Azeri - II Thessalonians

Chapter 1

1:1  پولوس، سئلوانوس و تئموتاعوسدان، آتاميز تاري و ربّئمئز عئسا مسئحده اولان تسالونئکلئلرئن کئلئساسينا:

1:2  آتا تاري و رب عئسا مسئحدن سئزه فيض و باريش اولسون.

1:3  قارداشلار، بئز گرک سئزئن اوچون لايئق اولان بئر شکئلده دائم تارييا شوکور ادک، چونکي ائمانينيز داها چوخ آرتير و بئربئرئنئزه اولان محبّتئنئز داها دا چوخ بؤيويور.

1:4  بو سببدن بئز اؤزوموز، دوشدويونوز بوتون عذابلار و ذئلّتلرئنئزئن قاباغينداکي تحمّول و ائمانينيزدان اؤتري تارينين کئلئسالاري آراسيندا فخرله دانيشيريق.

1:5  بو، تارينين صالح حؤکمونون علامتي‌دئر. اله کي، سئز تارينين پادشاهليغينا لايئق ساييلاسينيز کي، اونون اوچون ده عذاب چکئرسئنئز.

1:6  چونکي تارينين يانيندا البتّه عدالت بودور کي، سئزه ذئلّت چکدئرنلره، ذئلّت چکدئرسئن

1:7  و ذئلّت چکن سئزلره، بئزئمله بئرلئکده راحاتليق يتئرسئن، او زامان کي، رب عئسا بوتون قودرتلي ملکلری ائله اود آلووو ائچئنده گؤيدن ظاهئر اولاجاق

1:8  و تاريني تانيمايان و ربّئمئز عئسانين ائنجئلئندن ائطاعت اتمه‌ينلره جزا وره​جک.

1:9  اونلار ربّئن حوضوروندان و اونون قودرتئنئن شؤوکتئندن محروم قاليب، ابدي هلاکتله جزالاناجاقلار.

1:10  بو او گونده باش وره‌جکدئر، او گون کي، مسئح اوز موقدّسلرئنده عئزّت قازانماق و بوتون ائمانلي‌لاري حيرته گتئرمک اوچون گلئر-چونکي سئزه وردئيئمئز شهادته ائناندينيز.

1:11  بونا گؤره بئز دائم سئزئن اوچون دوعا ادئرئک کي، تاريميز، سئزي اولوندوغونوز دعوته لايئق سايسين و قودرتله ياخشيليق اوچون هر جور ائشتئياق و ائمانين ائشئني يرئنه يتئرسئن.

1:12  اِله کي، تاريميز و ربّئمئز عئسا مسئحئن فيضئنه گؤره، ربّئمئز عئسانين آدي سئزده عئزّتلنسئن و سئز ده اوندا عئزّتلنه​سئنئز.

Chapter 2

2:1  ائندي قارداشلار، ربّئمئز عئسا مسئحئن گلئشي و بئزئم اونون يانيندا ييغيلماغيميز باره​ده سئزدن خاهئش ادئرئک کي،

2:2  "ربّئن گونو چاتيب" دئين هر هانسي بئر روح، بئر کلام، و يا گويا بئزدن گلن بئر مکتوب، فئکرئنئزي تز لرزه​يه سالديرماسين، يا دا پرئشان اتمه‌سئن.

2:3  قويمايين هچ کئم سئزي هچ بئر نحو​له آلداتسين. چونکي اوّلجه، ائماندان دؤنمه زاماني گلمه​مئش و هلاکت اوغولو اولان او شرئعتسئز آدام ظوهور اتمه​مئش، او گون گلميه​جکدئر.

2:4  او آدام هر تاري و يا عئبادت ادئلن شيه ضئدّ دوروب، اؤزونو اوجالداجاق، اِله کي، تارينين معبدئنده اَيله‌شئب، اؤزونو تاري کئمي گؤرسده‌جک.

2:5  مگر خاطيرلاميرسينيز کي، حله يانينيزدا اولارکن بو شيلري سئزه ديئردئم؟!

2:6  و بئلئرسئنئز کي، اونا ائندي نه مانع اولور، اِله کي، اؤز واختيندا ظوهور اتسئن.

2:7  چونکي شرئعتسئزلئيئن سئرّي ائندي بله ائشده​دئر؛ آنجاق اونا ائندي مانع اولان بله اده​جک، او زاماناجاق کي، آرادان قالديريلسين.

2:8  او زامان او "شرئعتسئز" آدام ظوهور اده​جک و رب اونو آغزينين نفسي ائله اؤلدوروب، گلئشئنئن ظوهورو ائله محو اده​جکدئر.

2:9  يعني، او ظوهور ادن آدام شيطانين فعالئيّتئنه اَساسلاناراق، بوتون قودرت و علامتلر و يالانچي عجايئبلرله،

2:10  و هلاک اولانلارين آراسيندا هر جور پئسلئيئن حئيله​سي ائله گله​جکدئر. چونکي حقئقتئن محبّتئني قبول اتمه‌دئلر کي، بلجه نئجات تاپسينلار.

2:11  بو سببدن تاري اونلارين اوستونه سهوه چکن بئر گوج گؤنده‌ره​جک کي، يالان اولانا ائنانينسينلار

2:12  اِله کي، حقئقته ائنانماياييب پئسلئکدن لذّت آپارانلارين هاميسي موحاکئمه​يه چکئلسئنلر.

2:13  لاکئن بئز، اي ربّئن سوگئلئلري اولان قارداشلار، سئزه گؤره گرک همئشه تارييا شوکور ادک. چونکي تاري باشلانيشدان سئزي موقدّس روحون تقدئسي و حقئقته اولان ائمانين واسئطه‌سئله نئجات اوچون سچئب.

2:14  و بونون اوچون ائدي کي، سئزي بئزئم خوش خبرئمئزئن واسئطه‌سئله دعوت اتدي. اِله کي، ربّئمئز عئسا مسئحئن شؤوکتئني قازاناسينيز.

2:15  بونا گؤره، قارداشلار، مؤحکم دورون و او تعلئملره کي، ائستر سؤز، ائستر مکتوب وسئله​‌سئله بئزدن اؤيره‌ندئنئز، باغلي قالين.

2:16  قوي ائندي عئسا مسئحئن اؤزو کي، بئزي سوئب و بئزه ابدي تسلّي و فيضي ائله ياخشي اومئد ورئب، و آتاميز تاري

2:17  هر ياخشي عمل و سؤزده اورکلرئنئزه تسلّي ورئب، قووّتلندئرسئن.

Chapter 3

3:1  نهايت، قارداشلار، بئزئم اوچون دوعا ادئن کي، ربّئن کلامي تز ياييلسين و سئزئن آرانيزدا اولدوغو کئمي عئزّت قازانسين.

3:2  و بئز ترسه و پئس آداملاردان خئلاص اولاق؛ چونکي هامي ائمان گتئرن ديئل.

3:3  آمّا رب وفالي‌دير و او، سئزي قووّتله‌ندئرئب شرئردن حئفظ اده​جک.

3:4  بئزئم ده ربده سئزه اعتئماديميز وار کي، سئزه ددئيئمئز احکاملارا عمل ادئرسئنئز و اده​جکسئنئز ده.

3:5  قوي رب اورکلرئنئزي تارينين محبّتئنه و مسئحئن تحمّولونه هئدايت اتسئن.

3:6  ائندي، قارداشلار، ربّئمئز عئسا مسئحئن آديندا سئزه امر ادئرئک کي، تربئيه​سئزلئکله گزن و بئزدن آلديغينيز تعلئمه موطابئق ياشامايان قارداشدان اوزاقلاشين.

3:7  چونکي سئز اؤزونوز بئلئرسئنئز کي، نجه بئزدن نومونه گؤتوره​سئنئز. چونکي بئز آرانيزدا ائنضئباطسيز بئر رفتار اتمه‌دئک.

3:8  هچ کئمئن چؤره‌يئني ده موفته يمه‌دئک. لاکئن زحمت و چتئنلئکله گجه-گوندوز ائشله‌دئک کي، سئزئن هچ بئرئنئزه يوک اولماياق.

3:9  بونون اوچون يوخ کي، گويا حاقّيميز يوخدور، آمّا اونون اوچون کي، اؤزوموزو سئزه بئر نومونه قوياق و سئز بئزدن نومونه گؤتوره​سئنئز.

3:10  حتّا سئزئنله اولارکن ده سئزه بو امري وِرَردئک: هر کس ائشله‌مک‌ ائسته‌مئر، قوي يمه‌سئن ده.

3:11  چونکي اشئدئرئک کي، سئزلردن بعضئلري ائنظئباطسيز بئر حيات ياشاييب اصلا ائشله‌مئرلر، آمّا بورونلاريني هر شيه سوخورلار.

3:12  رب عئسا مسئحده بله آداملارا امر ادئب اونلاري تشوئق ادئرئک کي، آرامليقلا ائشله‌يئب اؤز چؤرکلرئني يسئنلر.

3:13  آمّا سئز، قارداشلار، ياخشيليق اتمکدن يورولمايين.

3:14  اگر کئمسه بو مکتوبداکي سؤزلرئمئزدن ائطاعت اتمئر، او آدامي نئشانلاييب اونونلا آرتيق گلئش-گدئش اتمه‌يئن کي، اوتانسين.

3:15  لاکئن حله ده اونو دوشمن حساب اتمه‌يئن، آمّا قارداش کئمي اونا نصئحت ورئن.

3:16  قوي باريش ربّئن اؤزو، سئزه دائم هر وجه‌له باريش عطا اتسئن. رب سئزئن هامينيزلا اولسون.

3:17  من، پولوس، بو سالامي سئزه اؤز اَلئمله يازيرام و بو، هر مکتوبدا بئر نئشاندير؛ من بله يازيرام.

3:18  ربّئمئز عئسا مسئحئن فيضي سئزئن هامينيزلا اولسون.