CSlElizabeth - I Chronicles - 12

12:1  И сии приидоша ко Давиду в Сикелаг, егда еще обдержимь бяше от лица Саула сына Кисова: и сии от сильных помогающе во брани,

12:2  напрязающе лук десными и шуими руками, и пращницы каменем и стрелами, от братий Сауловых от (колена) Вениамина:

12:3  князь Ахиезер, и Иоас сын Самаа Гавафита, и Иезиил, и Фалиф, сынове Замофовы, и Варахиа, и Ииуа Анафофитин,

12:4  и Самаиа Гаваонитин, сильный посреде тридесятих и над тридесятию, и Иеремиа, и Иезекииль, и Иоаннан, и Иозаваф Гадарафитин,

12:5  Елиозий, и Иеримуф, и Ваалиа, и Самариа, и Сафатиа Аруфин,

12:6  Елкана, и Иесиа, и Иелиил, и Иезаар, и Иесваам, Коритяне,

12:7  и Иоила, и Завадиа, сынове Иероамли, и иже от Гедора.

12:8  И от Гадди прибегоша к Давиду, (егда таяшеся) в пустыни, мужие крепцы и бойцы нарочити, держащии щиты и копия: лица же их яко лица львова, и легцы яко серны на горах скоростию:

12:9  Азер в первых, Авдиа вторый, Алиад третий,

12:10  Масман четвертый, Иеремиа пятый,

12:11  Иеффиа шестый, Елиил седмый,

12:12  Иоанан осмый, Ельзавель девятый,

12:13  Иеремиа десятый, Махавенай первыйнадесять.

12:14  Сии от сынов Гадовых князи воинстии, един над стом малый, великий же над тысящею:

12:15  сии иже преидоша Иордан месяца перваго: и сей наполнен во всех брезех своих: и изгнаша всех, иже живяху в юдолех от восток даже до запад.

12:16  Приидоша же от сынов Вениаминих и Иудиных на помощь Давиду.

12:17  И изыде Давид во сретение им и рече им: аще мирно приидосте ко мне, да будет сердце мое такожде к вам: аще же предати мя супостатом моим не во истине руки, да видит Бог отец наших и судит.

12:18  И облече дух Амасию князя над тридесятию, и рече: иди, Давида сыне Иессеев, и людие твои: мир, мир тебе, и мир помощником твоим, яко тебе помогает Бог твой. И восприят их Давид и постави их князей сил.

12:19  И от Манассии прибегоша к Давиду, егда идяху иноплеменницы на Саула на брань, и не поможе им Давид, яко совет быти у воевод иноплеменничих, глаголющих: с главами мужей сих обратится ко господину своему Саулу.

12:20  И егда идяше Давид в Сикелаг, прибегоша к нему от Манассии Еднай и Иозаваф, и Иавнил и Михаил и Иосафаф и Елиу и Салафий, князи над тысящами у Манассии:

12:21  сии даша помощь Давиду на полчище геддуров, вси бо крепцы силою: и беша крепцы началницы в воинстве силою.

12:22  Зане на всяк день прихождаху к Давиду на помощь ему, в силу велику, аки сила Божия.

12:23  И сия имена князей воинства, иже приидоша ко Давиду в Хеврон, да возвратят царство Саулово к нему по словеси Господню:

12:24  сынове Иудины носящии щиты и копия шесть тысящ и осмь сот, крепцы ко ополчению:

12:25  от сынов Симеоних, крепцы силою на ополчение седмь тысящ и сто:

12:26  от сынов Левииных четыри тысящы и шесть сот:

12:27  и Иодда князь от колена Аароня, и с ним три тысящы и седмь сот:

12:28  и Садок, отрок крепкий силою, и дому отца его князи двадесять два:

12:29  от сынов же Вениаминих братий Сауловых три тысящы, и еще болшая часть их наблюдаше стражбу дому Сауля:

12:30  и от сынов Ефремлих двадесять тысящ и осмь сот крепцы силою, мужие именитии по домом отечеств их:

12:31  и от полуплемене Манассиина осмьнадесять тысящ, и иже нарекошася именем, да поставят царем Давида:

12:32  от сынов Иссахаровых мужие учени, иже познаваху времена разсуждению, что сотворити имать Израиль, в начала их двести, и вся братия их с ними:

12:33  и от Завулона исходящии ко ополчению брани, со всякими оружии бранными, пятьдесят тысящ, в помощь Давиду не с праздными руками:

12:34  и от Неффалима князей тысяща, и с ними в щитах и с копиями тридесять и седмь тысящ:

12:35  и от сынов Дановых ополчающиися на брань двадесять осмь тысящ и шесть сот:

12:36  и от Асира исходящии помощи в брани четыредесять тысящ:

12:37  и со оныя страны Иордана от сынов Рувимовых и от Гадовых и от полуплемене Манассиина во всем оружии браннем сто и двадесять тысящ.

12:38  Вси сии мужие браннии управлени ко ополчению сердцем мирным: и приидоша в Хеврон, да поставят царя Давида над всем Израилем: и прочии от Израиля едино сердце бяху, да царь будет Давид.

12:39  Быша же ту с Давидов три дни, ядуще и пиюще, уготоваша бо им братия их.

12:40  И иже близ их бяху даже до Иссахара и Завулона и Неффалима, приношаху им на ослех и велблюдех, и мсках и волех пищу, муку, перевясла смоквей и гроздие сухое, вино и елей, и волы и овны во множестве, радость бо бысть во Израили.