UrduGeoRoman - Jonah

Chapter 1

1:1  Rab Yūnus bin Amittī se hamkalām huā,

1:2  “Baṛe shahr Nīnwā jā kar us par merī adālat kā elān kar, kyoṅki un kī burāī mere huzūr tak pahuṅch gaī hai.”

1:3  Yūnus rawānā huā, lekin mashriqī shahr Nīnwā ke lie nahīṅ balki maġhribī shahr Tarsīs ke lie. Rab ke huzūr se farār hone ke lie wuh Yāfā Shahr pahuṅch gayā jahāṅ ek bahrī jahāz Tarsīs ko jāne wālā thā. Safr kā kirāyā adā karke Yūnus jahāz meṅ baiṭh gayā tāki Rab ke huzūr se bhāg nikle.

1:4  Lekin Rab ne samundar par zabardast āṅdhī bhejī. Tūfān itnā shadīd thā ki jahāz ke ṭukṛe ṭukṛe hone kā ḳhatrā thā.

1:5  Mallāh saham gae. Aur har ek chīḳhtā-chillātā apne dewatā se iltijā karne lagā. Jahāz ko halkā karne ke lie unhoṅ ne sāmān ko samundar meṅ phaiṅk diyā. Lekin Yūnus jahāz ke nichle hisse meṅ leṭ gayā thā. Ab wuh gahrī nīnd so rahā thā.

1:6  Phir kaptān us ke pās āyā aur kahne lagā, “Āp kis tarah so sakte haiṅ? Uṭheṅ, apne dewatā se iltijā kareṅ! Shāyad wuh ham par dhyān de aur ham halāk na hoṅ.”

1:7  Mallāh āpas meṅ kahne lage, “Āo, ham qurā ḍāl kar mālūm kareṅ ki kaun hamārī musībat kā bāis hai.” Unhoṅ ne qurā ḍālā to Yūnus kā nām niklā.

1:8  Tab unhoṅ ne us se pūchhā, “Hameṅ batāeṅ ki yih āfat kis ke qusūr ke bāis ham par nāzil huī hai? Āp kyā karte haiṅ, kahāṅ se āe haiṅ, kis mulk aur kis qaum se haiṅ?”

1:9  Yūnus ne jawāb diyā, “Maiṅ Ibrānī hūṅ, aur Rab kā parastār hūṅ jo āsmān kā Ḳhudā hai. Samundar aur ḳhushkī donoṅ usī ne banāe haiṅ.”

1:10  Yūnus ne unheṅ yih bhī batāyā ki maiṅ Rab ke huzūr se farār ho rahā hūṅ. Yih sab kuchh sun kar dīgar musāfiroṅ par shadīd dahshat tārī huī. Unhoṅ ne kahā, “Yih āp ne kyā kiyā hai?”

1:11  Itne meṅ samundar mazīd mutalātim hotā jā rahā thā. Chunāṅche unhoṅ ne pūchhā, “Ab ham āp ke sāth kyā kareṅ tāki samundar tham jāe aur hamārā pīchhā chhoṛ de?”

1:12  Yūnus ne jawāb diyā, “Mujhe uṭhā kar samundar meṅ phaiṅk deṅ to wuh tham jāegā. Kyoṅki maiṅ jāntā hūṅ ki yih baṛā tūfān merī hī wajah se āp par ṭūṭ paṛā hai.”

1:13  Pahle mallāhoṅ ne us kā mashwarā na mānā balki chappū mār mār kar sāhil par pahuṅchne kī sirtoṛ koshish karte rahe. Lekin befāydā, samundar pahle kī nisbat kahīṅ zyādā mutalātim ho gayā.

1:14  Tab wuh buland āwāz se Rab se iltijā karne lage, “Ai Rab, aisā na ho ki ham is ādmī kī zindagī ke sabab se halāk ho jāeṅ. Aur jab ham use samundar meṅ phaiṅkeṅge to hameṅ begunāh ādmī kī jān lene ke zimmedār na ṭhahrā. Kyoṅki jo kuchh ho rahā hai wuh terī hī marzī se ho rahā hai.”

1:15  Yih kah kar unhoṅ ne Yūnus ko uṭhā kar samundar meṅ phaiṅk diyā. Pānī meṅ girte hī samundar ṭhāṭheṅ mārne se bāz ā kar tham gayā.

1:16  Yih dekh kar musāfiroṅ par saḳht dahshat chhā gaī, aur unhoṅ ne Rab ko zabah kī qurbānī pesh kī aur mannateṅ mānīṅ.

1:17  Lekin Rab ne ek baṛī machhlī ko Yūnus ke pās bhejā jis ne use nigal liyā. Yūnus tīn din aur tīn rāt machhlī ke peṭ meṅ rahā.

Chapter 2

2:1  Machhlī ke peṭ meṅ Yūnus ne Rab apne Ḳhudā se zail kī duā kī,

2:2  “Maiṅ ne baṛī musībat meṅ ā kar Rab se iltijā kī, aur us ne mujhe jawāb diyā. Maiṅ ne Pātāl kī gahrāiyoṅ se chīḳh kar fariyād kī to tū ne merī sunī.

2:3  Tū ne mujhe gahre pānī balki samundar ke bīch meṅ hī phaiṅk diyā. Pānī ke zordār bahāw ne mujhe gher liyā, terī tamām lahreṅ aur maujeṅ mujh par se guzar gaīṅ.

2:4  Tab maiṅ bolā, ‘Mujhe tere huzūr se ḳhārij kar diyā gayā hai, lekin maiṅ tere muqaddas ghar kī taraf taktā rahūṅgā.’

2:5  Pānī mere gale tak pahuṅch gayā, samundar kī gahrāiyoṅ ne mujhe chhupā liyā. Mere sar se samundarī paude lipaṭ gae.

2:6  Pānī meṅ utarte utarte maiṅ pahāṛoṅ kī buniyādoṅ tak pahuṅch gayā. Maiṅ zamīn meṅ dhaṅs kar ek aise mulk meṅ ā gayā jis ke darwāze hameshā ke lie mere pīchhe band ho gae. Lekin ai Rab, mere Ḳhudā, tū hī merī jān ko gaṛhe se nikāl lāyā!

2:7  Jab merī jān nikalne lagī to tū, ai Rab mujhe yād āyā, aur merī duā tere muqaddas ghar meṅ tere huzūr pahuṅchī.

2:8  Jo butoṅ kī pūjā karte haiṅ unhoṅ ne Allāh se wafādār rahne kā wādā toṛ diyā hai.

2:9  Lekin maiṅ shukrguzārī ke gīt gāte hue tujhe qurbānī pesh karūṅga. Jo mannat maiṅ ne mānī use pūrā karūṅga. Rab hī najāt detā hai.”

2:10  Tab Rab ne machhlī ko hukm diyā ki wuh Yūnus ko ḳhushkī par ugal de.

Chapter 3

3:1  Rab ek bār phir Yūnus se hamkalām huā,

3:2  “Baṛe shahr Nīnwā jā kar use wuh paiġhām sunā de jo maiṅ tujhe dūṅgā.”

3:3  Is martabā Yūnus Rab kī sun kar Nīnwā ke lie rawānā huā. Rab ke nazdīk Nīnwā aham shahr thā. Us meṅ se guzarne ke lie tīn din darkār the.

3:4  Pahle din Yūnus shahr meṅ dāḳhil huā aur chalte chalte logoṅ ko paiġhām sunāne lagā, “Ain 40 din ke bād Nīnwā tabāh ho jāegā.”

3:5  Yih sun kar Nīnwā ke bāshinde Allāh par īmān lāe. Unhoṅ ne roze kā elān kiyā, aur chhoṭe se le kar baṛe tak sab ṭāṭ oṛh kar mātam karne lage.

3:6  Jab Yūnus kā paiġhām Nīnwā ke bādshāh tak pahuṅchā to us ne taḳht par se utar kar apne shāhī kapṛoṅ ko utār diyā aur ṭāṭ oṛh kar ḳhāk meṅ baiṭh gayā.

3:7  Us ne shahr meṅ elān kiyā, “Bādshāh aur us ke shurafā kā farmān suno! Kisī ko bhī khāne yā pīne kī ijāzat nahīṅ. Gāy-bail aur bheṛ-bakriyoṅ samet tamām jānwar bhī is meṅ shāmil haiṅ. Na unheṅ charne do, na pānī pīne do.

3:8  Lāzim hai ki sab log jānwaroṅ samet ṭāṭ oṛh leṅ. Har ek pūre zor se Allāh se iltijā kare, har ek apnī burī rāhoṅ aur apne zulm-o-tashaddud se bāz āe.

3:9  Kyā mālūm, shāyad Allāh pachhtāe. Shāyad us kā shadīd ġhazab ṭal jāe aur ham halāk na hoṅ.”

3:10  Jab Allāh ne un kā yih rawaiyā dekhā, ki wuh wāqaī apnī burī rāhoṅ se bāz āe to wuh pachhtāyā aur un par wuh āfat na lāyā jis kā elān us ne kiyā thā.

Chapter 4

4:1  Yih bāt Yūnus ko nihāyat burī lagī, aur wuh ġhusse huā.

4:2  Us ne Rab se duā kī, “Ai Rab, kyā yih wuhī bāt nahīṅ jo maiṅ ne us waqt kī jab abhī apne watan meṅ thā? Isī lie maiṅ itnī tezī se bhāg kar Tarsīs ke lie rawānā huā thā. Maiṅ jāntā thā ki tū mehrbān aur rahīm Ḳhudā hai. Tū tahammul aur shafqat se bharpūr hai aur jald hī sazā dene se pachhtātā hai.

4:3  Ai Rab, ab mujhe jān se mār de! Jīne se behtar yihī hai ki maiṅ kūch kar jāūṅ.”

4:4  Lekin Rab ne jawāb diyā, “Kyā tū ġhusse hone meṅ haq bajānib hai?”

4:5  Yūnus shahr se nikal kar us ke mashriq meṅ ruk gayā. Wahāṅ wuh apne lie jhoṅpṛī banā kar us ke sāy meṅ baiṭh gayā. Kyoṅki wuh deḳhnā chāhtā thā ki shahr ke sāth kyā kuchh ho jāegā.

4:6  Tab Rab Ḳhudā ne ek bel ko phūṭne diyā jo baṛhte baṛhte Yūnus ke ūpar phail gaī tāki sāyā de kar us kī nārāzī dūr kare. Yih dekh kar Yūnus bahut ḳhush huā.

4:7  Lekin agle din jab pau phaṭne lagī to Allāh ne ek kīṛā bhejā jis ne bel par hamlā kiyā. Bel jald hī murjhā gaī.

4:8  Jab sūraj tulū huā to Allāh ne mashriq se jhulastī lū bhejī. Dhūp itnī shadīd thī ki Yūnus ġhash khāne lagā. Āḳhirkār wuh marnā hī chāhtā thā. Wuh bolā, “Jīne se behtar yihī hai ki maiṅ kūch kar jāūṅ.”

4:9  Tab Allāh ne us se pūchhā, “Kyā tū bel ke sabab se ġhusse hone meṅ haq bajānib hai?” Yūnus ne jawāb diyā, “Jī hāṅ, maiṅ marne tak ġhusse hūṅ, aur is meṅ maiṅ haq bajānib bhī hūṅ.”

4:10  Rab ne jawāb diyā, “Tū is bel par ġham khātā hai, hālāṅki tū ne us ke phalne-phūlne ke lie ek unglī bhī nahīṅ hilāī. Yih bel ek rāt meṅ paidā huī aur aglī rāt ḳhatm huī

4:11  jabki Nīnwā bahut baṛā shahr hai, us meṅ 1,20,000 afrād aur muta'addid jānwar baste haiṅ. Aur yih log itne jāhil haiṅ ki apne dāeṅ aur bāeṅ hāth meṅ imtiyāz nahīṅ kar pāte. Kyā mujhe is baṛe shahr par ġham nahīṅ khānā chāhie.?”