Kapingamarangi - Matthew - 9

9:1  Jesus ne-gaga gi-hongo di boodi, gaa-hana gi-baahi i-golo di tai gi dono guongo-donu.

9:2  Gei nia daangada ga-laha-mai di-nadau dangada made dono huaidina dela e-moe i-hongo dono hada. Jesus e-iloo hua nia hagadonu digau aanei, ga-helekai gi tangada magi, “Dagu dama-daane, hagadagadagagee, o huaidu la-gu-maahede.”

9:3  Hunu gau haga-donudonu haganoho ga-helehelekai i nadau mehanga, “Taane deenei le e-haga-balumee a God.”

9:4  Jesus gu-iloo hua nia hagamaanadu digaula, ga-helekai, “Goodou e-aha ala e-maanadu huaidu?

9:5  Dehee di mee e-haingoohia, e-helekai boloo, ‘O huaidu la-gu-maahede,’ be e-helekai boloo, ‘Duu-i-nua, haele’?

9:6  Au ga-haga-modongoohia-adu gi goodou bolo Tama-Tangada iai ono mogobuna e-wwede nia huaidu i henuailala.” Gei mee ga-helekai gi taane made dono huaidina, “Duu-i-nua, dahi-aga-ina do moenge, hana gi doo hale.”

9:7  Taane magi deelaa ga-duu-i-nua, gaa-hana gi dono hale.

9:8  Digau dogologo gu-gidee di mee deenei, gu-mmaadagu huoloo, gu-hagaamu a God i-ana helekai mogobuna ala ne-wanga gi-nia daangada.

9:9  Jesus ga-hagatanga i-di gowaa deelaa, ga-gidee-Ia tangada hagabudu dagitedi, go Matthew, e-noho i-lodo dono oobidi. Jesus ga-helekai, “Daudali-mai Au.” Matthew gaa-duu gi-nua, ga-daudali Jesus.

9:10  Di madagoaa Jesus nogo noho miami i-di hale o Matthew, gei digau hagabudu dagitedi dogologo, mo digau huaidu gaa-noho-adu dalia a Jesus mo ana dama-agoago gi teebele deelaa.

9:11  Hunu Pharisee ga-gidee di hai deenei, ga-heheeu ang-gi nia dama-agoago a-Maa, “Di-godou Dangada Agoago e-aha dela e-miami dalia digau hagabudu dagitedi mo digau huaidu?”

9:12  Jesus ga-longono digaula, ga-helekai, “Ma hagalee go digau maaloo e-heetugi gi togidaa, go digau hua ala e-magi.

9:13  Goodou halahala-ina tadinga o-nia helekai di Beebaa-Dabu ala e-helekai boloo, ‘Au hagalee hiihai gi-nia tigidaumaha ala ne-hai gi-nia manu, gei go tumaalia hua.’ Au hagalee ne-hanimoi belee gahigahi digau humalia, gei go digau ala e-huaidu.”

9:14  Nia dama-agoago a John Babdais ga-lloomoi gi Jesus, ga-heeu, “Ma e-aha gimaadou mono Pharisee e-hagaonge, gei au dama-agoago hagalee-loo e-hagaonge?”

9:15  Jesus ga-helekai, “Goodou bolo nia daangada ala ne-gahi gi tagamiami haga-hai-lodo, la-gii-noho lodo-huaidu i-di madagoaa taane hai-lodo e-noho i nadau baahi? Deeai! Di laangi ga-dau-mai, gei taane hai-lodo la-gaa-lahi gi-daha mo digaula, deelaa di madagoaa digaula gaa-noho-laa hagaonge.

9:16  “Tangada e-pono dana gahu bobo gi-di mee gahu hoou ai, idimaa, di mee gahu hoou la-ga-mmuni-mai, ga-haga-damana di bongoo di gahu.

9:17  “Gei tangada e-haga-hau ana waini hoou gi-lodo di mee dugu-waini bobo ai. Ma-gaa-hai beenei, di mee-dugu-waini la-ga-mahaa, nia waini la-ga-maalingi, gei di mee-dugu-waini la-ga-mooho. Tangada le e-haga-hau-hua ana waini hoou gi-lodo di mee-dugu-waini hoou, gei nia maa huogodoo la-ga-benebene hagahumalia.”

9:18  Di madagoaa-hua Jesus nogo helehelekai gi digaula i-nia mee aanei, gei tangada aamua o Jew ga-hanimoi gi Mee, ga-dogoduli, ga-helekai, “Meenei, dagu dama-ahina dela-hua dogo made. Hanimoi, e-dugu oo lima gi-hongo o mee, gei mee ga-mouli.”

9:19  Gei Jesus ga-duu-aga, gaa-hana dalia a-mee mo ana dama-agoago.

9:20  Di ahina magi halihali dodo i-nia ngadau e-madangaholu maa-lua ga-hanimoi laa-tua o Jesus, gaa-bili gi taalinga di gahu o-Maa.

9:21  Mee ga-daalo ang-gi ono lodo boloo, “Koau hua gii-bili gi-di gahu o-Maa, gei au guu-hili.”

9:22  Jesus gaa-huli gi-muli, ga-gidee-Ia di ahina, ga-helekai, “Dagu dama-ahina, hagadagadagagee. Do hagadonu deelaa ne-hagahili doo magi.” Digi duai-hua, gei di magi o-maa guu-hili.

9:23  Jesus gaa-hana gi-lodo di hale tangada aamua. Dono gidee-Ia hua digau hai-daahili mo digau dogologo ala e-hagalongoaa i-di gowaa deelaa,

9:24  ge-Ia ga-helekai, “Goodou huogodoo ulu gi-daha. Tama-ahina le e-kii, mee digi made!” Digau huogodoo gu-gadagada haga-balumee a-Mee.

9:25  I-muli-hua digaula ne-ulu gi-daha, Jesus ga-ulu gi-lodo di ruum tama-ahina, ga-dahi-aga di lima o-maa, gei tama-ahina ga-duu-i-nua.

9:26  Malaa, di longo deenei la-guu-dele gi-nia guongo huogodoo o tenua.

9:27  Jesus ne-hagatanga i-di gowaa deelaa, gei nia daane deegida dogolua ga-daudali a-Mee, ga-wwolowwolo gi-nua boloo, “Meenei, tama-daane a David, hila-mai gi gimaua.”

9:28  Jesus ga-ulu-adu gi-lodo di hale, gei meemaa ga-lloo-adu gi Mee, gei Mee ga-heeu, “Goolua e-hagadonu bolo Au e-mee di-hagahili gulu magi?” Meemaa ga-helekai, “Uaa, meenei Tagi.”

9:29  Jesus gaa-bili gi-nia golomada meemaa, ga-helekai, “Gi-heia adu gi goolua gii-hai be di-gulu hagadonu.”

9:30  Nia golomada o meemaa gu-aala, gei Jesus ga-helekai, “Hudee hagi-anga-ina di mee deenei gi dahi dangada.”

9:31  Gei meemaa gaa-hula-hua, ga-hagadele di longo o Jesus gi-nia guongo huogodoo o tenua deelaa.

9:32  Di madagoaa meemaa ne-hula, gei nia daangada ga-laha-mai gi Jesus taane e-de-leelee, idimaa, di hagataalunga huaidu gu-i dono baahi.

9:33  Di madagoaa-hua di hagataalunga huaidu ne-hagabagi gi-daha, gei mee gu-leelee. Digau huogodoo gu-goboina, ga-helekai, “Di mee beenei ne-gidee-gidaadou i Israel ai!”

9:34  Gei nia Pharisee ga-helekai, “Di tagi o-nia hagataalunga huaidu dela ne-wanga gi Mee di mogobuna e-hagabagi nia hagataalunga huaidu i-baahi nia daangada.”

9:35  Jesus ga-hagadau i-baahi nia guongo mono waahale huogodoo, ga-agoago i-lodo nia synagogee, e-hagadele di Longo-Humalia Teenua King o God, gei e-hagahili nia hagadilinga magi huogodoo.

9:36  Dono gidee digau dogologowaahee, ge-Ia gu-aloho huoloo i digaula, idimaa, digaula e-de-nnoomaalia, tangada e-benebene ginaadou ai. Digaula guu-hai be nia siibi, deai nadau hagaloohi ai.

9:37  Deenei dana mee ne-hagi ang-gi ana dama-agoago, “E-donu bolo taugai e-damanaiee, gei digau ngalua le e-hogoohi.

9:38  Goodou hai dangidangi ang-gi tagi o taugai gi-hagau-ina-mai ana gau ngalua e-ngalua gi taugai.”