HEBREWS
Chapter 10
Hebr | Kapingam | 10:1 | Nia haganoho digau o Jew la nia ada-mee-hua, hagalee go nia mee donu. Ma go nia ada-mee hua ala e-haga-modongoohia nia mee humalia ala ga-lloomoi maalia. Gei nia tigidaumaha le e-tataanga i-nia ngadau huogodoo gaa-hana-hua beelaa. Malaa, nia haganoho mai nia tigidaumaha le e-dohu dogomaalia behee nia daangada ala e-loomoi gi God? | |
Hebr | Kapingam | 10:2 | Maa nei bolo e-donu bolo di hai-daumaha o-nia daangada ang-gi God le e-hagamadammaa nadau ihala, digaula gu-nadau ihala ai, gei nia tigidaumaha la-gu-hagalee hai. | |
Hebr | Kapingam | 10:3 | Gei deeai, tigidaumaha dela e-haihai i-lodo nia ngadau huogodoo, di mee e-haga-langahia nadau huaidu ala ne-haihai. | |
Hebr | Kapingam | 10:4 | Idimaa, nia dodo-kau mo nia dodo-kuudi, e-deemee di-daa gi-daha nia huaidu o-nia daangada. | |
Hebr | Kapingam | 10:5 | Malaa, deenei tadinga a Christ i-mua dono madagoaa ne-hanimoi gi henuailala, Mee ne-helekai gi God boloo: “Goe hagalee hiihai gi tigidaumaha mo-di wanga-dehuia dela e-hai gi-nia manu, gei Goe ne-hagatogomaalia tuaidina mai gi-di-Au. | |
Hebr | Kapingam | 10:6 | Goe e-hagalee tene gi-nia wanga-dehuia manu ala e-dudu haga-dogomaalia i-hongo di gowaa dudu-tigidaumaha, belee wwede nia huaidu. | |
Hebr | Kapingam | 10:7 | Gei-Au ga-helekai gi Mee: ‘Deenei Au, Meenei God, Au belee hai do manawa, gii-hai be nnelekai ala guu-lawa di hihi gi-lodo di Beebaa-Haganoho.’ ” | |
Hebr | Kapingam | 10:8 | Matagidagi, gei Mee ne-helekai boloo, “Goe hagalee hiihai be e-manawa-tene gi tigidaumaha mo-di wanga-dehuia dela ne-hai gi-nia manu ala e-dutudu i-hongo di gowaa dudu tigidaumaha belee wwede nia huaidu.” Mee ne-helekai nia mee beenei, ma e-aha maa nia tigidaumaha huogodoo le e-hai gii-hai be nnaganoho. | |
Hebr | Kapingam | 10:9 | Mee ne-helekai nomuli, “Deenei Au, Meenei God, Au belee hai do manawa.” Malaa, God guu-kili gi-daha nia tigidaumaha namua, gu-haga-noho-aga tigidaumaha hoou a Christ gi nadau lohongo. | |
Hebr | Kapingam | 10:10 | Idimaa Jesus Christ gu-haga-gila-aga di manawa o God, gei gidaadou huogodoo gu-madammaa gi-daha mo tadau huaidu, idimaa, Mee gu-tigidaumaha dono huaidina hagadahi mai gi gidaadou huogodoo. | |
Hebr | Kapingam | 10:11 | Digau hai-mee-dabu o Jew huogodoo e-hai-hegau i-nia laangi huogodoo, e-hai nadau tigidaumaha lahua i-nia holongo e-logo, malaa, nia tigidaumaha digaula e-deemee-loo di-wwede nia huaidu. | |
Hebr | Kapingam | 10:12 | Christ ne-tigidaumaha haga-dahi hua, tigidaumaha deenei le e-mogobuna di wwede nia huaidu, nomuli gei Mee guu-noho i-di baahi gau-donu o God. | |
Hebr | Kapingam | 10:13 | Deelaa di gowaa a-Mee e-talitali dolomeenei, gaa-dae-loo gi-di madagoaa God gaa-dugu ono hagadaumee gi-lala gadoo be di llanga ono babaawae. | |
Hebr | Kapingam | 10:14 | Tigidaumaha deenei ne-hai-hua haga-dahi, dela ne-hai digaula gii-dohu dogomaalia gaa-hana-hua beelaa, go digau ala e-haga-madammaa gi-daha nadau huaidu. | |
Hebr | Kapingam | 10:15 | Di Hagataalunga-Dabu gu-haga-modongoohia-mai gi gidaadou nia mee aanei, Mee ne-helekai matagidagi boloo, | |
Hebr | Kapingam | 10:16 | “Di Maadua e-helekai, ‘Deenei di hagababa dela gaa-hai ko-Au gi digaula i-nia laangi ala ga-loomoi, gei Au ga-haga-honu digaula gi agu haganoho, gaa-dugu nia maa gi-lodo nia manawa digaula, gaa-hihi nia maa gi-lodo nadau maanadu.’ ” | |
Hebr | Kapingam | 10:17 | Mee ne-helekai labelaa boloo, “Au ga-haga-de-langahia nia hagadilinga huaidu ala nogo hai go digaula.” | |
Hebr | Kapingam | 10:18 | Di madagoaa nia huaidu aanei gu-maahede, gei tigidaumaha dela belee wwede nia huaidu la-hagalee hai labelaa. | |
Hebr | Kapingam | 10:19 | Ogu ihoo hagaaloho, gidaadou gu-dagaloaha di-ulu gi-lodo di Gowaa Dabuaahia Huoloo mai di made o Jesus. | |
Hebr | Kapingam | 10:20 | Christ gu-huge-mai gi gidaadou dahi ala hoou ge mouli, e-moe-adu, gu-ihaa i-baahi i-golo di gahu duuli di gowaa deelaa, guu-dau-adu gi-di Gowaa Dabuaahia Huoloo, di ala deenei la-go dono huaidina. | |
Hebr | Kapingam | 10:22 | Deenei-laa, gidaadou gi-mmaanege-adu gi God i-di manawa madammaa mo-di hagadonu e-donu. Tadau manawa daamaha mo tadau huaidina huaidu guu-lawa di-gaugau gi-nia wai madammaa. | |
Hebr | Kapingam | 10:23 | Gidaadou gi-daahia gii-mau tadau hagadagadagagee dela nogo haga-modongoohia go gidaadou, idimaa, gidaadou e-mee di hagadagadagagee gi God, e-dadaahi dana hagababa. | |
Hebr | Kapingam | 10:24 | Gidaadou gi-hagadau hagamaamaa i-di haga-modongoohia-aga tadau aloho, mo tadau hangaahai humalia huogodoo. | |
Hebr | Kapingam | 10:25 | Gidaadou gi-hudee dugua tadau hai dagadagabuli, be-di hai o hunu daangada. Gei gidaadou gi-hagamahi hagamaaloo-ina-aga tangada-nei mo tangada-nei, idimaa, goodou gu-iloo bolo di Laangi o Tagi la-gu-hoohoo-mai. | |
Hebr | Kapingam | 10:26 | Maa gidaadou gaa-unu-hua i-lodo nia huaidu i-muli tadau maalama gi-nia agoago ala e-donu, gu-deai dahi tigidaumaha labelaa e-mee di-haga-madammaa gidaadou gi-daha mo nia huaidu ai, | |
Hebr | Kapingam | 10:27 | di-mee i-golo, go gidaadou e-talitali mmaadagu di hagi-aga mo nia mahi o-di ahi dela gaa-dudu digau ala e-hai-baahi ang-gi God. | |
Hebr | Kapingam | 10:28 | Maa tangada ga-de-hagalongo gi Nnaganoho Moses, ia e-daaligi gii-made maa ia gu-hagi-aga i-nia hagadootonu o-nia daangada dogolua be dogodolu bolo mee gu-ihala, geia e-deemee di-dumaalia ginai. | |
Hebr | Kapingam | 10:29 | Malaa goodou e-hagamaanadu bolo-aha gi tangada dela e-haga-balumee Tama a God? Tangada deelaa, e-hagahuaidu nia dodo o-di hagababa hoou, ala ne-haga-madammaa ia, ge e-haganneennee di Hagataalunga mo dono dumaalia. Tangada beenei le e-hagaduadua damanaiee! | |
Hebr | Kapingam | 10:30 | Gidaadou gu-iloo be di-maa ko-ai ne-helekai, “Au ga-hai-baahi gi-tongaadahi gaa-hui gi-muli,” gei Mee gu-helekai labelaa, “Dimaadua ga-hagi-aga ana daangada.” | |
Hebr | Kapingam | 10:31 | E-hagamadagudagu-dangada huoloo maa tangada gaa-doo gi-lodo nia lima o-di God Mouli! | |
Hebr | Kapingam | 10:32 | Goodou gi-langahia godou hangaahai i-lodo nia laangi ne-too gi-daha. I-lodo nia laangi aalaa, i-muli di maalama a God ne-haga-maalama goodou, gei nia haingadaa e-logo gu-tale-adu gi goodou, gei goodou gu-mau-dangihi i-lodo di madagoaa haingadaa, digi magedaa. | |
Hebr | Kapingam | 10:33 | Hunu madagoaa nia daangada e-haga-balumee goodou i-mua teenua, gei e-haga-huaidu goodou. Hunu madagoaa gei goodou gu-hiihai e-buni-anga gi digau ala guu-kae nia hagadilinga hagaduadua beenei. | |
Hebr | Kapingam | 10:34 | Goodou guu-kae di hagaduadua o digau lawalawa. Di madagoaa godou maluagina ne-daa gi-daha mo goodou, gei goodou gu-hagakono i-di manawa tene, i goodou gu-iloo bolo goodou gu-hai-mee gi-nia mee koia e-humalia gaa-hana-hua beelaa. | |
Hebr | Kapingam | 10:35 | Hudee diagia godou manawa maaloo, idimaa, godou manawa-maaloo la-iai dono hui damana. | |
Hebr | Kapingam | 10:36 | Goodou e-hai-loo gi-hagakono godou manawa, gei goodou gaa-mee di-haga-gila-aga di manawa o God, ga-hai-mee gi ana mee ala guu-lawa dana hagababa adu gi goodou. | |
Hebr | Kapingam | 10:37 | Di Beebaa-Dabu e-helekai boloo, “Di madagoaa-hua dulii i-golo, gei Mee dela e-hanimoi, la-ga-dau-mai, Mee hagalee duai. | |
Hebr | Kapingam | 10:38 | Agu daangada ala e-donu ga-hagadonu ga-mouli. Maa tangada i digaula gaa-huli gi-daha mo dono hagadonu, Au hagalee-loo e-tene ginai.” | |