Kapingamarangi - Isaiah - 19

19:1  Deenei telekai di hai o Egypt. Dimaadua e-hanimoi hagalellele i-hongo di gololangi gi Egypt. Nia ada-god Egypt gu-bolebole i ono mua, nia daangada Egypt gu-manawa paagege nadau lodo.

19:2  Dimaadua e-helekai, “Au ga-hagangalua nia manawa o-nia daangada gi-heheebagi, nia hagahaanau ga-heheebagi, digau e-noho hoohoo ginaadou ga-heheebagi, nia waahale ala e-hagamahi e-dagi ga-heheebagi, nia king ala bolo ginaadou e-dagi ga-heheebagi gi-di lohongo be ma koai gaa-dagi.

19:3  Au ga-hunahuna nia haganohonoho digau Egypt, ga-hagahuaidu nadau hagadagadagagee. Digaula ga-halahala di hagamaamaa mai baahi nadau ada-god, ga-halahala digau ala e-leelee gi-di bouli gi-heeu-ina gi-nia hagataalunga digau mmade nadau hagamaamaa.

19:4  Au gaa-wanga digau Egypt gi-di king huaidu hagamuamua gi-dagi-ina digaula. Ko-Au, Dimaadua di Gowaa Aamua ne-helekai.”

19:5  Nia wai ga-hogoohi i-lodo di monowai Nile, ga-maangoo.

19:6  Nia madaawa di monowai ga-bagu-mai maalia ga-bilau. Nia laagau mono geinga gaa-mae ga-maangoo.

19:7  Nia hagadili huogodoo ala e-tomo i taalinga di monowai Nile ga-maangoo ga-angiangina gi-daha.

19:8  Digau huogodoo ala e-mouli mai i nadau wagadaha mai i-lodo di monowai Nile ga-manawa-gee ga-tangitangi, nadau goloo wagadaha ga-balumee-hua.

19:9  Digau ala e-hai nadau gahu ‘linen’ ga-deai nadau hagadagadagagee ai.

19:10  Digau llanga mee mo nia daane e-iloo di ngalua ga-manawa-gee ge lodo-huaidu.

19:11  Nia dagi o-di waahale Zoan le e-dadaulia! Digau kaedahi kabemee o Egypt e-wanga nadau hagamaanadu hagamaamaa dadaulia! Digaula e-helekai behee gi-di king bolo ginaadou ala e-daahi gi-muli nia lohongo o-nia king mo digau kabemee mai mua?

19:12  King o Egypt, aahee au gau hagamaamaa ala bolo e-koia e-iloo nia mee? Holongo digaula e-mee di hagi-adu nia mee a Dimaadua di Gowaa Aamua ala gu-haganoho ang-gi Egypt.

19:13  Nia dagi o Zoan mo Memphis le e-dadaulia. Digaula belee dagi tenua, gei digaula gu-dagi-gee di maa.

19:14  Dimaadua gu-haga-hinihini nadau hai helekai hagamaamaa, gaa-hidi-ai Egypt gaa-hai nia-mee hai-gee, ga-hingahinga be tangada libaliba i-hongo ono lualua.

19:15  Deai tangada i Egypt, tangada maluagina be hagaloale, hagalabagau be balu dangada, e-mee di-hagamaamaa ai.

19:16  Di madagoaa e-dau-mai, gei digau Egypt ga-mmaadagu ngoohia be nia ahina. Digaula ga-bolebole mmaadagu i-di nadau gidee Dimaadua di Gowaa Aamua e-holo dono lima belee hagaduadua digaula.

19:17  Digau Egypt ga-mmaadagu i Judah i-nia madagoaa huogodoo digaula e-maanadu di hagaodi gi-muli o nadau mouli dela gu-hagatogomaalia go Dimaadua di Gowaa Aamua.

19:18  Di madagoaa deelaa ma-ga-dau-mai, gei nia helekai Hebrew ga-hai-hegau i-lodo nia waahale e-lima i-lodo Egypt. Nia daangada i-di gowaa deelaa ga-hagamodu i-di ingoo Dimaadua di Gowaa Aamua. Di waahale e-dahi ga-hagaingoo bolo “Di waahale o-di Laa.”

19:19  Di madagoaa deelaa ma-ga-dau-mai, gei di gowaa hai tigidaumaha ang-gi Dimaadua gaa-duu i-lodo Egypt, tagabae hadu hagalangahia a-Mee gaa-duu i-di hagageinga o Egypt mo Israel.

19:20  Nia maa gaa-hai nia ada hagamodongoohia bolo Dimaadua di Gowaa Aamua la i-lodo Egypt. Di madagoaa nia daangada ala e-noho i-golo ga-hagaduadua, ga-gahigahi Dimaadua i-di hagamaamaa, gei Mee ga-hagau dana dangada e-haga-dagaloaha digaula.

19:21  Dimaadua ga-hagagida Ia gi-nia daangada o Egypt, digaula ga-hagalaamua, ga-daumaha gi Mee, ga-gaamai nadau kisakis mono tigidaumaha. Digaula gaa-hai nadau hagababa gi Mee mo-di hagagila-aga nadau hagababa ne-hai.

19:22  Dimaadua ga-hagaduadua nia daangada Egypt, nomuli ga-hagahili. Digaula gaa-huli gi Mee, Mee ga-longono nadau dangidangi ga-hagahili digaula.

19:23  Di madagoaa deelaa ma-ga-dau-mai, gei di ala damana gaa-hai mehanga Egypt mo Assyria. Nia daangada o-nia henua e-lua aanei ga-hagadau hulahula i-mehanga nnenua, ga-daumaha i-di gowaa e-dahi.

19:24  Di madagoaa deelaa ma-ga-dau-mai, gei Israel ga-aamua be Egypt mo Assyria, nia guongo e-dolu aanei gaa-hai nia haga-maluagina ni henuailala hagatau.

19:25  Dimaadua di Gowaa Aamua ga-hagamaluagina digaula, ga-helekai, “Au ga-hagamaluagina goe Egypt, go agu daangada, goe Assyria, go agu daangada ne-hai, mo goe Israel, go agu daangada ne-hilihili.”