LinVB - II Thessalonians

Chapter 1

1:1  Pólo, Silváno na Timotéo, óna bandeko ba Eklézya ya Tesaloníki, eye ezalí Eklezia ya Nzámbe Tatá wa bísó mpé ya Mokonzi Yézu Krístu :

1:2  Euti na Nzámbe Tatá na Mokonzi Yézu Krístu ngrásya na bobóto.

1:3  tosengélí kotóndo Nzámbe ntá­ngo ínso mpô ya bínó bandeko ; lokola ebongí, mpô boyambi bwa bínó boléndí míngi mpé bolingani bwa bínó bokólí mpenzá o mitéma mya bínó.

1:4  Yangó wâná tozalí kokúmisa bínó epái ya Biklé­zya bya Nzámbe mpô ya moléndé mpé boyambi bwa bínó o káti ya minyóko mpé mpási ínso bozalí koyóka.

1:5  Yangó elakísí ’te Nzámbe akokáta makambo ma bato na bosémbo, áwa akomóno ’te bolongóbání koyíngela o Bokonzi bwa Nzámbe, zambí bínó mpé bozalí koyóka mpási mpô ya bwangó.

1:6  Sôló, na bosémbo bwa yě, Nzá-mbe akoyókisa banyókoli ba bínó mpási eye bayókísí bínó.

1:7  Bôngó bínó bato bonyókwámí bokozwa bobóto mpé bopémi elongó na bísó, mokolo Mokonzi akoyâ út’o likoló elongó na bǎnzelú ba ngúyá ba yě,

1:8  o káti ya móto mokopela makási. Mokolo môná akobekola mabé ma bato babóyí kondima Nzámbe mpé ma baye bakotósaka Nsango Elámu ya Mokonzi wa bísó Yézu té.

1:9  Bakozwa etúmbu ya liwá lya sékô, bakozala mosíká na elongi ya Mokonzi, mosíká na nkémbo ya bokasi bwa yě.

1:10  Ntángo akoyâ mpô ’te ázwa nkémbo o káti ya basántu ba yě, bakokámwa na bomóni mosálá asálákí o mitéma mya bato bayambákí yě. O mokolo môná bínó mpé bokozala wâná, mpô boyambákí matéya totéyákí bínó.

1:11  Yangó wâná tozalí kosámbelela bínó ntángo ínso : Nzámbe wa bísó ákómisa bínó balongobani, bínó baye bobyángémí na yě ; na ngúyá ya yě ásálisa bínó bókokisa mikáno mya kosála malámu ná mpé misálá mínso mya boyambi bwa bínó.

1:12  Bôngó nkómbó ya Mokonzi Yézu ézwa nkémbo o mbóka bínó ; bínó mpé bózwa nkémbo elongó na yě engébéné na ngrásya ya Nzámbe wa bísó mpé ya Mokonzi Yézu Krístu.

Chapter 2

2:1  Mpô ya maye matálí Boyéi bwa Mokonzi wa bísó Yézu Krístu mpé mokolo tokosangana na yě, toséngí bínó, bandeko,

2:2  bábúlinginya mitéma mya bínó té, bátámbwisa bínó motó mpé té, áwa bakómí koloba ’te Mokolo mwa Mokonzi mobelémí, atâ balobí ’te Elímo moto ayébísí bangó bôngó, atâ balobí ’te bísó bato tolobákí tǒ tokomákí bôngó o monkandá.

2:3  Moto mǒkó ákósa bínó sókí moké té. Libosó lya Boyéi bwa Mokonzi esengélí ’te bato baíké bábóya Mokonzi mpé ‘Oyo abóyá Nzámbe’ áyâ, Oyo Akobúngama sékô.

2:4  Yě azalí Mongúná óyo akomítómbolaka likoló lya baye bánso bakotángemaka ‘Nzámbe’ tǒ baye bako­zwaka lokúmu lokóla banzámbe. Yě moto akeí kofánda atâ o ndáko esántu ya Nzámbe, mpé akomíyébisaka lokóla Nzámbe.

2:5  Bókundola o mitéma ’te nalobákí yangó na bínó ntángo nazalákí epái ya bínó.

2:6  Boyébí náni moto akokangelaka yě nzelá mpô ’te áyebana bobélé o eleko ya yě.

2:7  út’o sikáwa ngúyá ya ‘Oyo abóyá Nzámbe’ eye ebó­mbámí, ezalí kosála mosálá. Kasi libosó esengélí ’te óyo akopekisaka yě, álímwa.

2:8  Bobélé na nsima ‘Oyo abóyá Nzámbe’ akomónono. Mokonzi Yézu akolímwisa yě na mpéma ya monoko mwa yě, akoboma yě na Boyéi bwa yě bwa nkémbo.

2:9  ‘Oyo abóyá Nzámbe’ akoyâ na ngúyá ya Sátana, akosála misálá mya ngúyá ndéngé na ndéngé, akolakisa bilembo na makamwísi makokí kokósa bato.

2:10  Akosála makambo ma bokósi ndéngé na ndéngé mpô ’te bato básála mabé ; bangó bakobúngama, mpô babóyákí kondima bosôló boye bokokákí kobíkisa bangó.

2:11  Yangó wâná Nzámbe akotíndelaka bangó ngúyá eye ekobébisa mitéma mya bangó, mpô ’te báyamba mambí ma lokutá.

2:12  Bôngó, baye bánso babóyí koyamba mambí ma bosôló mpé balandí mambí mazángí bosémbo, bákita o likambo.

2:13  Kasi, tosengélí kotóndo Nzámbe ntángo ínso mpô ya bínó, zambí Mokonzi akolingaka bínó. Zambi Nzámbe aponí bínó út’o ebandela mpô ’te bóbíka na ngúyá ya Elímo, óyo akosántisaka bínó, mpé na boyambi matéya ma sôló.

2:14  Na Nsango Elámu totéyákí bínó abé­ngí bínó mpô ’te bózwa nkémbo ya Mokonzi wa bísó Yézu Krístu.

2:15  Bôngó, bandeko, bópika mpéndé mpé bókangana na matéya totéyákí bínó na monoko tǒ na monkandá.

2:16  Nzámbe Tatá wa bísó, óyo akolingaka bísó, apésí bísó na ngrásya ya yě libóndí lya sékô mpé elíkyá ya esengo ya sôló. Yě na Mokonzi wa bísó Yézu Krístu

2:17  bábóndo mitéma mya bínó mpé báléndisa bínó mpô ’te bókoka kosála mpé koloba sé mambí malámu.

Chapter 3

3:1  Lisusu bandeko, bósámbelela bísó mpô ’te Liloba lya Mokonzi lípalangana naíno, mpé lízwa nkémbo bipái bisúsu lokóla epái ya bínó.

3:2  Bósámbela mpé mpô tóbíka o mabóko ma bato babúngámá mpé ba motéma mabé, zambí bato bánso mpenzá té bazalí na boyambi.

3:3  Kasi Mokonzi akotíka bínó té : akoléndisa bínó mpé akobíkisa bínó o mabóko ma Mongúná.

3:4  Mpô ya Mokonzi tozalí kotía elíkyá na bínó ’te bokosálaka mpé bokosála maye totíndí bínó.

3:5  Mokonzi áka­mba mitéma mya bínó mpô ’te bólinga Nzámbe, mpé bózala na moléndé lokóla Krístu.

3:6  Bandeko, o nkómbó ya Mokonzi Yézu Krístu, totíndí bínó bókíma bandeko bánso balekí goigói, baye babóyí kosála lokóla totíndí bínó.

3:7  Boyébí malámu ndéngé bose­ngélí kolanda ndakisa ya bísó : ntángo tozalákí epái ya bínó, tozalákí goigói té.

3:8  Mbala yǒ kó té tolíákí límpa liye moto mosúsu apésákí bísó ; kasi butú mói tozalákí kosála mosálá, tozalákí komílembisa na mosálá mpô tómemisa mǒkó wa bínó mókúmbá té.

3:9  Ya sôló, tokokákí kosénge bínó bilóko, kasi toli­ngákí kopésa bínó ndakisa mpô ’te bósála lokóla bísó.

3:10  Kútu ntángo tozalákí epái ya bínó, totíkélákí bínó mobéko moye : Sókó moto alingí kosála mosálá té, álía mpé té.

3:11  Nzókandé toyókí ’te bato basúsu o káti ya bínó bapu­sí goigói, babóyí kosála atâ mosálá moko ; mosálá mwa bangó, sé kokóto o makambo ma bato basúsu.

3:12  O nkómbó ya Mokonzi Yézu Krís­tu tozalí kotínda mpé kopálela bato baye ’te básála mosálá na motéma nyê, bôngó bálía bilóko bazwí na mosálá mwa bangó mǒkó.

3:13  Kasi bínó, bandeko, bólembe té kosála malámu.

3:14  Sókó moto abóyí kotósa mitíndo mikomámí o monkandá moye, bóyébisa nkómbó ya yě epái ya báníngá ; bótíka yě mpô áyóka nsóni.

3:15  Nzókandé bótála yě lokóla mongúná té, kasi bópálela yě lokóla ndeko.

3:16  Mokonzi wa bobóto yě mǒkó ákabela bínó bobóto ntángo ínso mpé bipái bínso. Mokonzi ázala na bínó bánso.

3:17  Ngáí mǒkó, Pólo, nakomí maloba maye ma losáko na lobóko la ngáí. Ezalí elembo ekolakisaka minkandá mya ngáí mínso. Tálá ndéngé nakokomaka.

3:18  Ngrásya ya Mokonzi wa bísó Yézu Krístu ézala na bínó bánso.