UyCyr - Joshua - 22

22:1  Йошува Рубен, Гад вә Манассә қәбилисиниң шәрқий йеримидики қәбилиләрни чақирип ,

22:2  уларға: — Силәр Пәрвәрдигарниң хизмәткари Муса пәйғәмбәр силәргә буйруған ишларниң һәммисини қилдиңлар, шундақла мениң буйруқлиримғиму бойсундуңлар.

22:3  Шунчә узақ вақитлардин бери таки бүгүнки күнгичә, силәр бу исраил қәбилилиридики қериндашлириңларни ташлавәтмидиңлар. Пәрвәрдигариңлар Худаниң әмирлиригә изчил бойсунуп кәлдиңлар.

22:4  Һазир Пәрвәрдигариңлар Худа Өз вәдиси бойичә силәргә аманлиқ бәрди. Силәр әнди Иордан дәриясиниң шәрқий тәрипидики Пәрвәрдигарниң хизмәткари Муса пәйғәмбәр силәргә тәхсим қилип бәргән зиминлардики жутуңларға қайтиңлар.

22:5  Муса пәйғәмбәрниң барлиқ көрсәтмиси вә буйруқлириға чоқум яхши әмәл қилиңлар! Пәрвәрдигариңлар Худани сөйүңлар, Униң көрсәткән йолида меңиңлар, әмирлиригә бойсунуңлар, Униңға садиқ болуңлар, чин қәлбиңлар вә пүтүн вуҗудуңлар билән хизмәт қилиңлар! — деди.

22:6  Кейин Йошува уларға бәхит тиләп, узитип қойди. Һәммиси өз жутлириға қайтишти.

22:7  Муса пәйғәмбәр Манассәниң шәрқий йерим қәбилисигә Иордан дәриясиниң шәрқий тәрипидики Башан зиминини тәхсим қилип бәргән еди (уларниң қалған йерим қәбилисигә Иордан дәриясиниң ғәрбидин зимин тәхсим қилип берилгән). Йошува уларғиму бәхит тиләп өз жутлириға узитип қойди.

22:8  Йошува уларға: — Дүшмәнлириңлардин олҗа алған мал-чарва, алтун-күмүч, мис, төмүр вә кийим-кечәк қатарлиқ байлиқларни елип, уруқ-туққанлириңлар билән ортақ бөлүшүңлар, — деди.

22:9  Шуниң билән Рубен, Гад вә Манассә қәбилисиниң шәрқий йеримидики қәбилиләр Қанан зимининиң Шило шәһиридә қалған исраил қәбилилиридин айрилди. Улар Гилъадтики өзигә тәвә болған зиминға қарап йол алди. Бу зиминларни Пәрвәрдигар уларға Муса пәйғәмбәр арқилиқ буйруп бәргән еди.

22:10  Рубен, Гад вә Манассәниң шәрқий йеримидики қәбилиләр Қанан зиминидин чиқмай туруп, Иордан дәриясиниң бойиға кәлгәндә, у йәрдә интайин һәйвәтлик бир қурванлиқ суписи ясиди.

22:11  Исраилларниң қалған қәбилилиригә Рубен, Гад вә Манассә қәбилисиниң шәрқий йеримидики қәбилиләрниң Қанан зимининиң чегарисидики Иордан дәриясиниң ғәрбидики Гилилотта бир қурванлиқ суписи ясиғанлиқ хәвири йетип кәлди.

22:12  Улар буни аңлиғандин кейин, уларниң барлиқ адәмлири Шилоға жиғилип, Рубен, Гад вә Манассәниң шәрқий йеримидики қәбилиләр билән уруш қилмақчи болушти.

22:13  Амма улар Әлъазарниң оғли роһаний Пинихасни Гилъад зиминидики Рубен, Гад вә Манассәниң шәрқий йеримидики қәбилиләргә әвәтти,

22:14  йәни исраилларниң һәрқайси қәбилилири өз җамаәтлиридин бирдин ақсақални таллап, җәми он адәм униң билән биллә барди.

22:15  Улар Гилъад зиминиға йетип барғандин кейин Рубен, Гад вә Манассәниң шәрқий йеримидики қәбилиләр билән көрүшүп, уларға мундақ деди:

22:16  — Биз, йәни Пәрвәрдигарниң җамаити силәрниң немә үчүн исраиллар етиқат қилип кәлгән Худаға вапасизлиқ қилғанлиғиңларни билмәкчи болуп кәлдуқ. Силәр немә үчүн Пәрвәрдигардин йүз өрүп, Униңға қарши һалда өзәңларға бир қурванлиқ суписи ясидиңлар?

22:17  Әҗдатлиримизниң Пиорда Пәрвәрдигарға вапасизлиқ қилип өткүзгән еғир гунайини унтуп қалдиңларму? Улар Пәрвәрдигарниң Өз хәлқи болсиму, Пәрвәрдигар йәнила уларни жуқумлуқ кесәл билән җазалиған еди, биз бу гунадин техичә пакланғинимиз йоқ!

22:18  Бүгүн силәр Пәрвәрдигарниң йолида меңиштин йүз өрүдүңлар. Силәр Пәрвәрдигарға вапасизлиқ қилсаңлар, әтә Пәрвәрдигар һәммимизгә ғәзивини яғдуриду.

22:19  Әгәр силәр зиминиңларни ибадәт қилиш үчүн напак дәп ойлисаңлар, ундақта бизниң зиминимизға келиңлар. Бизниң йеримизгә Пәрвәрдигарниң ибадәт чедири тикилгән, уни силәр билән тәң ортақлишайли. Амма Пәрвәрдигаримиз Худаниң қурванлиқ суписидин башқа йәнә бир қурванлиқ суписи ясаштәк вапасизлиқ қилмишиңлар билән Пәрвәрдигарға вә бизгә қарши чиқмаңлар.

22:20  Зәрах җамаитидин болған Акан Пәрвәрдигарға аталған нәрсини оғрилап гуна қилғанлиғи үчүн, Пәрвәрдигарниң ғәзиви барлиқ исраил хәлқигә яғмидиму? Әшу бир адәмниң гунайи үчүн нурғун адәм өлүп кәттиғу?

22:21  Рубен, Гад вә Манассәниң шәрқий йеримидики қәбилиләр исраилларниң бу ақсақаллириға мундақ дәп җавап беришти:

22:22  — Һәммигә қадир Пәрвәрдигар Худа, һәммигә қадир Пәрвәрдигар Худа! У Өзи билиду! Пүткүл исраил хәлқи билсун! Биз қурванлиқ суписини Пәрвәрдигарға қарши чиқиш яки Униңға бойсунмаслиқ үчүн ясимидуқ. Әгәр биз шундақ хиялда ясиған болсақ, бизгә рәһим қилмаңлар!

22:23  Әгәр биз Пәрвәрдигардин йүз өрүш мәхситидә яки көйдүрмә қурванлиғи, ашлиқ һәдийәси вә аманлиқ қурванлиғи қилиш үчүн қурванлиқ суписи ясиған болсақ, Пәрвәрдигар бизни җазалисун.

22:24  Бу қурванлиқ суписини ясаштики мәхситимиз, кәлгүсидә силәрниң әвлатлириңлар бизниң әвлатлиримизға: «Пәрвәрдигаримиз — исраиллар етиқат қилип кәлгән Худа билән немә мунасивитиңлар бар?

22:25  Пәрвәрдигар Иордан дәриясини биз билән силәрниң, йәни Рубен билән Гад қәбилисиниң чегариси қилған. Силәрниң бизниң Пәрвәрдигаримизға ибадәт қилидиған һечқандақ һоқуқуңлар йоқ», дәп бизниң әвлатлиримизни Пәрвәрдигарға ибадәт қилиштин тосап қоюшидин қорқтуқ.

22:26  Шуниң үчүн биз бу қурванлиқ суписини ясашни қарар қилдуқ. Буни ясаштики мәхсәт, қурванлиқ яки көйдүрмә қурванлиқ үчүн әмәс,

22:27  бәлки дәлил-испат үчүндур. Йәни бу силәр билән бизниң аримизда, шундақла бизләрниң әвлатлиримиз арисида муқәддәс чедирда Пәрвәрдигарға өзимизниң көйдүрмә қурванлиғи, аманлиқ қурванлиғи вә башқа қурванлиқларни қилиш билән Пәрвәрдигарға ибадәт қилиш һоқуқимизниң барлиғини испатлаш үчүндур. Шундақ болғанда, силәрниң әвладиңлар бизниң әвладимизни «Пәрвәрдигарға ибадәт қилиш һоқуқуңлар йоқ», дәп тосап қоялмайду.

22:28  Әгәр силәрниң әвлатлириңлар шундақ десә, бизниң әвлатлиримиз: «Әҗдатлиримиз Пәрвәрдигарниң қурванлиқ суписиға опму-охшаш қилип ясиған Пәрвәрдигарға қурванлиқ қилиш суписиға қараңлар. Бу көйдүрмә қурванлиқ яки башқа қурванлиқлар үчүн әмәс, бәлки бу бизниңму Пәрвәрдигарға мәнсүп екәнлигимизниң дәлил-испати үчүндур», дәйду.

22:29  Биз һәргиз Пәрвәрдигардин йүз өрүп вапасизлиқ қилмаймиз. Пәрвәрдигаримизниң ибадәт чедири алдидики қурванлиқ суписидин башқа, һәрқандақ бир қурванлиқ суписида көйдүрмә қурванлиқ, ашлиқ һәдийәси яки башқа қурванлиқларни қилмаймиз.

22:30  Роһаний Пинихас вә униң билән биллә кәлгән исраилларниң қәбилә ақсақаллири, йәни һәрқайси қәбилиләрниң өз җамаәтлириниң ақсақаллири Рубен, Гад вә Манассә қәбилисиниң шәрқий йеримидики қәбилиләрдин бу гәпни аңлиғандин кейин қайил болушти.

22:31  Әлъазарниң оғли роһаний Пинихас уларға мундақ җавап бәрди: — Биз бүгүн Пәрвәрдигарниң биз билән биллә екәнлигини билдуқ. Чүнки силәр Пәрвәрдигарға садақәтсизлик қилмидиңлар, йәни силәр исраилларни Пәрвәрдигарниң гумран қилишидин сақлап қалдиңлар.

22:32  Әлъазарниң оғли роһаний Пинихас вә башқа ақсақаллар Гилъадтики Рубен вә Гад қәбилилиридин айрилип, Қанан зиминиға қайтип келип, у йәрдики исраилларға болған ишларни сөзләп бәрди.

22:33  Исраиллар буни аңлиғандин кейин хатирҗәм болушти вә Худаға мәдһийә ейтишти. Улар Рубен вә Гад қәбилилири билән урушуп, уларниң зиминлирини вәйран қилишни қайта еғизға алмиди.

22:34  Рубен вә Гад қәбилилири қурванлиқ суписиниң намини «Гувалиқ суписи» дәп атап, улар бу супини «һәммимизниң әшу бирдин бир Пәрвәрдигари болған Худаға ибадәт қилидиғанлиғимизниң гувачисидур» дейишти.