TpiKJPB - John - 18

18:1  ¶ Taim Jisas i bin toktok long ol dispela toktok, em i go ausait wantaim ol disaipel bilong em hapsait long liklik wara Kidron, we wanpela gaden i stap, na em i go insait long dispela, na ol disaipel bilong em.

18:2  Na Judas tu, husat i putim em long han bilong birua, i save long dispela ples. Long wanem, planti taim Jisas i go long dispela hap wantaim ol disaipel bilong em.

18:3  Nau Judas, taim em i kisim wanpela liklik lain ami bilong ol man na ol ofisa long ol bikpris na ol Farisi, i kam long dispela hap wantaim ol lam na ol bombom na ol samting bilong pait.

18:4  Olsem na Jisas, taim em i save olgeta dispela samting i bai kamap long em, i go ausait, na tokim ol, Yupela i painim husat?

18:5  Ol i bekim tok long em, Jisas bilong Nasaret. Jisas i tokim ol, Mi stap dispela man. Na Judas tu, husat i putim em long han bilong birua, i sanap wantaim ol.

18:6  Nau long taim stret long em i bin tokim ol, Mi stap dispela man, ol i go bek, na pundaun long graun.

18:7  Nau em i askim ol gen, Yupela i painim husat? Na ol i tok, Jisas bilong Nasaret.

18:8  Jisas i bekim tok long ol, Mi bin tokim yupela pinis long mi stap dispela man. Olsem na sapos yupela i painim mi, larim ol dispela i go long rot bilong ol,

18:9  Inap long dispela toktok i ken kamap pinis, dispela em i tok, Bilong ol husat yu givim mi mi no bin lusim wanpela.

18:10  Nau taim Saimon Pita i gat wanpela bainat em i pulim dispela, na paitim wokboi bilong hetpris, na katim i go han sut sait ia bilong em. Nem bilong dispela wokboi em Malkas.

18:11  Nau Jisas i tokim Pita, Putim bainat bilong yu i go long paus. Dispela kap Papa bilong mi i bin givim mi, ating i yes long mi bai dringim dispela?

18:12  Nau liklik lain soldia na kepten na ol ofisa bilong ol Ju i kisim Jisas, na pasim em wantaim baklain samting,

18:13  ¶ Na stiaim em i go long Anas pastaim. Long wanem, em i tambu papa bilong Kaiafas, husat i hetpris dispela yia stret.

18:14  Nau Kaiafas em i dispela, husat i givim tok helpim long ol Ju, long em i gutpela bilong helpim long wanpela man i ken dai bilong helpim ol manmeri.

18:15  Na Saimon Pita i bihainim Jisas, na narapela disaipel i mekim olsem. Hetpris i save long dispela disaipel, na em i go insait wantaim Jisas long haus king bilong hetpris.

18:16  Tasol Pita i sanap long dua ausait. Nau dispela arapela disaipel i go ausait, husat hetpris i save long em, na toktok wantaim meri husat i lukautim dua, na em i bringim Pita insait.

18:17  Nau dispela yangpela meri husat i lukautim dua i tokim Pita, Ating i yes long yu tu i wanpela bilong ol disaipel bilong dispela man? Em i tok, Mi nogat.

18:18  Na ol wokboi na ol ofisa i sanap long dispela hap, husat i bin wokim wanpela paia long ol sakol, long wanem, em i kol. Na ol i hatim skin bilong ol yet. Na Pita i sanap wantaim ol, na hatim skin bilong em yet.

18:19  Nau hetpris i askim Jisas long ol disaipel bilong em, na long skul bilong em.

18:20  Jisas i bekim tok long em, Mi toktok ples klia long dispela graun. Oltaim mi givim skul long sinagog, na long tempel, we ol Ju i go olgeta taim. Na mi no bin tokim wanpela samting hait.

18:21  Bilong wanem yu askim mi? Askim ol husat i harim mi pinis long wanem samting mi bin tokim ol. Lukim, ol i save mi tok wanem.

18:22  Na taim em i bin toktok olsem, wanpela bilong ol ofisa husat i sanap klostu i paitim Jisas wantaim pes bilong han bilong em, i spik, Yu bekim tok long hetpris olsem?

18:23  Jisas i bekim tok long em, Sapos mi bin mekim toktok i nogut, stap witnes bilong dispela nogut. Tasol sapos gutpela, bilong wanem yu paitim mi?

18:24  Nau Anas i bin salim em, pas wantaim baklain, i go long hetpris Kaiafas.

18:25  Na Saimon Pita i sanap na hatim skin bilong em yet. Olsem na ol i tokim em, Ating i yes long yu tu i wanpela bilong ol disaipel bilong em? Em i tok nogat long en, na tok, Mi nogat.

18:26  Wanpela bilong ol wokboi bilong hetpris, husat i kandre bilong em husat Pita i bin katim ia bilong em i go, i tok, Ating i yes long mi lukim yu long gaden wantaim em?

18:27  Pita nau i tok nogat gen, na wantu tasol kakaruk man i singaut.

18:28  ¶ Nau ol i stiaim Jisas i go lusim Kaiafas i go long haus kot. Na em i moning tru. Na ol ol yet i no go insait long haus kot, nogut ol i ken kamap doti, tasol inap long ol i ken kaikai long pasova.

18:29  Nau Pailat i go ausait long ol, na tok, Yupela i sutim wanem tok i birua long dispela man?

18:30  Ol i bekim na tokim em, Sapos em i no wanpela raskol, mipela i no bin givim em i go long yu.

18:31  Nau Pailat i tokim ol, Yupela kisim em, na jasim em bilong bihainim lo bilong yupela. Olsem na ol Ju i tokim em, Em i tambu long lo long mipela i ken mekim wanpela man i dai,

18:32  Inap long dispela toktok bilong Jisas i ken kamap pinis, dispela em i toktok bilong mekim klia wanem dai em i mas dai long en.

18:33  Nau Pailat i go insait long haus kot gen, na singautim Jisas, na tokim em, Yu King bilong ol Ju?

18:34  Jisas i bekim tok long em, Yu toktok long dispela samting long yu yet, o ol arapela i bin tokim yu dispela long sait bilong mi?

18:35  Pailat i bekim tok, Mi wanpela Ju? Kantri bilong yu yet na ol bikpris i bin givim yu long mi. Yu bin mekim wanem?

18:36  Jisas i bekim tok, Kingdom bilong mi i no bilong dispela graun. Sapos kingdom bilong mi i bilong dispela graun, orait ol wokboi bilong mi bai pait, inap long ol man i no inap givim mi long ol Ju. Tasol nau kingdom bilong mi i no kam long hia.

18:37  Olsem na Pailat i tokim em, Yu stap wanpela king nau? Jisas i bekim tok, Yu tok long mi wanpela king. Long kamap long dispela mak mama i karim mi, na long dispela as mi kam long dispela graun, inap long mi ken stap witnes long tok tru. Olgeta wan wan husat i bilong tok tru i harim nek bilong mi.

18:38  Pailat i tokim em, Tok tru em i wanem samting? Na taim em bin mekim dispela tok, em i go ausait gen long ol Ju, na tokim ol, Mi no lukim wanpela asua long em liklik.

18:39  Tasol yupela i gat wanpela kastam, long mi mas lusim wanpela i go long yupela long pasova. Olsem na yupela i gat laik long mi ken lusim King bilong ol Ju i go long yupela?

18:40  Nau olgeta i singaut gen, i spik, I no dispela man, tasol Barabas. Nau Barabas em i wanpela raskol stilman.