CSlElizabeth - Sirach - 29

29:1  Творяй милость взаим даст искреннему, и укрепляяй руку свою соблюдает заповеди.

29:2  Даждь взаим искреннему во время требования его и паки воздаждь искреннему во время:

29:3  утверди слово и уверися с ним, и во всяко время обрящеши потребу твою.

29:4  Мнози яко обретение возмнеша заимование и задаша труд помощником их:

29:5  дондеже возмет, облобызает руце его и на имение искренняго смирит глас:

29:6  и во время воздаяния провлечет время, и воздаст словеса уныния, и время обвинит.

29:7  Аще же возможет воздати, едва половину принесет и вменит е яко обретение:

29:8  аще же ни, лиши его имений своих и стяжа его врага туне:

29:9  клятвы и укоризны воздаст ему и вместо славы воздаст ему безчестие.

29:10  Мнози убо за лукавство отвергошася, и лишитися туне убояшася.

29:11  Обаче смиренному долготерпи и милостынею не продолжи его:

29:12  заповеди ради заступи нищаго, и по нищете его не отврати его тща.

29:13  Погуби сребро брата ради и друга, и да не оржавеет под каменем во пагубу.

29:14  Положи сокровище свое по заповедем Вышняго, и упользует тя паче нежели злато.

29:15  Затвори милостыню во клетех твоих, и та измет тя от всякаго озлобления:

29:16  паче щита тверда и паче копия тяжка, противу врагу поборет по тебе.

29:17  Муж благ споручник будет искреннему, и погубивый стыд оставит его.

29:18  Благодати споручника не забуди: даде бо душу свою за тя.

29:19  Доброе поручение отвращает грешник, неблагодарный же мыслию оставит избавльшаго и.

29:20  Поручение многих погуби благоуправляющих и поколеба их яко волна морская:

29:21  мужы сильны пресели, и заблудиша во языцех чуждих.

29:22  Грешник в поручение впадает, и гоняй дела чуждая впадет в суды.

29:23  Заступи искренняго по силе твоей, и внимай себе, да не впадеши.

29:24  Начало жития человеча вода и хлеб, и риза и дом покрываяй студ.

29:25  Лучше житие нищаго под кровом бервенным, нежели брашна добра в чуждих.

29:26  О мале и о велице доволен буди.

29:27  Живот зол из дому в дом, и аможе преселишися, не отверзеши уст своих:

29:28  угостиши и напоиши неблагодарных, и к сим зло услышиши:

29:29  приступи, пришелче, украси трапезу, и аще что в руце твоей, ухлеби мя:

29:30  изыди, пришелче, от лица славы, прииде бо мне в гости брат, и потреба дому.

29:31  Тяжка сия человеку имущу разум, запрещение храмины и поношение заимодавца.