TpiKJPB - II Thessalonians

Chapter 1

1:1  ¶ Pol, na Silvanas, na Timotias, i go long sios bilong ol lain bilong Tesalonaika insait long God, Papa bilong yumi, na Bikpela Jisas Kraist.

1:2  Marimari i go long yupela, na bel isi, i kam long God, Papa bilong yumi, na Bikpela Jisas Kraist.

1:3  Mipela i mas tok tenkyu long God long yupela olgeta taim, ol brata, olsem em i fit, bikos bilip tru bilong yupela i wok long go bikpela planti moa yet, na pasin bilong laikim tru bilong olgeta wan wan bilong yupela olgeta, wanpela i go long arapela, i pulap tru,

1:4  Inap long mipela mipela yet i givim glori long yupela long olgeta sios bilong God bilong tingim pasin bilong sanap strong long traim na bilip tru bilong yupela long olgeta hevi na ol bikpela hevi bilong yupela, dispela yupela i stap strong yet long ol.

1:5  ¶ Dispela em i wanpela mak i kamap ples klia bilong stretpela kot bilong God, inap long em i ken kaunim yupela long i gat namba inap long kingdom bilong God, long dispela yupela tu i karim hevi,

1:6  Taim yumi luksave long em i wanpela stretpela samting wantaim God long bekim pe wantaim bikpela hevi i go long ol husat i givim wari long yupela.

1:7  Na long yupela husat i pilim wari, malolo wantaim mipela, taim Bikpela Jisas bai kamap ples klia i kam long heven wantaim ol strongpela ensel bilong em,

1:8  Long paia i lait em bai bekim pe nogut long ol husat i no save long God, na husat i no bihainim gutnius bilong Bikpela bilong yumi Jisas Kraist,

1:9  Husat bai kisim mekim save wantaim bagarap olgeta bilong oltaim oltaim long pes bilong Bikpela, na long glori bilong pawa bilong em,

1:10  Taim em bai kam long kisim glori insait long ol seint bilong em, na long larim ol man tingim em wantaim laikim insait long ol olgeta husat i bilip (bilong wanem, testimoni bilong mipela namel long yupela yupela i bilipim) long dispela de.

1:11  ¶ Olsem na tu mipela beten oltaim long yupela, inap long God bilong yumi ken kaunim yupela i gat namba inap long dispela singaut, na inapim olgeta gutpela amamas bilong gutpela pasin bilong em, na wok bilong bilip tru wantaim pawa,

1:12  Inap long nem bilong Bikpela bilong yumi Jisas Kraist i ken kisim glori insait long yupela, na yupela insait long em, bilong bihainim marimari bilong God bilong yumi na Bikpela Jisas Kraist.

Chapter 2

2:1  ¶ Nau mipela askim yupela plis strong, ol brata, long kam bek bilong Bikpela bilong yumi Jisas Kraist, na long taim yumi bung wantaim i go long em,

2:2  Long yupela i no ken seksek kwiktaim insait long tingting, o pilim wari, i no long spirit tu, o long tok, o long pas olsem em i kam long mipela, olsem long de bilong Kraist i klostu.

2:3  ¶ No ken larim wanpela man giamanim yupela long wanpela rot. Long wanem, dispela de bai i no inap kam, sapos i no gat i kam wanpela taim bilong pundaun i go pastaim, na dispela man bilong sin i kamap ples klia, pikinini man bilong bagarap olgeta long hel,

2:4  Husat i mekim pasin birua na litimapim em yet antap long olgeta samting ol man i kolim God, o long ol man i lotuim, inap long em, olsem God, i sindaun insait long tempel bilong God, taim em i soim em yet long em i God.

2:5  Ating i yes long yupela i holim tingting, long, taim mi stap yet wantaim yupela, mi tokim yupela long ol dispela samting?

2:6  Na nau yupela i save wanem samting i pasim inap long em i ken kamap ples klia long taim bilong em.

2:7  Long wanem, samting hait bilong sin nogut i mekim wok pinis. Em husat nau i pasim tasol bai pasim, inap long ol i tekewe em long rot.

2:8  Na nau dispela Man Nogut bai kamap ples klia, husat Bikpela bai kaikai olgeta wantaim spirit bilong maus bilong em, na bai bagarapim olgeta wantaim lait bilong kam bek bilong em.

2:9  Yes em, husat kamap bilong em i bihainim wok bilong Seten wantaim olgeta pawa na ol mak na ol giaman samting bilong winim tingting,

2:10  Na wantaim olgeta giaman pasin bilong ol pasin i no stretpela insait long ol husat i lus olgeta. Bilong wanem, ol i no bin kisim laikim tru bilong tok tru, inap long God i ken kisim bek ol.

2:11  Na long dispela as God bai salim ol wanpela strongpela samting bilong paulim, inap long ol i ken bilipim wanpela giaman,

2:12  Inap long ol olgeta i ken lus olgeta husat i no bilipim tok tru, tasol husat i gat amamas long ol pasin i no stretpela.

2:13  ¶ Tasol mipela i mas givim tok tenkyu oltaim long God bilong tingim yupela, ol brata i stap klostu tru long bel bilong Bikpela, bilong wanem, long stat i kam inap long nau God i bin makim yupela long go long kisim bek i kam long wok bilong kamap holi bilong Spirit na bilong bilipim tok tru,

2:14  We em i singautim yupela long en long gutnius bilong yumi, inap long yupela i ken kisim glori bilong Bikpela bilong yumi Jisas Kraist.

2:15  Olsem na, ol brata, sanap strong, na holimpas ol dispela kastam mipela i bin skulim yupela, sapos em i long tok, o long pas bilong mipela.

2:16  ¶ Nau Bikpela bilong yumi Jisas Kraist em yet, na God, yes, Papa bilong yumi, husat i bin laikim yumi tru, na husat i bin givim yumi pasin bilong kisim bel isi bilong oltaim oltaim na gutpela hop long wok bilong marimari,

2:17  I ken givim bel isi long ol bel bilong yupela, na strongim yupela long olgeta wan wan gutpela tok na wok.

Chapter 3

3:1  ¶ Na las, ol brata, beten long mipela, inap long tok bilong Bikpela i ken ran fri, na kisim glori, yes, olsem em i stap wantaim yupela,

3:2  Na inap long God i ken kisim bek yumi long ol man i nogut na husat yumi i no inap stretim tingting wantaim ol. Long wanem, olgeta man i no gat bilip tru.

3:3  Tasol Bikpela em i man yu inap bilip long em, husat bai strongim yupela, na pasim yupela longwe long pasin nogut.

3:4  Na mipela i gat strongpela bilip long Bikpela long sait bilong yupela, long yupela bai mekim, na gat laik long mekim wantaim, ol dispela samting mipela i tok strong long yupela.

3:5  Na Bikpela i ken stiaim ol bel bilong yupela i go insait long laikim tru bilong God, na i go long pasin bilong sanap strong long traim taim yupela i wetim Kraist.

3:6  ¶ Nau mipela i tok strong long yupela, ol brata, long nem bilong Bikpela bilong yumi Jisas Kraist, long yupela i ken surikim yupela yet longwe long olgeta wan wan brata husat i no wokabaut stret, na i no bihainim dispela kastam em i kisim long mipela.

3:7  Long wanem, yupela yet i save long yupela i mas bihainim mipela olsem wanem. Long wanem, mipela i no wokabaut long pasin i no stret namel long yupela.

3:8  Na tu mipela i no bin kaikai nating ol kaikai bilong wanpela man. Tasol mipela i wok wantaim hatwok na hatwok wantaim pen nait na san, inap long mipela i no ken gat dinau long wanpela bilong yupela,

3:9  I no bikos mipela i no gat pawa, tasol long mekim mipela yet wanpela piksa long yupela long yupela i ken bihainim mipela.

3:10  Long wanem, yes, taim mipela i stap wantaim yupela, mipela i givim dispela strongpela tok long yupela, long sapos wanpela man i no gat laik long wok, em i no ken kaikai tu.

3:11  Long wanem, mipela i harim long i gat sampela husat i wokabaut kranki namel long yupela, taim ol i no wok liklik, tasol ol i ol man bilong sutim nus insait long samting bilong arapela.

3:12  Nau ol husat i kain olsem, mipela i tok strong na givim tok bilong strongim bel, long nem bilong Bikpela bilong yumi Jisas Kraist, inap long, wantaim pasin bilong stap isi, ol i ken wok, na kaikai ol kaikai bilong ol yet.

3:13  Tasol yupela, ol brata, no ken stap les tru long mekim gutpela pasin.

3:14  Na sapos wanpela man i no bihainim tok bilong mipela long dispela pas, luksave long dispela man, na no ken poroman wantaim em, inap long em i ken sem.

3:15  Tasol no ken kaunim em olsem wanpela birua, tasol givim strongpela skul long em olsem wanpela brata.

3:16  ¶ Nau Bikpela bilong bel isi em yet i ken givim yupela bel isi oltaim long olgeta rot. Bikpela i stap wantaim yupela olgeta.

3:17  Dispela tok gude bilong Pol wantaim han bilong mi yet, dispela em i mak insait long olgeta wan wan pas, olsem tasol mi raitim.

3:18  Marimari bilong Bikpela bilong yumi Jisas Kraist i stap wantaim yupela olgeta. Amen.