CSlElizabeth - Exodus - 36

36:1  И сотвори Веселеил и Елиав, и всяк мудрый умом, емуже дана есть премудрость и хитрость в них, разумети творити вся дела, яже ко святыни надлежащая, по всем, елика заповеда Господь.

36:2  И призва Моисей Веселеила и Елиава и вся имущыя премудрость, имже даде Бог разум в сердцы, и вся волею хотящыя приходити к делам, еже совершати я:

36:3  и взяша от Моисеа вся участия, яже принесоша сынове Израилевы на вся дела святыни творити я: и тии приимаху еще приносимая от приносящих заутра заутра.

36:4  И прихождаху вси мудрии, иже творяху дела святыни, кийждо по своему делу, еже сами делаху:

36:5  и рекоша Моисею, яко много приносят людие свыше дел, елика заповеда Господь сотворити.

36:6  И повеле Моисей, и проповеда в полце, глаголя: муж и жена ктому да не делают на начатки святыни. И возбранени быша людие ктому приносити.

36:7  И дела быша им доволна на строение творити, и преизбыша.

36:8  И сотвори всяк премудрый в делающих ризы святыни, яже суть Аарону иерею, якоже заповеда Господь Моисею.

36:9  И сотвориша ризу верхнюю от злата и синеты, и багряницы и червленицы прядены и виссона сканаго:

36:10  и изрезаша дщицы златы аки власы, еже соткати с синетою и с багряницею, и с червленицею пряденою и с виссоном сканым: дело тканое сотвориша е.

36:11  Ризы верхния придержащыяся от обоих стран,

36:12  дело тканно, между собою сплетено: от него сотвориша е по его творению, от злата и синеты, и багряницы и червленицы спрядены и виссона сканаго, якоже заповеда Господь Моисею.

36:13  И сотвориша оба камени смарагдовы состеганы вервию и обложены златом, изваяны и вырезаны ваянием печати, от имен сынов Израилевых:

36:14  и возложиша я на рамена ризы верхния камение в память сынов израилевых, якоже заповеда Господь Моисею.

36:15  И сотвориша слово, дело тканно пестротою, по делу ризы верхния, от злата и синеты, и багряницы и червленицы спрядены и виссона сканаго,

36:16  четвероуголно сугубо сотвориша логион пяди в долготу, и пяди в широту, сугубо:

36:17  и сшиста на нем швением по три камени четырми ряды: ряд камений: сардий и топазий и смарагд, ряд един:

36:18  и ряд вторый, анфракс и сапфир и иаспис:

36:19  и ряд третий, лигирий и ахат и амефист:

36:20  и ряд четвертый, хрисолиф и вириллий и онихий, окованы около златом и всаждени в злате:

36:21  и камение бяху от имен сынов Израилевых дванадесять, по именам их изваяно в печати, кийждо своим именем в дванадесять племен.

36:22  И сотвориша над логионом тресны сплетены, дело плетеное от злата чиста:

36:23  и сотвориша два щитца злата и два колца злата, и возложиша два колца злата на оба конца логиона:

36:24  и вложиша плетеницы златы в колца, со обоих стран логиона,

36:25  и в два сложения две плетеницы, и возложиша на два щитца: и возложиша на рамена ризы верхния, противу лицем к лицу.

36:26  И сотвориша два колца злата, и возложиша на два крила на край логиона, и на край созади верхния ризы, внутрьуду:

36:27  и сотвориша два колца злата, и положиша на оба рамена ризы верхния с низу его на лице по согбению свыше состава ризы верхния:

36:28  и стягнуша логион колцами, яже на нем, с колцами верхния ризы сложеными, из синеты сплетенными, во ткание ризы верхния, да не низпускается логион от ризы верхния, якоже заповеда Господь Моисею.

36:29  И сотвориша исподнюю ризу, яже под верхнюю, дело тканно, все синее:

36:30  ожерелие же во внутренней ризе, на среде швенно, сплетено, ометы имущо около ожерелие неразлучено.

36:31  И сотвориша на омете ризы внутренния долу яко процветающаго шипка пугвицы от синеты и багряницы, и червленицы прядены и виссона сканаго.

36:32  И сотвориша звонцы златы, и возложиша звонцы на ометы ризы внутренния окрест между пугвицами:

36:33  звонец злат и пугвица на омете внутренния ризы окрест, к служению, якоже повеле Господь Моисею.

36:34  И сотвориша ризы виссонныя дело тканно, Аарону и сыном его,

36:35  и клобуки из виссона, и увясло из виссона, и надраги из виссона сканаго,

36:36  и поясы их из виссона и синеты, и багряницы и червленицы прядены, дело пестрящаго, якоже заповеда Господь Моисею.

36:37  И сотвориша дщицу злату, отделение святыни от злата чиста, и написаша на ней писмена изваяна печатию: освящение Господу:

36:38  и возложиша ю на омет синь, еже бы лежати на увясле свыше, якоже заповеда Господь Моисею.