Kapingamarangi - Numbers - 35

35:1  I-hongo di gowaa maalama o Moab i-di baahi huudonu gi-golo Jordan mai Jericho, Dimaadua ga-helekai gi Moses,

35:2  “Helekai gi digau Israel bolo mai i-nia gowaa ala ne-kumi go ginaadou, digaula e-hai gi-wanga gi digau Levi nia waahale e-noho-ai digaula, mo nia gowaa ala e-haganiga nia waahale aalaa.

35:3  Nia waahale aanei e-hai nia mee ni digau Levi, gei digaula gaa-noho i-golo. Nia gowaa ala e-haganiga nadau waahale, le e-hai nia gowaa e-dugu-ai nia manu huogodoo digaula.

35:4  Nia gowaa manu digaula e-llauehe nia ‘yard’ dagi lima lau-(500) mai nia abaaba o-nia waahale gaa-hana gi-daha,

35:5  ge di-maa gaa-hai di gowaa e-haganoho be tebedebe nia ‘yard’ e-mana-(1,000) di baahi e-dahi, ge di waahale la-ga i-tungaalodo di-maa.

35:6  Goodou la-gi-wanga-ina gi digaula nia waahale pala hagammuni dangada e-ono, be tei goodou ga-dibaiaa ga-daaligi dana dangada gaa-made e-mee di-lele e-bala hagammuni i-golo. Wanga-ina labelaa gi digaula nia waahale e-madahaa maa lua,

35:7  mo nadau gowaa e-haganiga nia maa, gaa-hai nia waahale e-madahaa maa-walu.

35:8  Di logo o-nia waahale o digau Levi i-lodo nia gowaa o-nia madawaawa ala i-golo le e-ala-hua i tamana o-di gowaa.”

35:9  Dimaadua ga-helekai gi Moses

35:10  bolo gi-helekai gi digau Israel boloo: “Goodou ma-gaa-hula laa-hongo di monowai Jordan, gaa-hula gi tenua go Canaan,

35:11  goodou hilihilia godou waahale ala e-mee di-bala hagammuni ginai tangada dela ma-ga-dibaiaa ga-daaligi dana dangada gii-made.

35:12  Di gowaa deelaa, gei mee gaa-mee di tanga gi-daha mo-di hala di hui o digau o tangada dela ne-made. Tangada dela bolo gu-ihala i taaligi tangada gii-made e-deemee di-daaligi gii-made, gei mee digi heia dono gabunga.

35:13  Hilihilia nia waahale e-ono,

35:14  e-dolu i-bahi-i-dua Jordan ge e-dolu i-lodo tenua go Canaan.

35:15  Aanei le e-hai nia waahale e-pala haga-mmuni-ai digau Israel mo digau mai i-daha ala e-noho-mau be e-noho i tama madagoaa haga-bodobodo i tenua. Tangada ma-ga-dibaiaa ga-daaligi gii-made dana dangada, e-mee di-lele gi tei waahale i-nia waahale aanei.

35:16  “Maa tangada ne-hai-hegau gi-di mee-daaligi-dangada baalanga be-di hadu be-di laagau belee daaligi dana dangada, gei mee gu-ihala i taaligi tangada gii-made, mee e-hai gi-daaligi gii-made.

35:17  “Maa tangada ne-hai-hegau gi-di mee-daaligi-dangada baalanga be-di hadu be-di laagau belee daaligi dana dangada, gei mee gu-ihala i taaligi tangada gii-made, mee e-hai gi-daaligi gii-made.

35:18  “Maa tangada ne-hai-hegau gi-di mee-daaligi-dangada baalanga be-di hadu be-di laagau belee daaligi dana dangada, gei mee gu-ihala i taaligi tangada gii-made, mee e-hai gi-daaligi gii-made.

35:19  Tuaahina dela koia e-hoohoo gi tangada ne-made dela e-hai gi-daaligi gii-made tangada dela ne-daaligi dana dangada gii-made. Mee ga-gidee a-mee, gei mee ga-daaligi a-mee gii-made.

35:20  “Goe ma-ga-de-hiihai gi tangada, gaa-hono a-mee gi-lala, be e-dili a-mee bolo gii-made,

35:21  be e-dongo a-mee gi doo lima, gei goe gu-ihala i taaligi tangada gii-made, goe e-hai gi-daaligi gii-made. Tuaahina dela koia e-hoohoo gi tangada dela ne-made dela e-hai gi-daaligi goe gii-made, mee ga-gidee-ia goe, gei mee ga-daaligi goe.

35:22  “Dolomaa, goe ga-dibaiaa, ga-daaligi tangada dela hagalee de-hiihai ginai goe, ne-hono a-mee gi-lala be ne-dili a-mee.

35:23  Be dolomaa, goe e-de-gidee, ne-hudu-hua dau hadu, ga-daaligi gii-made tangada dela digi maanadu bolo e-daaligi, ge hagalee di hagadaumee ni-oou.

35:24  Di hai deenei, nia daangada di guongo e-hegeege tangada dela ne-daaligi dana dangada gii-made, hagalee go nia duaahina o tangada dela ne-made ala e-halahala di tala di hui.

35:25  Goe e-hala hua i-di daaligi gii-made tangada, gei digau di guongo belee hagamaamaa-hua goe gi-daha mo tuaahina o tangada dela ne-made, e-lahi goe gi-di waahale pala haga-mmuni dangada. Goe gaa-noho i-golo gaa-dae-loo gi-di made o tagi aamua hai-mee-dabu o-di madagoaa deelaa.

35:26  Maa goe gaa-hana gi-daha mo-di waahale pala hagammuni dangada dela ne-hana ginai goe,

35:27  gei maa tuaahina tangada dela ne-made ga-gidee-ia goe, ga-daaligi goe gii-made, di hai o-di tala di hui deenei la-hagalee dau bolo di taaligi dangada gii-made.

35:28  Tei dangada i goodou ma-ga-dibaiaa gu-daaligi dana dangada guu-made, e-hai gi-noho-hua i-lodo di waahale pala hagammuni dangada, gaa-dae-loo gi-di made o tagi aamua hai-mee-dabu, gei nomuli gei mee ga-humalia-hua di-hana gi dono hale.

35:29  Nnaganoho aanei e-hai-hegau i goodou mo godou hagadili i di-ingoo-hua di gowaa dela ga-noho-iei goodou.

35:30  “Nia daangada ala bolo gu-ihala i taaligi tangada, le e-mee-hua di hai bolo ginaadou gu-ihala ga-daaligi gii-mmade ma-ga-haga-modongoohia-mai go nia daangada hagamodongoohia mee dogolua be mada-logo. Di hagamodongoohia mai tangada e-dahi e-dee-dohu di haga-donu ana mee.

35:31  Tangada dela ne-daaligi dana dangada gii-made e-hai gi-daaligi gii-made. Mee e-deemee di-hui dono mouli gi-nia bahihadu.

35:32  “Maa tangada guu-lele gi-di waahale hagammuni dangada, gei goodou hudee dumaalia gi mee gi-huia ia gi-nia bahihadu bolo gii-mee ia di-hana gi dono hale i-mua di made o tangada hai-mee-dabu.

35:33  Maa nei bolo goodou guu-hai beenei, goodou gu-haga-milimilia tenua dela e-noho-iei goodou. Taaligi tangada gii-made e-haga-milimilia tenua. Tenua dela ne-made-ai tangada nonua le e-hagamadammaa-hua gi-nia dodo o tangada dela ne-daaligi tangada deelaa.

35:34  Hudee haga-milimilia tenua dela e-noho-iei goodou, idimaa, Au go Dimaadua, gei Au e-noho i-baahi digau Israel.”