NorthernAzeri - Proverbs - 14

14:1  Hikmətli qadın evini qurar, Səfeh qadın onu öz əli ilə uçurar.

14:2  Düz yol tutan Rəbdən qorxar, Yolunu azan Ona xor baxar.

14:3  Səfeh lovğa sözlərinə görə kötək qazanar, Hikmətlinin dili onu qoruyar.

14:4  Öküz olmayan yerdə axur təmiz olar, Amma bol məhsul öküzün gücü ilə yaranar.

14:5  Doğru şahid yalan deməz, Yalançı şahid yalandan üzə durar.

14:6  Rişxəndçi hikmət axtaranda onu tapmaz, Dərrakəli adama bilik tapmaq asan olar.

14:7  Axmağın qarşısından çəkil, Onun dilində ağıllı söz tapmazsan.

14:8  Uzaqgörən hikməti ilə öz yolunu anlar, Axmaq səfehliyi ilə öz-özünü aldadar.

14:9  Səfehlər günaha rişxənd edər, Əməlisalehlər bir-birini məmnun edər.

14:10  Ürək öz dərdini bilər, Özgələr onun sevincinə şərik olmaz.

14:11  Şərin evi tar-mar olar, Əməlisalehlərin yurdu çiçək açar.

14:12  Yol var ki, insanın qarşısında düz görünür, Amma sonu ölümdür.

14:13  Ürək güləndə də qəmli olar, Sevincin sonunda da kədər var.

14:14  Azğın ürəklilər öz yollarının bəhrəsini doyunca yeyir, Yaxşı adam isə əməlinin əvəzini alır.

14:15  Cahil hər sözə inanar, Uzaqgörən hər addımına nəzər salar.

14:16  Hikmətli qorxub pislikdən dönər, Axmaq ehtiyatsızdır, özünə güvənər.

14:17  Hövsələsiz səfeh-səfeh iş görər, Pisniyyət adama nifrət edilər.

14:18  Cahil səfehliyi irs alar, Uzaqgörənin başına bilik tacı qoyular.

14:19  Pislər yaxşıların qarşısında, Şər adam isə salehin qapısında əyilər.

14:20  Yoxsula qonşusu da nifrət edər, Zəngini isə çox adam sevər.

14:21  Qonşusuna xor baxan günaha batar, Məzluma səxavət göstərən nə bəxtiyardır!

14:22  Şər quranlar yolundan azmırlarmı? Məqsədi xeyirxahlıq olan xeyirxahlığa, sədaqətə çatar.

14:23  Hər zəhmətdə bir fayda var, Boş sözlər insanı ehtiyac içində qoyar.

14:24  Hikmətlinin başına sərvət tacı qoyular, Axmaqlar səfehliyi ilə tanınar.

14:25  Doğru şahid canları qurtarar, Yalançı şahid hiylə qurar.

14:26  Rəbdən qorxan tam arxayındır, Çünki Rəbb onun övladlarının pənahıdır.

14:27  Rəbb qorxusu həyat qaynağıdır, İnsanı ölüm tələsinə düşməkdən geri qaytarır.

14:28  Padşahın əzəməti xalqın çoxluğu ilə bilinər, Əgər təbəələri olmasa, hökmdar süqut edər.

14:29  Gec qəzəblənənin böyük dərrakəsi var, Hövsələsizlərdən səfehlik çıxar.

14:30  Ürəyin rahatlığı cana həyat verər, Paxıllıqsa sümükləri çürüdər.

14:31  Kasıba zülm edən Yaradanına xor baxar, Yoxsula lütf göstərən Ona hörmət edər.

14:32  Şər adam pisliyi üzündən qovular, Salehin ölümündə belə, pənahı var.

14:33  Hikmət dərrakəlinin qəlbində özünə rahat yuva qurar, Hətta axmaqların arasında da bəlli olar.

14:34  Salehlik bir milləti ucaldar, Günah ümmətləri utandırar.

14:35  Padşah ağıllı qulundan razı qalar, Adbatıransa onun qəzəbinə düçar olar.