Kapingamarangi - II Thessalonians

Chapter 1

1:1  Mai baahi o Paul, Silas, mo Timothy, ang-gi di nohongo-dabu i Thessalonica, dela gu-hai-mee ginai tadau Damana go God, mo tadau Dagi go Jesus Christ:

1:2  God Tamana mo tadau Dagi go Jesus Christ gi-gowadu gi goodou tumaalia mo-di noho i-di aumaalia.

1:3  Madau duaahina-nei, gimaadou e-hai-loo gi-danggee gi God i-nia madagoaa huogodoo i goodou. E-donu belee hai go gimaadou beelaa, idimaa, godou hagadonu mo hagadau-aaloho la-gu-tomo-aga.

1:4  Deelaa di mee e-hagaamu-ai goodou go gimaadou i-lodo nia nohongo-dabu a God. Gimaadou e-hagaamu godou manawa-hagakono, hagadonu, mo hagaduadua mono haga-mmaemmae huogodoo ala ne-tale-adu gi goodou.

1:5  Nia mee huogodoo aanei, le e-haga-modongoohia bolo di hagi-aga a God le e-donu, idimaa, di hagaodi gi-muli o-nia mee aanei, gei goodou gaa-tau di ulu i Teenua King o God, dela e-duadua ginai goodou.

1:6  God gaa-hai-laa di mee dela e-donu, e-hagaduadua digau ala e-hagaduadua goodou.

1:7  Mee ga-haga-dagaloaha goodou ala e-noho i-lodo nia hagaduadua, mo gimaadou. Mee gaa-hai di mee deenei i-di madagoaa Jesus ma-ga-haneia i-di langi mo ana gau di-langi maaloo-dangihi,

1:8  mo-di ulaula di ahi, e-hagaduadua digau ala e-haga-de-iloo a God, mo digau ala hagalee daudali di Longo-Humalia o tadau Dagi Jesus.

1:9  Digaula ga-hagaduadua gi-di hagaduadua e-dee-odi, gaa-wwae gi-daha mo Tagi mo nia madamada ono mahi,

1:10  i-di laangi ma-ga-hanimoi-iei Mee belee hagamadamada go ana daangada huogodoo, mo-di hagalaamua go digau huogodoo ala gu-hagadonu. Goodou ga-madalia digaula, idimaa, goodou gu-hagadonu madau helekai ala ne-hagi-adu gi goodou.

1:11  Deelaa di mee e-dalodalo-ai gimaadou i-nia madagoaa huogodoo i goodou. Gimaadou e-dangi ang-gi God gi-haga-dohu-ina goodou ang-gi dono mouli dela ne-gahi ginai goodou gi-mouli-ai. God gi-heia goodou gii-mee di-haga-kila-aga godou hiihai humalia mai i ono mahi, ge gi-hagangudu-ina gi-muli godou hegau i-di hagadonu.

1:12  Deenei di-godou hai e-haga-madamada-ai di ingoo o tadau Dagi go Jesus, gei Mee e-haga-madamada labelaa goodou, mai i tumaalia o tadau God mo tadau Dagi go Jesus Christ.

Chapter 2

2:1  Ogu duaahina-nei, di hai o-di hanimoi o tadau Dagi go Jesus Christ, mo tadau dagabuli-mai gi dono baahi: au e-dangi-adu gi goodou bolo

2:2  hudee hagahinihini-ina godou hagabaubau be manawa-gee gi-nia helekai ala e-hai bolo di Laangi o Tagi la-gu-dau-mai. Holongo hunu daangada e-hagamaanadu bolo ma nia helekai ni gimaadou ne-hai i-lodo madau agoago be madau hagadele nnelekai a God, be ne-hihi i-lodo di lede.

2:3  Goodou hudee dumaalia gi-nia daangada gi-halahalau-ina goodou gi-nia helekai beenei, idimaa, di laangi deelaa la-hagalee dau-mai gaa-dae-loo gi-di hai-baahi haga-muliagina gaa-hai, mo-di gila-aga tangada hai-mee hala dela belee hudu gi-lodo di gowaa hagaduadua.

2:4  Mee ga-hai-baahi gi-nia mee huogodoo ala e-hagaingoo bolo nia god ala e-daumaha ginai nia daangada, mo nia mee huogodoo ala e-dugu go nia daangada bolo nia mee haga-madagu. Mee gaa-bida haga-menege-aga ia gi-hongo nia mee huogodoo, gaa-hana ga-ulu gi-lodo di Hale Daumaha o God, gaa-noho i-golo, gaa-hai bolo ia di God.

2:5  Goodou gu-de-langahia? Au gu-hagi-adu di mee deenei i dogu madagoaa nogo i-godou baahi.

2:6  Ma di mee i-golo dela e-duuli di mee deenei bolo gi-de-gila-aga dolomeenei. Goodou e-iloo-hua be di-maa di-aha. Malaa, dono madagoaa humalia, gei di Hagadaumee o God ga-gila-mai-laa.

2:7  Nia huaidu ala e-nngala le e-ngalua dolomeenei, gei di mee dela bolo e-hai gii-hai, ga-hagalee hai, gaa-dae-loo gi-di madagoaa o tangada dela e-duuli di mee deelaa, la-ga-daa gi-daha.

2:8  Deelaa di madagoaa o tangada hai hala ga-gila-mai, malaa, Tagi Jesus ga-hanimoi ga-daaligi a-mee gi-nia madangi mai i dono ngudu, ga-oho a mee gi-nia gaagaa o dono hanimoi.

2:9  Tangada hai hala ga-hanimoi mo nia mogobuna o Setan, gaa-hai ana hagadilinga mogobuna huogodoo mono mee haga-goboina tilikai,

2:10  ga-hai-hegau i-nia hagadilinga mee huaidu huogodoo belee halahalau digau ala belee kili gi-daha. Digaula gaa-kili gi-daha, idimaa, digaula digi hai-mee gi-di tonu mo-di aloho, bolo gi-mouli ginaadou.

2:11  Deenei-laa, God ga-hagau-mai dana mogobuna haga-hinihini e-hagangalua nadau lodo bolo gi-hagadonu digaula nia mee ala e-hala.

2:12  Malaa, di hagaodi gi-muli o digau huogodoo ala hagalee hagadonu di mee dela e-donu, ge tenetene gi-di huaidu, la-go di hagahuaidu.

2:13  Madau duaahina-nei, gimaadou e-hai-loo gi-danggee ang-gi God i-nia madagoaa huogodoo i goodou go digau ala e-aloho-ai di Tagi, idimaa, God ne-hilihili goodou belee haga-mouli matagidagi mai i-di mogobuna o-di Hagataalunga belee hai goodou gi-dabuaahia, mo mai i godou hagadonu di tonu.

2:14  God ne-gahigahi mai goodou gi-lodo tumaalia deenei mai i-di Longo-Humalia dela ne-agoago go gimaadou adu gi goodou. Mee ne-gahi-mai goodou bolo gi-hai-mee gi-di madamada o tadau Dagi go Jesus Christ.

2:15  Madau duaahina-nei, tuu gii-mau ge gi-daahia nia donu ala gu-agoago-adu go gimaadou mo i-lodo di-madau lede.

2:16  Tadau Dagi go Jesus Christ, mo tadau Damana go God e-aloho i gidaadou, e-gaamai di manawa-maaloo e-noho hua beelaa mo-di hagadagadagagee maaloo,

2:17  gi-haga-maaloo-ina-aga goodou gii-mahi, gii-mee goodou di-leelee mo di-hai nia mee humalia i-nia madagoaa huogodoo.

Chapter 3

3:1  Madau duaahina-nei, dalodalo i gimaadou, bolo madau helekai mai baahi o tadau Dagi la-gii-dele limalima, gei nia daangada gi-hagalabagau-ina nnelekai aanei, gadoo be-di dele nnelekai i godou baahi.

3:2  Dalodalo-ina labelaa gi God gi-daawa gimaadou gi-daha mo digau huaidu, idimaa, digau huogodoo la-digi hagadonu nia helekai aalaa.

3:3  Dimaadua le e-manawa-dahi, gei e-hagamaaloo ge e-abaaba goodou gi-daha mo Tangada Huaidu deelaa.

3:4  Gimaadou di-madau hagadagadagagee mai baahi Dimaadua bolo goodou e-hagamahi, e-hai madau mee ala ne-agoago-adu gi goodou, gei ga-duudagi-hua beelaa gi-muli.

3:5  Tagi gi-heia goodou gi-iloo di aloho o God, ge gi-hagamahi gii-kae di manawa-hagakono dela ne-dugu-mai go Christ.

3:6  Madau duaahina-nei, gimaadou e-hagi-ngudu-adu i-di ingoo o tadau Dagi go Jesus Christ, bolo hudee buni-anga gi nia duaahina-daumaha huogodoo ala e-hagatoo ge hagalee daudali madau agoago.

3:7  Goodou gu-iloo humalia di-godou mee belee hai, e-daudali madau hangaahai. Gimaadou hagalee nogo hagatoo i godou baahi.

3:8  Gimaadou digi kae nia hagamaamaa mai dahi dangada, maa digi huia. Gei gimaadou e-ngalua i-di boo mo-di aa, bolo gi-de-haga-daamaha tei dangada i goodou.

3:9  Gimaadou ne-hai beenei, hagalee bolo madau donu ai e-kae madau hagamaamaa mai i godou baahi, gimaadou ne-hai di ala-mee belee daudali go goodou.

3:10  Di-madau madagoaa nogo noho i godou baahi, gimaadou gu-helekai-adu, “Tangada dela hagalee hiihai e-ngalua, geia hudee miami.”

3:11  Gimaadou e-helekai beenei, idimaa, gimaadou gu-longono bolo ma nia daangada i godou baahi e-nohonoho-hua balumee, nadau mee e-hai-ai, e-haga-deaadee nia moomee nia daangada.

3:12  Gimaadou e-helekai gi digau aanei i-di ingoo o tadau Dagi go Jesus Christ, bolo gi-ngalua, e-hagahumalia ginaadou.

3:13  Gei goodou, go madau duaahina, hudee buhi di hai nia mee ala e-humalia.

3:14  Holongo tangada i-golo i godou baahi e-hagalee daudali nia haganoho aanei ala ne-hihi adu go gimaadou i-lodo di-madau lede deenei. Maa tangada beenei i-golo, gei goodou hagailongo-ina, hudee buni-anga gi mee, gei mee ga-langaadia.

3:15  Hudee heia a-mee bolo di hagadaumee ni goodou. Aago-ina a-mee be tuaahina-daumaha ni goodou.

3:16  Tagi la-go taamada o-di aumaalia, gi-gowadu gi goodou di noho i-di aumaalia i-nia madagoaa huogodoo mo i-nia-ala huogodoo. Tagi gii-noho i godou baahi huogodoo.

3:17  Au go Paul e-hihi gi dogu lima-donu boloo: Taga-aloho mai baahi o Paul Deenei dagu hai e-haga-ingoo agu lede huogodoo, deenei dagu hai e-hihi agu mee.

3:18  Tumaalia o tadau Dagi go Jesus Christ gi-madalia goodou huogodoo.