TpiKJPB - Job - 9

9:1  ¶ Nau Jop i bekim na tok,

9:2  Mi save dispela em i olsem em i tru. Tasol man i ken stap stretpela wantaim God olsem wanem?

9:3  Sapos em i laik tok pait strong wantaim Em, em i no inap bekim Em wanpela bilong wan tausen.

9:4  Em i saveman tru long bel, na Em i strongpela long strong. Husat i bin strongim bel bilong em yet i birua long Em, na bin kamap gutpela?

9:5  Husat i rausim ol maunten i go, na ol i no save , husat i kapsaitim ol long belhat bilong Em.

9:6  Husat i seksekim dispela graun ausait long ples bilong en, na ol bikpela pos bilong en i guria.

9:7  Husat i tok strong long san, na em i no kamap long moning, na Em i pasim ol sta.

9:8  Husat Em wanpela i opim i go ol heven, na krungutim lek antap long sibruk bilong biksi.

9:9  Husat i wokim Arkturas, Oraion, na Pliedes, na ol rum bilong hap saut.

9:10  Husat i mekim ol bikpela samting i abrusim mak bilong painimaut. Yes, na ol bikpela wok i winim tingting i no gat namba bilong kaunim.

9:11  Harim, Em i go klostu long mi, na mi no lukim Em. Em i wokabaut klostu i go tu, tasol mi no kisim save long Em i stap.

9:12  Lukim, Em i tekewe, husat i ken pasim Em? Husat bai tokim Em, Yu mekim wanem?

9:13  Sapos God i no laik surikim belhat bilong Em, ol hambak man bilong helpim i lindaun aninit long Em.

9:14  ¶ Hamas liklik moa bai mi bekim tok long Em, na makim ol toktok bilong mi bilong stretim tok wantaim Em.

9:15  Husat, maski mi stretpela, yet mi no inap bekim tok, tasol mi bai mekim autim askim i go long Jas bilong mi.

9:16  Sapos mi bin singaut, na Em i bin bekim tok long mi, yet bai mi no inap bilip long Em i bin harim long nek bilong mi.

9:17  Long wanem, Em i brukim mi wantaim wanpela bikwin nogut, na mekim ol bagarap bilong mi i kamap nating planti moa.

9:18  Em bai i no inap larim mi pulim win bilong mi, tasol Em i pulimapim mi wantaim bel i bagarap tru.

9:19  Sapos mi toktok long strong, harim, Em i strong. Na sapos mi toktok long kot, husat bai makim wanpela taim bilong mi bilong toktok wantaim strongpela askim?

9:20  Sapos mi mekim mi yet stretpela, maus bilong mi yet bai sutim tok long mi. Sapos mi tok, Mi inap tru, dispela tu bai pruvim mi paul.

9:21  Maski mi inap tru, yet bai mi no gat laik long save long tewel bilong mi yet. Mi bai tingim laip bilong mi olsem i samting nating.

9:22  ¶ Dispela em i wanpela samting, olsem na mi tok pinis long dispela, Em i bagarapim man olgeta i inap tru na man nogut.

9:23  Sapos wip i kilim i dai wantu, Em bai lap long traim bilong man i no bin mekim rong.

9:24  Dispela graun Em i givim long han bilong man nogut. Em i karamapim ol pes bilong ol jas bilong en. Sapos nogat, em i we, na em i husat?

9:25  ¶ Nau ol de bilong mi i hariap moa long wanpela man bilong karim pas. Ol i ranawe i go, ol i no lukim gutpela samting.

9:26  Ol i go pinis olgeta olsem ol sip i ran hariap, olsem igal i hariap i go long abus.

9:27  Sapos mi tok, Mi bai lusim tingting long wari bilong mi, mi bai lusim i go hevi bilong mi, na givim bel isi long mi yet,

9:28  Mi pret long olgeta bel hevi bilong mi. Mi save long Yu no inap long makim mi olsem man i no bin mekim rong.

9:29  Sapos mi man nogut, bilong wanem nau mi hatwok nating?

9:30  Sapos mi wasim mi yet wantaim wara bilong ais, na mekim ol han bilong mi i no bin klin bipo olsem,

9:31  Yet bai Yu tromoi mi i go long baret, na klos bilong mi yet bai ting olsem mi sting olgeta.

9:32  Long wanem, Em i no stap wanpela man, olsem mi, long mi ken bekim tok long em, na mitupela i ken kam bung wantaim bilong kot.

9:33  Na tu i no gat wanpela man bilong stretim hevi namel long mitupela, husat i ken putim han bilong em antap long mitupela wantaim.

9:34  Larim Em tekewe stik bilong Em long mi, na no ken larim pret bilong Em i ken pretim mi nogut tru.

9:35  Nau bai mi toktok, na mi no inap pret long Em. Tasol em i no olsem long mi.