PohnOld - II Thessalonians

Chapter 1

1:1  PAULUS o Silwanus, o Timoteus ong momodisou en Tesalonik me ren Kot Sam atail, o atail Kaun Iesus Kristus.

1:2  Mak o popol sang ren Kot Sam atail o atail Kaun Iesus Kristus en mi re omail!

1:3  Mak eta sen poden danke Kot pweki komail, ri ai kan, pwe omail poson kin laudela kaualap, o omail limpok pena pwaida kaualap.

1:4  I me kit suai kin komail ong momodisou en Kot akan pweki omail kanongama o poson ni omail kalokolok o kamekam, me lel ong komail.

1:5  Iei me kasansal pan kadeik pung en Kot, komail ap pan kon ong wein Kot, me komail kamekamki.

1:6  Pwe me pung ta ong Kot en depukki ong irail me moromorouo ong komail.

1:7  A komail, me kalokolok, pan iang kit meleileila, ni kasale pan Kaun Iesus sang nanlang iang sapwilim a tounlang manaman akan,

1:8  Sansaldo ni kisiniai umpumpul, kapukapung ong irail me poponsasa Kot, o ong irail, me so peiki ong rongamau en atail Kaun Iesus Kristus.

1:9  O me pan lokidokilang kamekam soutuk sang mon silang en Kaun o sang mon a manaman lingan.

1:10  Ni a pan kotido o lingan kila sapwilim a saraui kan, ni ran o, o usun kin ir karos, me posonlar i, pwe komail kamelele atail kadede.

1:11  I me se kin pil poden kapakapa kin komail, pwe Kot en kotin kakonekon komail ong paeker o a kotin kaerela omail kapunglol o kapwaiada wiawia en poson ki manaman.

1:12  Pwe mar en atail Kaun Iesus Kristus en kalinganada re omail, o komail en konekonla re a duen mak en atail Kot o atail Kaun Iesus Kristus.

Chapter 2

2:1  SE men poeki re omail ri at akan iran atail Kaun Iesus Kristus a pan kotin pwarado, o atail pan peukedalang i,

2:2  Komail der wukiwuk sili o der wapon kida ngen eu, de kasoi pot, de kisin likau, me dene kit kadar wong komail, me dene ran en Kaun o mier.

2:3  Sota amen en kotau komail la ni meakot. Pwe ran o sota pan pwarado, lao wiawia en mas more wei sang, o aramas en dip sansal la, nain me sued.

2:4  Me pan palian meakaros o kasapwilada pein i, en ileila sang karos, me udan Kot de men kaudok kan, A pan mondi nan tanpas en Kot o mome ong pein i Kot.

2:5  Komail sota tamanda ni ai mimi re omail, i katiti ong komail mepukat?

2:6  Ari met komail asaer, me meakot mia, me kin kapwandela a pan pwarado.

2:7  A rir en sapung kan ap mur pwaida met. Ari so, a mimieta me kin kapwandela, lao a pan poioki wei sang;

2:8  I ansau me likin kapung o pan sansaleda, me Kaun Iesus pan kotin kame kila ang en silang i, o kawe kila lingan en a pan pwarado.

2:9  I me pan pwara kido mana en Satan, iangaki manaman o kilel akai o kapuriam ni likam kai.

2:10  O iangaki widing en sapung karos ong irail, me pan lokidokila, pwe re kang limpok ong melel, pwe ren dorela.

2:11  I me Kot kotin mueid ong irail ni manaman sued eu men kaping ir ada, pwe ren kamelele likam.

2:12  Pwe karos pan pakadeikada me so kamelele masan melel, a me mauki me sapung.

2:13  A mak eta, sen danke Kot ansau karos pweki komail, ri ai kompok kan, o pwe sang nin tapi o Kot me kotin pila kidar komail ong maur potopot ni saraui la pan Ngen o ni poson melel o.

2:14  Pwe ong mepukat a kotin molipei komail er pan at rongamau, pwe komail en pwais aneki lingan en atail Kaun Iesus Kristus.

2:15  Ari ri at akan, tengedi ong o apwali padak, me komail padakkier, ma sang ni kasoi de at kisin likau.

2:16  A pein atail Kaun Iesus Kristus o Kot o Sam atail, me pok ong kitail o kupura dong kitail kamait soutuk o kapor mau pan mak,

2:17  I en kamaitala mongiong omail, o katingi komail ong ni wiawia mau karos o padak.

Chapter 3

3:1  ARI ri at akan, komail kapakapa kin kit, pwe masan en Kaun o en pwaida o linganla duen a wiauier re omail.

3:2  O pwe kit en sapedokala sang aramas solelapok kan; pwe poson kaidin pwais en aramas karos.

3:3  A Kaun o me melel, me pan katenge komail o nikid sang ni me sued.

3:4  Se kaporoporeki Kaun o re omail, me komail kin dadaurata o pan wiada, me se kakaliki ong komail er.

3:5  A Kaun o en kotin wiawia mongiong omail, pwe komail en direki limpok en Kot o kanongama en Kristus.

3:6  Ri ai kan, se kakaliki ong komail ni mar en atail Kaun Iesus Kristus, me komail en muei sang saulang karos, me kin dadaurata padak, me komail ronger sang kit.

3:7  Pwe komail asa duen idedauen kit, pwe kit sota wiadar sapung nan pung omail.

3:8  O se sota ale sang amen kan at manga, ap sota pwaipwai, pwe se dodok apwal ni pong o ni ran, pwe sen der katoutouki amen komail.

3:9  A kaidin pwe a sota muei ong kit, a pwe sen wia kin kit kilel en me komail en alale sang.

3:10  Pwe ni at mimi re omail, iet me se kakaliki ong komail, meamen me kang wia dodok, a pil sota pan manga.

3:11  Pwe se ronger, me akai mi re omail, me kin weweid ni mesued ni ar solar kin dodok, a re apwali kisin tiak mal.

3:12  Ari, irail me due met, se indai ong o panaui irail, pan Kaun Iesus Kristus, me irail en dodok, o nenenla o tungole pein kan ar manga.

3:13  A komail, ri ai kan, der pangki omail wiawia mau.

3:14  A ma amen kang oke at padak nan kisin likau et, i me komail en kileledi, o komail der apwali i, pwe i en namenokela.

3:15  A komail der wiaki i imwintiti amen, a sauasa i dueta ri omail amen.

3:16  A Kaun en popol en pein kotiti ong komail popol ansau karos o ni song karos! Kaun o en kotikot re omail karos!

3:17  Ngai Paulus ranamau ni mangin pa i, me kisin likau karos kilelekidi, iduen ai inting.

3:18  Mak en atail Kaun Iesus Kristus en mi re omail karos!