Kapingamarangi - Numbers - 11

11:1  Nia daangada gu-manawa-logo i-di nadau haingadaa, gaa-tamu Dimaadua, gei Mee gu-longono-Ia, gu-hagawelewele huoloo. Di ahi Dimaadua gu-ulaula-aga i-mehanga digaula, guu-dudu di baahi di waahale digaula.

11:2  Digaula ga-gahigahi a Moses bolo gi-hagamaamaa-ina ginaadou. Moses ga-dalodalo ang-gi Dimaadua, gei di ahi guu-made.

11:3  Digaula ga-haga-ingoo di gowaa deelaa boloo Taberah, idimaa, di ahi Dimaadua ne-ulaula i nadau mehanga i-di gowaa deelaa.

11:4  Digau mai i-daha i-golo nogo madalia digau Israel. Digaula gu-aumidi i-nia goneiga, ngaadahi mo digau Israel. Digaula ga-daamada ga-tamutamu, ga-helekai, “Ma koai e-mee di-gaamai gi gidaadou nia goneiga belee gai go gidaadou?

11:5  Gidaadou e-langahia nia dama-iga ala ne-gai go gidaadou i-lodo Egypt, hagalee hui. Gidaadou e-langahia labelaa nia kiulii, ‘melon’, ‘onion’ mono ‘garlic’.

11:6  Dolomeenei, gei gidaadou gu-paagege huoloo, gu-tadau meegai e-gai ai, aalaa-hua go nia ‘manna’ e-gai nia laangi huogodoo.”

11:7  (‘Manna’ le e-hai gadoo be nia lii-laagau, e-loubuge gono kene.

11:8  Nia ‘manna’ aanei le e-monnono madalia di magalillili o-di boo gi-hongo di waahale-laa digaula. Luada dono daiaa, gei digaula ga-hagabudu-mai nia maa, gaa-olo be e-tugi nia maa gii-hai nia palaawaa, gaa-dunu gi-lodo nia baalanga, gaa-hai-ai nia bagu. Di hauiha o-nia maa le e-hai gadoo be-di palaawaa ne-unugi gi-nia lolo-olib gaa-dunu.)

11:9  Nia ‘manna’ aanei le e-monnono madalia di magalillili o-di boo gi-hongo di waahale-laa digaula. Luada dono daiaa, gei digaula ga-hagabudu-mai nia maa, gaa-olo be e-tugi nia maa gii-hai nia palaawaa, gaa-dunu gi-lodo nia baalanga, gaa-hai-ai nia bagu. Di hauiha o-nia maa le e-hai gadoo be-di palaawaa ne-unugi gi-nia lolo-olib gaa-dunu.)

11:10  Moses ga-longono-ia nia tamu o-nia daangada i-nia ngudu o-nia bontai o nadau hale-laa. Mee gu-manawa-gee huoloo, idimaa, Dimaadua gu-hagawelewele ang-gi digaula.

11:11  Mee ga-helekai gi Dimaadua, “Goe e-aha dela gu-hagahuaidu au? Goe e-aha dela gu-hagalee manawa-tene mai gi-di-au? Goe e-aha dela e-hagabudu-mai gi-di-au nia haingadaa o-nia daangada aanei huogodoo?

11:12  Hagalee ko-au ne-hai digaula, be ne-haanau-mai digaula gi henuailala! Ma e-aha dela Goe ne-hiihai-mai bolo au gi-lahia digaula gi-lodo tenua dela ne-hagababa Kooe ang-gi nadau damana-mmaadua, e-bulubulu digaula i ogu lima e-madamada-humalia i digaula gadoo be tangada e-lahi ana dama-lligi.

11:13  Au e-gaamai agu goneiga i-hee e-haangai digau dogologowaahee aanei? Digaula e-nnoo-mau e-tangitangi-mai gi-di-au boloo, ‘Gaamai madau goneiga!’

11:14  Au gu-deemee di-benebene digau huogodoo aanei modogoau, i digaula e-daamaha-mai gi-di-au.

11:15  Maa deenei di hai o do manawa, Goe dumaalia-mai, daaligidia au, gi-dee noho-hua au i-lala do hagawelewele.”

11:16  Dimaadua ga-helekai gi Moses, “Hagadagabuli-ina-mai nia daane mada-hidu ala e-hagalabagau go nia daangada be nia dagi, laha-aga gi dogu Hale-laa gii-tuu i-golo i do baahi.

11:17  Au ga-haneia, ga-helekai-adu gi-di-goe i-golo. Au ga-daa gi-daha hunu mogobuna o-di Hagataalunga dela ne-gowadu ko-Au gi-di-goe, gaa-wanga gi digaula, gei digaula gaa-mee di-madalia goe, gaa-mee di-madamada-humalia nia daangada aanei, gei goe ga-hagalee ngalua modogoe.

11:18  Hagi-anga-ina gi-nia daangada Israel boloo, ‘Haga-madammaa-ina goodou gi daiaa, goodou gaa-gai nia goneiga. Idimaa, Dimaadua gu-hagalongo gi godou dangidangi mo di-godou hai bolo goodou e-aumidi i-nia goneiga, ge e-hai bolo godou mouli nogo i Egypt la-nogo humalia. Malaa, Dimaadua ga-gowadu gi goodou godou goneiga, gei goodou ga-miami.

11:19  Goodou ga-miami hagalee bolo di laangi hua e-dahi be e-lua, be nia laangi e-lima be e-madangaholu, be nia laangi e-madalua.

11:20  Goodou gaa-gai nia maa i-lodo di malama e-dahi, gaa-dae-loo gi-di-godou dee-hiihai huoloo gi-nia maa. Deenei le e-hai, idimaa, goodou guu-hudu gi-daha Dimaadua dela e-noho i godou baahi, mo di-godou manawa-logo mo-di haihai boloo: Gidaadou ne-lloomoi gi-daha mo Egypt eiaha?’ ”

11:21  Moses ga-helekai gi Dimaadua, “Au e-dagi nia daane e-ono-lau-mana-(600,000), gei Goe e-hai-mai bolo Goe ga-haangai digaula gi-nia goneiga i-lodo di malama dogomaalia?

11:22  Nia kau mo nia siibi huogodoo ga-daaligi gei di maa gaa-dohu ang-gi digaula? Nia iga huogodoo ala i-lodo di moana gaa-kumi gei di-maa gaa-dohu ang-gi digaula?”

11:23  Dimaadua ga-helekai gi Moses, “Ma e-hai behee, ogu mogobuna la dono hagageinga i-golo? Goe hoohoo-hua gaa-mmada be agu helekai le e-kila-aga be deeai!”

11:24  Moses gaa-hana ga-hagi-anga gi digaula di mee a Dimaadua ne-helekai-ai, ga-haga-dagabuli-mai nia daane e-mada-hidu mai nia dagi, ga-haga-noho digaula gi-haganiga di Hale-laa deelaa.

11:25  Dimaadua ga-haneia i-lodo di baahi gololangi, ga-helekai gi Moses. Mee ga-daa gi-daha hunu mogobuna o-di Hagataalunga dela ne-wanga ko-Ia gi mee i-mua, gaa-wanga gi-nia dagi e-mada-hidu aalaa. Malaa, di Hagataalunga deelaa la-gaa-hana i-hongo digaula, gei digaula ga-daamada ga-wwolowwolo be nia soukohp i tama madagoaa bodobodo.

11:26  Nia dagi dogolua mai baahi nia dagi e-mada-hidu aalaa, go Eldad mo Medad, digi hula gi-di Hale-laa, e-noho-hua i-lodo di waahale-laa. Malaa, di gowaa dela e-noho-ai meemaa, gei di Hagataalunga gu-i-hongo meemaa labelaa, malaa, meemaa gu-daamada labelaa, gu-wwolowwolo be nia soukohp.

11:27  Tama-daane ga-lele-mai gi Moses ga-hagi-anga gi mee nia mee a Eldad mo Medad ala e-haihai.

11:28  Joshua tama a Nun, dela nogo hai-hegau gi Moses mai dono dulii, ga-helekai gi Moses, “Meenei, goe dugua meemaa!”

11:29  Moses ga-helekai-anga, “Goe e-hiihai bolo goe gi-iloo dogu manawa? Au bolo Dimaadua gi-haga-honu-ina nia daangada huogodoo gi dono Hagataalunga gi-wwolowwolo labelaa be nia soukohp!”

11:30  Malaa, Moses mono dagi e-mada-hidu gaa-hula labelaa gi-lodo di waahale-laa.

11:31  Muli di mee deenei, Dimaadua gaa-hai dana madangi gi-gono-mai gi-di waahale-laa deelaa, di buini manu mamaangi-‘quail’ ga-mmaangi-mai nia piidi e-dolu i-nua di gelegele. Digaula gaa-togo i-hongo di waahale-laa deelaa, mo hongo di guongo e-haganiga di waahale gaa-dae-loo gi-nia maele e-logo i-nia baahi huogodoo.

11:32  Nia daangada gu-daadaamee huoloo i-di nadau hagabudu-mai nia manu mamaangi-‘quail’ i-di laangi dogomaalia mo-di boo dogomaalia, mo-di laangi no-muli dogomaalia. Nia daangada dagidahi huogodoo ne-ogo nadau debedebe llauehe e-madalima. Digaula gaa-doho nia maa gi-di laa, e-haganiga di waahale-laa deelaa.

11:33  Di madagoaa nia goneiga digaula nogo logo hua igolo belee gai, gei Dimaadua gu-hagawelewele gi digaula, ga-hagaduadua digaula gi tau-magi damana.

11:34  Di gowaa deelaa e-haga-ingoo bolo Kibroth=Hattaavah, idimaa, deelaa di gowaa ne-danu-ai nia daangada ala ne-aumidi i-nia goneiga.

11:35  Nomuli, gei digau Israel ga-hagatanga-mai di gowaa deelaa, gaa-hula gi Hazeroth, di gowaa dela e-haga-duu-ai nadau hale-laa.