JOB
1
2
3
4
5
6
7
8
9
10
11
12
13
14
15
16
17
18
19
20
21
22
23
24
25
26
27
28
29
30
31
32
33
34
35
36
37
38
39
40
41
42
Chapter 24
| Job | Kapingam | 24:1 | “God Mogobuna le aha dela hagalee dugu di madagoaa e-hai di gabunga, di laangi e-gabunga ana gau hai-hegau? | |
| Job | Kapingam | 24:2 | “Nia daangada e-negenege nadau haga-geinga belee haga-damana nadau gowaa. Digaula e-gaiaa nia siibi, e-kae gaa-dugu gi-lodo nadau hagabuulinga-siibi. | |
| Job | Kapingam | 24:3 | Digaula e-daa nia ‘donkey’ o digau nadau maadua ai, gei e-daahi di kau o-di ahina guu-made dono lodo, gaa-dae-loo gi-di ahina deelaa guu-hui dono boibana gii-odi. | |
| Job | Kapingam | 24:4 | Digaula e-duuli gi-daha nia donu digau hagaloale, mo-di hono-adu digaula gii-llele pala hagammuni. | |
| Job | Kapingam | 24:5 | “Malaa, digau hagaloale la-guu-hai gadoo be nia ‘donkey’ lodo-geinga, ala e-halahala nadau mee e-gai i-lodo nia anggowaa maangoo. Deai di gowaa i-golo ai e-mee di-gida nia mee e-gai go nadau dama. | |
| Job | Kapingam | 24:6 | Digaula e-gai nia hadagee ala hagalee ni ginaadou, gei digaula e-ogoogo nia golee nia hadagee o digau huaidu. | |
| Job | Kapingam | 24:7 | I-di boo, gei digaula e-kii hagalee e-gahu, deai nadau mee e-duuli di magalillili ai. | |
| Job | Kapingam | 24:8 | Digaula e-tuu i-di uwa dela e-doo-iha i tomo nia gonduu. Digaula ga-pala-adu gi-di malu o-nia hadugalaa e-haga-malu-ai ginaadou. | |
| Job | Kapingam | 24:9 | “Digau huaidu e-hai-hege nia dama nadau maadua ai, ge e-lahi nia dama digau hagaloale e-hui-ai nia boibana digaula. | |
| Job | Kapingam | 24:10 | Gei digau hagaloale e-heehee-hua nadau goloo e-gahu ginaadou ai. Digaula e-hadi nadau lii-‘wheat’, gei digaula e-hiigai huoloo. | |
| Job | Kapingam | 24:11 | Digaula e-tau nadau olib e-hai nia lolo, gei nia ‘grape’ e-hai nia waini, gei digaula e-hieinu huoloo. | |
| Job | Kapingam | 24:12 | I-lodo nia waahale iai digau gu-lauwa mo digau ala gaa-mmade le e-wwolowwolo, gei God e-haga-de-iloo nia dalodalo digaula. | |
| Job | Kapingam | 24:13 | “Digau i-golo hagalee hiihai gi-di maalama. Digaula e-de-iloo-ginaadou di-maalama, digaula hagalee e-hiihai e-hula gi-di gowaa maalama dela e-dagi ginaadou. | |
| Job | Kapingam | 24:14 | Digau daaligi dangada e-ala-aga hagaluada-loo, gaa-hula e-daaligi digau ala hagaloale, gei i-di boo, digaula e-hai-gaiaa. | |
| Job | Kapingam | 24:15 | Digau hai be-di manu e-talitali di bouli gi-dau-mai, digaula e-hagammuni nadau golomada bolo gi-de-iloo tangada. | |
| Job | Kapingam | 24:16 | Digau gaiaa le e-oho di hale i-di boo, di mee ga-maalama-mai digaula e-pala hagammuni i-di maalama. | |
| Job | Kapingam | 24:17 | Digaula e-mmaadagu i-di maalama o-di aa, gei digaula hagalee e-mmaadagu i-di bouli. | |
| Job | Kapingam | 24:18 | “Digau huaidu e-taahee gi-daha i-di labagee, gei nia gowaa digaula gu-i-lala di hagahalaua a God. Gei digaula gu-deemee di-hula e-ngalua i-lodo nadau gowaa dogi-waini. | |
| Job | Kapingam | 24:19 | E-hai gadoo be ‘snow’ ma-ga-hagalee i-di welengina o-di laa, deelaa gadoo di ala o tangada huaidu dela ma-ga-hagalee i tenua o digau ala e-mouli. | |
| Job | Kapingam | 24:20 | Gei nadau dinana gu-de-langahia-e-ginaadou hogi digaula. Digaula guu-gai go nia ila, gei guu-oho gadoo be nia laagau ma-gaa-tinga gi-lala. | |
| Job | Kapingam | 24:21 | Di hai deenei e-gila-aga, idimaa i nadau hai hagahuaidu nia ahina ala guu-mmade nadau lodo, gei hagalee e-hagalabagau nia ahina ala e-dee-huwa. | |
| Job | Kapingam | 24:22 | God e-daaligi digau aamua gi ono mahi. God ga-ngalua, gei digau huaidu gaa-mmade. | |
| Job | Kapingam | 24:23 | Holongo God ga-dumaalia ang-gi digaula gi-mouli, gei Mee e-daumada digaula i-nia madagoaa huogodoo. | |
| Job | Kapingam | 24:24 | Digau huaidu e-haadanga-lamalia-hua i tama-madagoaa bodobodo. No-muli-hua, gei digaula ga-maangoo gadoo be nia geinga, e-hai gadoo be nia laagau-‘wheat’ ala ne-tuu gi-lala. | |