Kapingamarangi - Numbers - 28

28:1  Dimaadua ga-helekai gi Moses

28:2  gi-helekai gi digau Israel gi-heia gi God nadau tigidaumaha meegai ala e-manawa-tene ginai Mee, ala belee hai gii-hai i-nia madagoaa ala gu-haganoho bolo e-hai-ai.

28:3  Aanei nia tigidaumaha meegai ala belee wanga gi Dimaadua: nia dama-siibi-daane e-lua dagi-dahi nau ngadau, hagalee nau mee huaidu i nau gili ai, e-hai-ai nia tigidaumaha dudu i-nia laangi huogodoo.

28:4  Tigidaumaha tama-siibi e-dahi e-hai tigidaumaha luada ge e-dahi hiahi.

28:5  Tigidaumaha e-dahi e-hai mo dono tigidaumaha huwa-laagau, nia pauna e-lua palaawaa e-unugi gi-nia paini e-lua lolo-olib ala e-kaedahi e-humalia.

28:6  Deenei tigidaumaha e-hai i-nia laangi huogodoo e-dudu hagatau. Di mee deenei ne-hai matagidagi i-di Gonduu Sinai e-hai tigidaumaha meegai e-hauiha kala e-haga-manawa lamalia Dimaadua.

28:7  Duia gi-hongo di gowaa dudu-tigidaumaha nia paini e-lua waini dalia tigidaumaha tama-siibi matagidagi.

28:8  Hiahi gaa-wanga di lua dama-siibi e-hai be tigidaumaha luada, ngaadahi mo tigidaumaha waini. Deenei tigidaumaha meegai e-hauiha kala e-haga-manawa lamalia Dimaadua.

28:9  I-di Laangi-Sabad, tigidaumaha-ina nia dama-siibi-daane e-lua dagi-dahi nau ngadau, ala nau mee huaidu i nau gili ai, mo nia pauna palaawaa e-haa e-unugi gi-nia lolo-olib, e-hai-ai tigidaumaha huwa-laagau, mo tigidaumaha waini.

28:10  Tigidaumaha dudu deenei le e-hai i-nia Laangi-Sabad huogodoo, ngaadahi mo tigidaumaha dela e-haihai i-nia laangi huogodoo madalia dono tigidaumaha waini.

28:11  Heia tigidaumaha dudu ang-gi Dimaadua i taamada o-nia malama: nia damaa-kau e-lua, e-dahi siibi-daane, e-hidu dama-siibi-daane dagi-dahi nadau ngadau, hagalee huaidu nadau mee i nadau gili ai.

28:12  Wanga-ina nia palaawaa unugi gi-nia lolo-olib, e-hai-ai tigidaumaha huwa laagau, e-ono pauna palaawaa dalia di kau-daane e-dahi, nia pauna palaawaa e-haa ang-gi di siibi-daane,

28:13  ge lua pauna ang-gi tama-siibi-daane e-dahi. Nia tigidaumaha dudu aanei la nia tigidaumaha meegai ala e-hauiha kala e-haga-manawa lamalia ang-gi Dimaadua.

28:14  Tigidaumaha waini la nia paini e-haa dalia di kau-daane e-dahi, e-dolu paini dalia di siibi-daane, e-lua paini ang-gi tama-siibi-daane e-dahi. Deenei di haganoho o tigidaumaha dudu e-hai i-nia laangi matagidagi o-nia malama i-lodo nia ngadau.

28:15  Hagapuni ang-gi tigidaumaha dudu i-nia laangi huogodoo mo ono waini, tigidaumaha-ina di kuudi-daane e-hai-ai tigidaumaha wwede nia huaidu.

28:16  Tagamiami o-di Pasoobaa e-haga-laamua-ai Dimaadua, le e-hai di madangaholu maa-haa laangi o-di malama matagidagi.

28:17  Di madangaholu maa-lima laangi, taumaha e-daamada e-hai nia laangi e-hidu, e-gai nia palaawaa hagalee unugi gi-nia ‘yeast’.

28:18  Di laangi matagidagi o taumaha, goodou la-gi-dagabuli-mai e-daumaha, ge deai tangada e-hai ana moomee ai.

28:19  Heia tigidaumaha dudu meegai ang-gi Dimaadua: e-lua damaa-kau-daane, e-dahi siibi-daane, mo nia dama-siibi e-hidu dagi-dahi nadau ngadau, huogodoo nadau mee huaidu i nadau gili ai.

28:20  Heia tigidaumaha huwa-laagau gi-nia palaawaa unugi gi-nia lolo-olib: e-ono pauna dalia di kau-daane e-dahi, e-haa pauna dalia di siibi-daane,

28:21  mo e-lua pauna dalia tama-siibi-daane e-dahi.

28:22  Wanga-ina labelaa di kuudi-daane e-dahi e-hai-ai tigidaumaha wwede nia huaidu, e-hai-ai taumaha o-di haga-madammaa o-nia daangada.

28:23  Heia nia mee aanei e-hagapuni ang-gi tigidaumaha dudu ala e-hai i-nia luada huogodoo.

28:24  Heia tigidaumaha meegai ang-gi Dimaadua i-lodo nia laangi e-hidu, dela e-hauiha kala e-haga-manawa lamalia a-Mee. Heia di mee deenei e-hagapuni ang-gi tigidaumaha ala e-hai i-nia laangi huogodoo mo tigidaumaha waini.

28:25  Heia di-godou daumaha i-di hidu laangi ge deai tangada e-hai ana moomee ai.

28:26  Di laangi matagidagi o Taumaha o-di Hagadogodo o-nia Huwa-Laagau, goodou la-gi-dagabuli-mai e-daumaha e-hai tigidaumaha o-nia huwa-laagau hoou ang-gi Dimaadua, ge deai tangada e-hai ana moomee ai.

28:27  Dudu-ina tigidaumaha dela e-hauiha kala e-haga-manawa lamalia Dimaadua: nia damaa-kau-daane e-lua, e-dahi siibi-daane, ge e-hidu dama-siibi-daane, dagi-dahi nadau ngadau, huogodoo hagalee nadau mee huaidu i nadau gili ai.

28:28  Heia tigidaumaha huwa-laagau dela e-hai gi-nia palaawaa unugi gi-nia lolo-olib: e-ono pauna dalia di kau-daane e-dahi, e-haa pauna dalia di siibi daane,

28:29  ge e-lua pauna dalia tama-siibi-daane e-dahi.

28:30  Wanga-ina labelaa di kuudi-daane e-dahi e-hai-ai tigidaumaha wwede nia huaidu, deenei go taumaha o-di haga-madammaa o-nia daangada.

28:31  Heia nia mee aanei mo tigidaumaha waini e-hagapuni ang-gi nia tigidaumaha dudu ala e-hai i-nia laangi huogodoo mo huwa-laagau.