Kapingamarangi - Mark - 12

12:1  Jesus ga-agoago i-nia ala-kai, “Tangada gaa-dogi dana hadagee-waini, ga-abaaba, gaa-hai dana gowaa tau-waini, ga-haga-duu dana angulaa hagaloohi. Mee gaa-wanga gi ana gau dogi-mee gi-ngalua-ai, gaa-hana haga-mogowaa.

12:2  Di madagoaa taugai, gei mee ga-hagau dana dangada hai-hegau gi digau dogi-mee aalaa, gi-gaamai dono duhongo i-di hadagee-waini deelaa.

12:3  Gei digau dogi-mee gaa-kumi tangada hai-hegau deelaa, ga-daaligi, ga-hagau gii-hana, dana mee ne-kae-ai.

12:4  Gei tangada dana hadagee-waini ga-hagau labelaa dana huai dangada hai-hegau. Digau dogi-mee ga-hagamaawa di libogo o-maa, gaa-hai di-nadau hai e-haga-langaadia a-mee.

12:5  Gei tangada dana hadagee ga-hagau labelaa dana huai dangada, gei digaula ga-daaligi a-mee. E-dogologo ne-hagau nomuli, gei guu-tale huogodoo gi-di haingadaa deelaa, hunu gau gu-hagamamaawa, ge hunu gau gu-daaligi gii-mmade.

12:6  Tangada dela ne-dubu i-golo, la-go tama-daane donu o tangada dana hadagee-waini. Muliagi-loo gei mee ga-hagau-hua go dana dama-daane donu gi digau dogi-mee aalaa. Ga-helekai, ‘Au e-iloo bolo digaula ga-hagalabagau-laa dagu dama-daane.’

12:7  Gei digau dogi-mee aalaa ga-leelee i nadau mehanga boloo, ‘Deenei la-go tama donu a-maa. Lloomoi, gidaadou ga-daaligi a-mee gii-made, gei gidaadou ga-hai-mee gi-nia mee a-maa ala belee hai-mee ginai.’

12:8  Malaa, digaula gaa-kumi tama-daane deelaa, ga-daaligi, gaa-hudu tuaidina o-maa gi-daha mo-di hadagee-waini.”

12:9  Jesus ga-heeu, “Malaa, tangada dana hadagee-waini la-gaa-hai dana aha? Mee ga-hanimoi, ga-dadaaligi nia daane aalaa, gaa-wanga di hadagee-waini gi nnuai daangada gi-benabena-ina.

12:10  Goodou digi daulia di Beebaa-Dabu dela e-helekai boloo, ‘Di hadu dela ne-hudu gi-daha go digau hau-hale bolo di balu-hadu, la-guu-hai di hadu dela e-kaedahi e-hagalabagau.

12:11  Di mee deenei la-ne-hai go Dimaadua, e-haga-goboina dangada.’ ”

12:12  Nia dagi o digau o Jew, gu-hagamada belee lawalawa a Jesus, i digaula e-iloo bolo di ala-kai a-Maa le e-hagatau ang-gi ginaadou. I di-nadau mmaadagu i digau dogologo aalaa, ga-diiagi a-Mee, gaa-hula.

12:13  Nia Pharisee mo digau hagamaamaa Herod ne-hagau gi Jesus, belee haga-ihala a-mee gi-nia heeu.

12:14  Digaula ga-lloomoi gi Mee ga-heeu, “Tangada Agoago, gimaadou e-iloo bolo Goe e-helekai donu, e-haga-balumee nia hagabaubau dangada, ge hagalee hilihili-dangada, ge e-agoago di tonu i-di hiihai a God gi-nia daangada. Hagia-mai be di-maa e-hai-baahi gi tadau haganoho di hui tadau dagitedi gi-di king o Rome? Gidaadou e-hui be deeai?”

12:15  Gei Jesus gu-gidee i-lodo nadau helekai halahalau, ga-helekai, “Goodou belee haga-ihala au eiaha? Gaamai teenedi silber gii-mmada au.”

12:16  Digaula gaa-wanga di-nadau teenedi, gei Mee ga-heeu, “Ma di ada ni-ooi, ge di ingoo ni-ooi aanei?” Gei digaula ga-helekai, “Ni di king o Rome.”

12:17  Gei Jesus ga-helekai, “Malaa, wanga-ina gi-di king nia mee a di king, ge wanga-ina gi God nia mee a God.” Gei digaula gu-goboina-e-ginaadou a Jesus.

12:18  Nia Sadduccee, ala e-agoago bolo nia daangada e-hagalee mouli-aga i-di made, ga-lloomoi gi Jesus ga-heeu,

12:19  “Tangada Agoago, Moses guu-hihi taganoho deenei, ‘Taane ma-gaa-made, gei dono lodo gaa-noho i-golo, dana dama ai, gei tuaahina-daane o taane dela ne-made gaa-lodo gi-di ahina deelaa, gi-gila-mai di tama e-ala be-di tama ni taane dela ne-made.’

12:20  “Dolomaa, tagahaanau daane dogohidu, di ulu-madua gaa-hai dono lodo, nomuli gaa-made, di-nau dama ai.

12:21  Gei togolua daane la-gaa-lodo labelaa gi-di ahina deelaa, geia gaa-made labelaa, di-nau dama ai, gei togodolu daane la-go di hai la-hua.

12:22  Taga-haanau-daane dogohidu aalaa guu-lodo huogodoo gi-di ahina deelaa, gei ginaadou guu-mmade huogodoo, nadau dama ai. Muliagina-loo gei di ahina la-gaa-made.

12:23  Di madagoaa digau mmade ma-ga-mouli-aga i-di laangi o-di mouli-aga, di ahina deelaa la-gaa-hai di lodo ni-ooi? Idimaa, digau dogohidu aalaa ne-lodo huogodoo gi mee.”

12:24  Jesus ga-helekai, “Goodou gu-ihala, idimaa goodou e-de-iloo nia helekai o-di Beebaa-Dabu mo-di mogobuna o God.

12:25  Digau mmade ma-ga-mouli-aga, la-hagalee hai nadau lodo, gadoo be digau di-langi.

12:26  Deenei di agoago o-di mouli-aga i-di made: goodou digi daulia di Beebaa Moses di kai o-di laagau e-ulaula? Ma-guu-hihi bolo God e-helekai gi Moses boloo, ‘Au go di God o Abraham, di God o Isaac, mo-di God o Jacob.’

12:27  “Mee go di God o digau mouli, hagalee ni digau mmade. Goodou digau gu-ihala!”

12:28  Tangada haga-donudonu haganoho i-golo, e-hagalongo gi-nia helekai aanei. Mee gu-iloo bolo nia helekai a Jesus ala ne-hai gi-di heeu o-nia Sadduccee, le e-humalia. Geia ga-hanimoi gi Jesus, ga-heeu, “Dehee taganoho koia e-hagalabagau i-nia haganoho huogodoo?”

12:29  Gei Jesus ga-helekai, “Deenei taganoho koia e-aamua: ‘Israel, gi-hagalongo! Dimaadua dela go tadau God, go Mee hua dela go God.

12:30  Goe gi-aloho i Dimaadua, go doo God, aga i-lodo do manawa hagatau, mo do hagataalunga hagatau, mo au hagabaubau huogodoo, mo oo mahi huogodoo.’

12:31  “Gei di lua haganoho le e-hai-hua be di-maa, boloo, ‘Goe gi-aloho i tangada dela i do baahi, gii-hai be do aloho i-di goe.’ “E-deai taganoho labelaa i-golo, e-aamua laa-hongo nia haganoho e-lua aanei ai.”

12:32  Tangada haga-donudonu haganoho ga-helekai gi Jesus, “Tangada Agoago, gu-hai-donu go au helekai ala ne-hai boloo: ‘Tagi la-dela-hua go God, deai di god labelaa i-golo ai, dela-hua go Mee.

12:33  Tangada la-gi-aloho i dono God, mai i-lodo dono manawa, mo ana hagabaubau mo ono mahi, gei gi-aloho i tangada dela i dono baahi be dono aloho i-deia.’ Koia e-hagalabagau go di hai-hegau gi-nia haganoho e-lua aanei, i tadau hai dela e-wanga-dehuia tadau manu gi-hongo di gowaa dudu-tigidaumaha, mono tigidaumaha huogodoo ala e-hai ang-gi God.”

12:34  Jesus ga-iloo-Ia, bolo nia helekai a-maa gu-hai-donu, ge-Ia ga-helekai gi mee, “Goe hagalee mogowaa i Teenua King o God.” Gei nomuli, gu-deai tangada e-heeu dana mee gi Mee ai.

12:35  Di madagoaa Jesus e-hai ana agoago i-lodo di Hale Daumaha, ge-Ia ga-heeu, “Digau haga-donudonu haganoho le e-aha ala e-hai bolo di Mesaia la di hagadili ni David?

12:36  Idimaa, di Hagataalunga-Dabu gu-haga-helekai a David: ‘Dimaadua gu-helekai gi dogu Dagi: Goe noho i dogu baahi gau-donu, gaa-dae-loo gi dogu madagoaa ma-gaa-dugu o hagadaumee gi-lala o babaawae.’

12:37  “David donu e-gahi a-mee bolo dono Dagi, malaa di Mesaia la di hagadili behee ni David?” Nia daangada dogologo nogo hagalongo tenetene gi-nia agoago a Jesus.

12:38  Mee ga-agoago gi digaula, “Goodou hudee kawe i digau haga-donudonu haganoho ala e-ulu i-nia gahu-lloo, ga-heehee-laa, gei e-hiihai bolo nia daangada gi-hagaaloho mo hagalaamua-ina ginaadou i-lodo nia gowaa huihui-mee,

12:39  ge e-hilihili nadau lohongo aamua i-lodo nia synagogee mo lodo nia hagamiami.

12:40  Aanei go digaula ala e-mada-maaloo e-kae nia goloo o-nia hale nia ahina guu-mmade nadau lodo, ge e-hai nadau dalodalo lloowehaa i-mua nia golomada o-nia daangada. Malaa, nadau hagaduadua la-koia e-huaidu.”

12:41  Jesus e-noho i-lodo di Hale Daumaha, hoohoo gi-di gowaa dela e-dugu ginai nia tigidaumaha, ge-Ia e-daumada digau ala e-dugu nadau teenedi. E-dogologo digau maluagina e-tigidaumaha nadau teenedi e-logo.

12:42  Di ahina hagaloale guu-made dono lodo ga-hanimoi nomuli, gaa-dugu ana teenedi e-lua.

12:43  Gei Jesus ga-gahi-mai ana dama-agoago gi dono baahi, ga-helekai, “Au e-hagi-adu gi goodou di tonu bolo tigidaumaha di ahina hagaloale deenei ne-hai, la-koia gu-damanaiee i-nia tigidaumaha digaula huogodoo.

12:44  Digau ala i-golo ne-dugu hunu teenedi gi-lodo di gowaa tigidaumaha mai nadau maluagina, gei di ahina hagaloale deenei gu-hagaodi-anga ana teenedi huogodoo ala belee hagahumalia-ieia.”