TpiKJPB - Jonah

Chapter 1

1:1  ¶ Nau tok bilong BIKPELA i kam long Jona, pikinini man bilong Amitai, i spik,

1:2  Kirap, go long Niniva, dispela bikpela biktaun, na singaut birua long en. Long wanem, pasin nogut bilong ol i kamap long ai bilong Mi.

1:3  Tasol Jona i kirap bilong ranawe i go long Tarsis long lusim pes bilong BIKPELA, na em i go daun long Jopa. Na em i painim pinis wanpela sip i go long Tarsis. Olsem na em i baim pe bilong en, na em i go daun insait long en, bilong i go wantaim ol long Tarsis long lusim pes bilong BIKPELA.

1:4  ¶ Tasol BIKPELA i salim wanpela bikpela win long biksi, na i gat wanpela strongpela bikwin nogut long biksi, inap long sip i laik bruk.

1:5  Nau ol boskru i pret, na olgeta wan wan man i singaut long god bilong em, na tromoi ol dispela kago i stap long sip i go long biksi, bilong mekim sip i no ken hevi long ol dispela. Tasol Jona i bin go daun insait long ol sait bilong sip. Na em i slip, na em i slip i dai olgeta.

1:6  Olsem na kepten bilong sip i kam long em, na i tokim em, Yu gat wanem tingting, O man bilong slip? Kirap, singaut long God bilong yu, sapos i stap olsem long God bai tingting long yumi, inap long yumi no ken dai olgeta.

1:7  Na olgeta wan wan i tokim poroman bilong em, Kam, na yumi tromoi satu, inap long yumi ken save long em i asua bilong husat na dispela samting nogut i stap antap long yumi. Olsem na ol i tromoi satu, na satu i makim Jona.

1:8  Nau ol i tokim em, Tokim mipela, mipela askim yu plis, long em i asua bilong husat na dispela samting nogut i stap antap long yumi? Wanem em i wok bilong yu? Na yu kam long we? Yu bilong wanem kantri? Na yu bilong wanem lain?

1:9  Na em i tokim ol olsem, Mi wanpela Hibru. Na mi save pret long BIKPELA, God bilong heven, husat i bin wokim biksi na graun i drai.

1:10  Nau ol man i pret nogut tru, na tokim em, Bilong wanem yu bin mekim dispela? Long wanem, ol man i save long em i ranawe long pes bilong BIKPELA, bilong wanem, em i bin tokim ol.

1:11  ¶ Nau ol i tokim em, Bai mipela mekim wanem long yu, inap long biksi i ken stap isi olgeta long mipela? Long wanem, biksi i pait, na bikwin nogut i kirapim si nogut tru.

1:12  Na em i tokim ol, Kisim mi antap, na tromoi mi i go long biksi. Olsem tasol bai biksi i stap isi olgeta long yupela. Long wanem, mi save long em i bilong tingim mi long dispela bikpela bikwin nogut i kamap long yupela.

1:13  Tasol ol man i pul strong bilong bringim sip i go long nambis. Tasol ol i no inap. Long wanem, biksi i pait, na bikwin nogut i kirapim si nogut tru i birua long ol.

1:14  Olsem na ol i singaut long BIKPELA, na tok, Mipela askim Yu long daun pasin, O BIKPELA, mipela askim Yu long daun pasin, Yu no ken larim mipela dai olgeta long laip bilong dispela man. Na Yu no ken putim antap long mipela blut i no bin mekim rong. Long wanem, Yu, O BIKPELA, i bin mekim olsem em i amamasim bel bilong Yu.

1:15  Olsem na ol i kisim Jona antap, na tromoi em i go long biksi. Na biksi i lusim pasin bilong em bilong kirap tru.

1:16  Nau ol man i pret nogut tru long BIKPELA, na ofaim wanpela sakrifais i go long BIKPELA, na wokim ol strongpela promis.

1:17  Nau BIKPELA i bin redim wanpela bikpela pis bilong daunim Jona. Na Jona i stap long bel bilong pis tripela de na tripela nait.

Chapter 2

2:1  ¶ Nau Jona i beten long BIKPELA, God bilong em, ausait long bel bilong pis,

2:2  Na tok, Mi krai long BIKPELA bikos taim bilong kisim hevi bilong mi i bikpela, na Em i harim mi. Ausait long bel bilong hel mi singaut, na Yu harim nek bilong mi.

2:3  Long wanem, Yu bin tromoi mi i go long ples dip, insait long namel bilong ol biksi. Na ol tait i raunim mi nabaut. Olgeta bikpela si bilong Yu na ol sibruk bilong Yu i kam antap long mi.

2:4  Nau mi tok, Yu bin tromoi mi pinis i go ausait long hap ai bilong Yu i lukim. Yet mi bai lukluk gen i go long tempel holi bilong Yu.

2:5  Ol wara i raunim mi nabaut, yes, inap long tewel. Ples dip i pasim mi raun nabaut, ol gras nogut i raunim nabaut het bilong mi.

2:6  Mi go daun long as tru bilong ol maunten. Dispela graun wantaim ol ba bilong em i raunim mi nabaut oltaim oltaim. Yet Yu bin bringim laip bilong mi i kam antap i lusim pasin bilong bagarap, O BIKPELA, God bilong mi.

2:7  Taim tewel bilong mi i hap i dai insait long mi, mi holim tingting long BIKPELA. Na prea bilong mi i go kamap long Yu, insait long tempel holi bilong Yu.

2:8  Ol lain husat i lukluk long ol giaman samting nating i givim baksait long sori bilong ol yet.

2:9  Tasol mi bai sakrifais i go long Yu wantaim nek bilong givim tok tenkyu. Mi bai bekim dispela samting mi bin mekim strongpela promis long en. Kisim bek em i bilong BIKPELA.

2:10  ¶ Na BIKPELA i tokim pis, na em i trautim Jona antap long graun i drai.

Chapter 3

3:1  ¶ Na tok bilong BIKPELA i kam long Jona namba tu taim, i spik,

3:2  Kirap, go long Niniva, dispela bikpela biktaun, na autim tok long en long dispela autim tok Mi tokim yu.

3:3  Olsem na Jona i kirap, na go long Niniva, bilong bihainim tok bilong BIKPELA. Nau Niniva em i wanpela bikpela biktaun tru bilong tripela de wokabaut.

3:4  Na Jona i stat long go insait long biktaun wanpela de wokabaut, na em i singaut, na tok, Yet 40 de, na Niniva bai bagarap.

3:5  ¶ Olsem na ol manmeri bilong Niniva i bilipim God, na autim toksave long wanpela taim bilong tambuim kaikai, na putim bek laplap, i stat long nambawan bikman bilong ol, yes, i go long las man bilong ol.

3:6  Long wanem, tok i kam long king bilong Niniva, na em i kirap long sia king bilong em, na em i rausim longpela saket bilong em long em, na karamapim em yet wantaim bek laplap, na sindaun long sit bilong paia

3:7  Na em i mekim ol man long autim toksave na mekim i kamap ples klia long Niniva long strongpela tokaut bilong king wantaim ol bikman bilong em, i spik, Na tu no ken larim man o animal, lain bulmakau o lain sipsip, i testim wanpela samting. No ken larim ol i kaikai, o dringim wara.

3:8  Tasol larim man na animal i karamap wantaim bek laplap, na krai strong long God. Yes, larim ol i tanim olgeta wan wan long lusim pasin nogut bilong em, na long dispela pasin pait i stap long ol han bilong ol.

3:9  Husat i ken save sapos God bai tanim na tanim bel, na tanim na lusim strongpela belhat bilong Em, inap long yumi no ken dai olgeta?

3:10  Na God i lukim ol wok bilong ol, long ol i tanim long pasin nogut bilong ol. Na God i tanim bel long samting nogut, dispela Em i bin tok long Em bai mekim long ol. Na Em i no mekim dispela.

Chapter 4

4:1  ¶ Tasol dispela i bagarapim amamas bilong Jona tru, na em i kros tru.

4:2  Na em i beten long BIKPELA, na tok, Mi askim Yu plis, O BIKPELA, ating i yes long dispela em i toktok bilong mi, taim mi stap yet long kantri bilong mi? Olsem na mi bin ranawe bipo i go long Tarsis. Long wanem, mi save pinis long Yu stap wanpela God bilong soim marimari, na Yu pulap long sori, Yu no save belhat hariap, na Yu gat bikpela gutpela pasin, na Yu save tanim bel bilong Yu long ol samting nogut.

4:3  Olsem na nau, O BIKPELA, kisim, mi askim Yu long daun pasin, laip bilong mi i lusim mi. Long wanem, em i gutpela moa long mi dai long mi stap laip.

4:4  Nau BIKPELA i tok, Ating yu mekim gutpela taim yu stap kros?

4:5  ¶ Olsem na Jona i go ausait long biktaun, na sindaun long is sait bilong biktaun, na long dispela hap em i wokim wanpela haus win bilong em, na sindaun aninit long en long tewel bilong san, inap long em i ken luksave long wanem samting bai kamap long dispela biktaun.

4:6  Na God BIKPELA i redim wanpela rop kambang, na mekim dispela long kam antap long Jona, inap long em i ken stap wanpela tewel bilong san antap long het bilong em, bilong kisim bek em gen long bel sori bilong em. Olsem na Jona i amamas tru long dispela rop kambang.

4:7  Tasol God i redim wanpela liklik snek long taim moning i kirap long de bihain, na em i paitim rop kambang inap long em i go drai.

4:8  Na em i kamap olsem, taim san i bin kamap, long God i redim wanpela is win i strong nogut tru. Na san i paitim strong het bilong Jona, inap long em i hap i dai, na em i gat laik long em yet i ken dai, na em i tok, Em i gutpela moa long mi dai long mi stap laip.

4:9  Na God i tokim Jona, Ating yu mekim gutpela samting taim yu kros long rop kambang? Na em i tok, Mi mekim gutpela samting taim mi kros, yes, inap long dai.

4:10  Nau BIKPELA i tok, Yu bin sori long dispela rop kambang, long dispela yu no bin hatwok long en, na tu yu no bin mekim dispela long kamap bikpela. Dispela i kamap long wanpela nait, na dai olgeta long wanpela nait.

4:11  Na ating i yes long i gutpela long Mi soim sori long Niniva, dispela bikpela biktaun we insait long en i gat moa long 120,000 manmeri husat i no inap long klia tru namel long han sut bilong ol na han kais bilong ol, na tu planti bulmakau samting i stap?