CSlElizabeth - Sirach - 47

47:1  И по сем воста Нафан пророчествовати во дни Давидовы.

47:2  Якоже тук отлучен от жертвы мирныя, тако Давид от сынов Израилевых.

47:3  Со львы играше яко с козлищи и с медведми яко со агнцы овчими.

47:4  Во юности своей не убил ли исполина, и отят поношение от людий,

47:5  егда простре руку с каменем из пращи низложити гордыню Голиафову?

47:6  Призва бо Господа Вышняго, и вдаде в десницу его крепость низложити человека сильна на брани, вознести рог людий своих.

47:7  Сице во тмах прослави его и восхвали его во благословениих Господних, внегда носити ему венец славы.

47:8  Потреби бо враги окрест и уничижи Филистимляны противники: даже доднесь сокруши им рог.

47:9  Во всяцем деле своем даде исповедание Святому Вышнему глаголом славы:

47:10  всем сердцем своим восхвали и возлюби Сотворшаго и.

47:11  И постави певцы прямо олтареви, и звуком их услаждати пение.

47:12  Даде во праздницех благолепие и украси времена даже до скончания, внегда воспевати им имя святое Его и от утра гласити во святилищи.

47:13  Господь отя грехи его и вознесе во век рог его, и даде ему завет царский и престол славы во Израили.

47:14  По сем воста сын разумичен и сего ради обита в пространстве:

47:15  Соломон воцарися во днех мира, яко Бог препокои окрест, да созиждет дом во имя Его и да уготовит святилище во век.

47:16  Коль преумудрился еси во юности своей и наполнился еси яко река разума.

47:17  Землю покры душа твоя, и исполнил еси притчами гаданий:

47:18  пройде имя твое во островы далече, и возлюблен был еси в мире твоем.

47:19  В песнех и паримиах и во притчах и во сказаниих удивишася тебе страны.

47:20  Именем Господа Бога, нареченнаго Бога Израилева,

47:21  собрал еси яко медь злато и яко олово умножил еси сребро.

47:22  Вдал еси бока твоя женам и поработился еси телом твоим:

47:23  дал еси порок славе твоей и осквернил еси семя твое, нанести гнев на чада твоя, и умилитися о безумии твоем: еже разделитися на двое царству, и от Ефрема начатися царству непокориву.

47:24  Господь же не оставит милости Своея и не растлит от дел Своих, ниже истребит избраннаго Своего изчадий и семя возлюбившаго Его не измет.

47:25  И Иакову даде останок, и Давиду от него корень.

47:26  И почи Соломон со отцы своими

47:27  и остави по себе от семене своего людем безумие,

47:28  и умаляющася разумом Ровоама, иже отстави люди от совета своего,

47:29  и Иеровоама сына Наватова, иже сотвори согрешити Израилю и даде Ефрему путь ко греху.

47:30  И умножишася греси их зело, отступити им от земли своея:

47:31  и всяко лукавство изыскаша, дондеже месть прииде на ня.