentea

38:11  aeque ad septentrionalis plagam tentoria columnae basesque et capita columnarum eiusdem et mensurae et operis ac metalli erant

38:12  in ea vero plaga quae occidentem respicit fuere tentoria cubitorum quinquaginta columnae decem cum basibus suis aeneae et capita columnarum celata argentea

38:13  porro contra orientem quinquaginta cubitorum paravit tentoria

38:14  e quibus quindecim cubitos columnarum trium cum basibus suis unum tenebat latus

38:15  et in parte altera quia utraque introitum tabernaculi facit quindecim aeque cubitorum erant tentoria columnae tres et bases totidem

38:16  cuncta atrii tentoria byssus torta texuerat

38:17  bases columnarum fuere aeneae capita autem earum cum celaturis suis argentea sed et ipsas columnas atrii vestivit argento

38:18  et in introitu eius opere plumario fecit tentorium ex hyacintho purpura vermiculo ac bysso retorta quod habebat viginti cubitos in longitudine altitudo vero quinque cubitorum erat iuxta mensuram quam cuncta atrii habebant tentoria

38:19  columnae autem ingressus fuere quattuor cum basibus aeneis capitaque earum et celaturae argenteae

38:20  paxillos quoque tabernaculi et atrii per gyrum fecit aeneos

38:21  haec sunt instrumenta tabernaculi testimonii quae numerata sunt iuxta praeceptum Mosi in caerimonias Levitarum per manum Ithamar filii Aaron sacerdotis

38:22  quas Beselehel filius Uri filii Hur de tribu Iuda Domino per Mosen iubente conpleverat

38:23  iuncto sibi socio Hooliab filio Achisamech de tribu Dan qui et ipse artifex lignorum egregius fuit et polymitarius atque plumarius ex hyacintho purpura vermiculo et bysso

38:24  omne aurum quod expensum est in opere sanctuarii et quod oblatum in donariis viginti novem talentorum fuit et septingentorum triginta siclorum ad mensuram sanctuarii

38:25  oblatum est autem ab his qui transierant ad numerum a viginti annis et supra de sescentis tribus milibus et quingentis quinquaginta armatorum

38:26  fuerunt praeterea centum talenta argenti e quibus conflatae sunt bases sanctuarii et introitus ubi velum pendet

38:27  centum bases factae sunt de talentis centum singulis talentis per bases singulas supputatis

38:28  de mille autem septingentis et septuaginta quinque fecit capita columnarum quas et ipsas vestivit argento

38:29  aeris quoque oblata sunt talenta septuaginta duo milia et quadringenti supra sicli

38:30  ex quibus fusae sunt bases in introitu tabernaculi testimonii et altare aeneum cum craticula sua omniaque vasa quae ad usum eius pertinent

38:31  et bases atrii tam in circuitu quam in ingressu eius et paxilli tabernaculi atque atrii per gyrum