Pohnpeian - Exodus - 25

25:1  KAUN-O ketin mahsanihong Moses,

25:2  “Ndaiong mehn Israel kan en wia kisakis ong ie. Ke ahpw ale soangen kisakis koaros me emenemen pahn pein nsenki kihda.

25:3  Kisakis pwukat pahn mihmi ni kohl, silper oh prons;

25:4  likou linen kaselel; wunen sihpw poh mei, ntahnmwel, oh poh weitahta; likou me wiawihkihda wunen kuht;

25:5  kilin wunen sihpw wol me koaduh nan poh weitahta; kilin kou kaselel; tuhke akesia;

25:6  lehn lamp akan; soangen mehn doalo lehn kei oh warpwohmwahu kan;

25:7  karnelian oh kisin takai kesempwal teikan mehn kapwata en Samworo Lapalap ihpod oh mehn kapwata perehpen mwaremware.

25:8  Aramas akan pahn wiahda Impwal sarawi ehu ong ie, pwe I en kin koukousoan nanpwungarail.

25:9  Re pahn wiahda Impwalo oh kapwate kan pahn kin wiawihda nin duwen koasoandi me I pahn kasalehiong uhk.

25:10  “Ke pahn wiahda ehu Kohpwa sang tuhke akesia, me pahn reireiki ins 45, tehlap ins 27 oh ilehki ins 27.

25:11  Ke ahpw kidimkihla loale oh liki kohl tohr, kapilkipene kohl keile ko koaros.

25:12  Wiahda rihng kohl pahieu mehn wisik oh katengediong ni neh pahieu en Kohpwao, riau apali a riau apali.

25:13  Wiahda tuhkehn wisik sang ni tuhke akesia oh kidimkihla kohl,

25:14  ke ahpw kadil tuhke ko nan rihng ko ni keile riau en Kohpwao.

25:15  Tuhke ko pahn kin mihmihte nan rihng ko oh sohte pahn kin kohsang.

25:16  Ke pahn kihdiong nan Kohpwao pelien takai riapali me I pahn kihwei, me kosonned kan ntinting powe.

25:17  “Ke pahn wiahda pweine me kohl tohr wia, me pahn reireiki ins 45 oh tehlapki ins 27.

25:18  Pil wiahda kerup riemen me perperda sang kohl,

25:19  emen pahn mi ni apali pweinen Kohpwao a emen apali. Kerup ko pahn wiawihda patehngete pweinen Kohpwao.

25:20  Ira pahn sohpeipene pohn pweinen Kohpwao oh kapapeseng pehra ko powe oh koaduhpwaldi.

25:21  Kihdiong nan Kohpwao pelien takai riapalio oh pwainkihdi pweineo.

25:22  I pahn tuhwong uhk wasao, oh pohn pweinen Kohpwao nanpwungen kerup riemeno I pahn kihong uhk kosonned koaros ong mehn Israel.

25:23  “Ke pahn pil wiahda ehu tehpel sang tuhke akesia, me pahn reireiki ins 36, tehlapki ins 18 oh ilehki ins 27.

25:24  Kohl tohr me pahn kidim oh kapilkipene kohl ni keile ko.

25:25  Wiahda mehn kolpene me tehlepe mihmi ni ins 3 oh kohl me pahn kidim mehn kolpeneo.

25:26  Wiahda rihng kohl pahieu oh katengediong ehuehu ni keimw pahieu en nehn tehpelo.

25:27  Rihng ko me pahn kol tuhkehn wa tehpelo, pahn mi limwahn keilen tehpelo.

25:28  Tuhke akesia me pahn wia tuhkehn wa tehpelo oh pahn kidikidki kohl.

25:29  Pil wiahda pileit, kep, sah, oh ekei pwohl mehn doadoahk ong ni meirong en wain. Mepwukat koaros pahn wiawihkihda kohl tohr.

25:30  Tehpel wet pahn koasoansoandiong mwohn Kohpwahn Inowo, oh ahnsou koaros pilawa sarawi mehn meirong ong ie pahn kin mi pohn tepel wet.

25:31  “Wiahda ehu dewen lamp me kohl tohr wia. Wiahkihda kapi oh inonde kohl me sukusukda. Wahntuhke kan me pahn kapwata, me iangahki wahntuhke mpwek oh teh, pahn patehngete dewen lampo.

25:32  Rah weneu pahn uhsang ni keile, siluh sang ni apali, a siluh apali.

25:33  Ni ehuehu rah weneu ko pahn kapwatki wahnrohs siluh me mwomwen masal en almond iangahki mpweke oh teh kan.

25:34  Inonden dewen lampo pahn kapwatki wahnrohs pahieu me mwomwen masal en almond iangahki mpweke oh teh kan.

25:35  E pahn mie ehu wahnrohs mpwek pahn ehuehu rah siluh ko koaros.

25:36  Mpwek kan, rah kan oh dewen lampo pahn sukusukda ehute sang ni kohl tohr.

25:37  Lamp isuh pahn wiawihda ong ni dewen lamp wet oh koasoansoandi pwe re en kin kamarainih mwowe.

25:38  Wiahkihda kohl tohr tihpw kan oh opwong kan.

25:39  Doadoahngki paun 75 en kohl tohr mehn wiahda dewen lamp oh dipwisawi kan koaros.

25:40  Ke pahn kanahieng wiepen mepwukat nin duwen koasoandi me I kasalehiong uhk pohn nahnao.