CSlElizabeth - II Thessalonians

Chapter 1

1:1  Павел и Силуан и Тимофей, церкви Солунстей, о Бозе Отце нашем и Господе Иисусе Христе:

1:2  благодать вам и мир от Бога Отца нашего, и Господа Иисуса Христа.

1:3  Благодарити должни есмы Бога всегда о вас, братие, якоже достойно есть, яко превозрастает вера ваша, и множится любовь единаго коегождо всех вас друг ко другу:

1:4  яко самем нам хвалитися о вас в церквах Божиих, о терпении вашем и вере во всех гонениих ваших и скорбех, яже приемлете,

1:5  показание праведнаго суда Божия, во еже сподобитися вам Царствия Божия, егоже ради и страждете.

1:6  Аще убо праведно у Бога, воздати скорбь оскорбляющым вас,

1:7  а вам оскорбляемым отраду с нами, во откровении Господа Иисуса с небесе, со Ангелы силы Своея,

1:8  во огни пламенне дающаго отмщение не ведущым Бога и не послушающым благовествования Господа нашего Иисуса Христа:

1:9  иже муку приимут, погибель вечную, от лица Господня и от славы крепости Его,

1:10  егда приидет прославитися во святых Своих и дивен быти во всех веровавших, яко уверися свидетельство наше в вас, в день он.

1:11  За сие и молимся всегда о вас, да вы сподобит званию Бог наш и исполнит всяко благоволение благости и дело веры в силе,

1:12  яко да прославится имя Господа нашего Иисуса Христа в вас, и вы в Нем, по благодати Бога нашего и Господа Иисуса Христа.

Chapter 2

2:1  Молим же вы, братие, о пришествии Господа нашего Иисуса Христа и нашем собрании о Нем,

2:2  не скоро подвизатися вам от ума, ни ужасатися ниже духом, ниже словом, ни посланием аки от нас посланным, яко уже настоит день Христов.

2:3  Да никтоже вас прельстит ни по единому же образу: яко аще не приидет отступление прежде, и открыется человек беззакония, сын погибели,

2:4  противник и превозносяйся паче всякаго глаголемаго Бога или чтилища, якоже ему сести в церкви Божией аки Богу, показующу себе, яко Бог есть.

2:5  Не помните ли, яко еще живый у вас, сия глаголах вам?

2:6  И ныне удержавающее весте, во еже явитися ему в свое ему время.

2:7  Тайна бо уже деется беззакония, точию держяй ныне дондеже от среды будет:

2:8  и тогда явится беззаконник, егоже Господь Иисус убиет духом уст Своих, и упразднит явлением пришествия Своего,

2:9  егоже есть пришествие по действу сатанину во всяцей силе и знамениих и чудесех ложных,

2:10  и во всякой льсти неправды в погибающих, зане любве истины не прияша, во еже спастися им.

2:11  И сего ради послет им Бог действо льсти, во еже веровати им лжи,

2:12  да суд приимут вси не веровавшии истине, но благоволившии в неправде.

2:13  Мы же должни есмы благодарити Бога всегда о вас, братие возлюбленная от Господа, яко избрал есть вас Бог от начала во спасение во святыни Духа и веры истины,

2:14  в неже призва вас благовествованием нашим, в получение славы Господа нашего Иисуса Христа.

2:15  Темже убо, братие, стойте и держите предания, имже научистеся или словом, или посланием нашим.

2:16  Сам же Господь наш Иисус Христос, и Бог и Отец наш, возлюбивый нас и давый утешение вечно и упование благо в благодати,

2:17  да утешит сердца ваша и да утвердит во всяцем слове и деле блазе.

Chapter 3

3:1  Прочее, молитеся о нас, братие, да слово Господне течет и славится, якоже и в вас,

3:2  и да избавимся от злых и лукавых человек: не всех бо есть вера.

3:3  Верен же есть Господь, Иже утвердит вас и сохранит от лукаваго.

3:4  Уповаем же на Господа о вас, яко, яже повелеваем вам, и творите и сотворите.

3:5  Господь же да исправит сердца ваша в любовь Божию и в терпение Христово.

3:6  Повелеваем же вам, братие, о имени Господа нашего Иисуса Христа, отлучатися вам от всякаго брата безчинно ходяща, а не по преданию, еже прияша от нас:

3:7  сами бо весте, како лепо есть вам подобитися нам: яко не безчинновахом у вас,

3:8  ниже туне хлеб ядохом у кого, но в труде и подвизе, нощь и день делающе, да не отягчим никогоже от вас:

3:9  не яко не имамы власти, но да себе образ дамы вам, во еже уподобитися нам.

3:10  Ибо егда бехом у вас, сие завещавахом вам: яко аще кто не хощет делати ниже да яст.

3:11  Слышим бо некия безчинно ходящыя у вас, ничтоже делающыя, но лукавно обходящыя:

3:12  таковым запрещаем и молим о Господе нашем Иисусе Христе, да с безмолвием делающе, свой хлеб ядят.

3:13  Вы же, братие, не стужайте, доброе творяще.

3:14  Аще же кто не послушает словесе нашего посланием, сего назнаменуйте и не примешайтеся ему, да посрамится:

3:15  и не аки врага имейте его, но наказуйте якоже брата.

3:16  Сам же Господь мира да даст вам мир всегда во всяцем образе: Господь со всеми вами.

3:17  Целование моею рукою Павлею, еже есть знамение во всяцем послании: сице пишу:

3:18  благодать Господа нашего Иисуса Христа со всеми вами. Аминь.