Kapingamarangi - Jonah

Chapter 1

1:1  Dahi laangi-hua, Dimaadua ga-helekai gi Jonah, tama-daane Amittai,

1:2  “Hana gi Nineveh di waahale damana. Hagi-anga gi digaula bolo Au gu-longono-e-Au nia huaidu digau o-di waahale deelaa.”

1:3  Gei-ogo Jonah gaa-hana gaa-lele gi tuai gowaa hagammuni i Dimaadua. Mee gaa-hana gi Joppa, ga-gidee-ia di wagabaalii i-golo, dela belee hana gi Spain. Mee gaa-hui dono paases, gaa-hana i-di wagabaalii belee lele hagammuni i Dimaadua.

1:4  Dimaadua ga-hagabagibagia di moana, di madangi gu-damanaiee, guu-gono maaloo dangihi huoloo gaa-hidi-ai digau o-di wagabaalii, guu-hai bolo di wagabaalii la-ga-mooho.

1:5  Digau o-di wagabaalii huogodoo gu-mmaadagu huoloo, tangada-nei mo tangada-nei ga-gahigahi dono god bolo gi-hagamaamaa-ina ginaadou. Digaula gaa-kili gi-daha nia goloo di wagabaalii bolo gi-maamaa di waga. Di madagoaa nia mee aanei ne-hai, Jonah guu-hana gi-lala guu-kii danu-mmoe i-lodo di wagabaalii.

1:6  Di gaabinu di wagabaalii ga-gidee-ia a-mee i-golo, ga-helekai gi mee, “E-hai behee? Goe e-mee di-kii? Nnoinua, dangi-anga gi doo God gi-hagamaamaa-ina gidaadou. Holongo Mee ga-dumaalia-mai gi gidaadou gi-dee-mmade.”

1:7  Digau o-di wagabaalii ga-helekai i nadau mehanga, “Gidaadou ga-hudihudi i tadau mehanga be-di ma koai dela ne-hidi-ai di haingadaa deenei.” Digaula ga-hudihudi, gaa-gida bolo ma go Jonah.

1:8  Digaula ga-helekai gi mee, “Dumaalia, hagia-mai gi gimaadou be di ma koai dela ne-hidi-ai di haingadaa deenei? Goe tangada e-hai dau-aha? Goe ne-hanimoi i-hee? Goe tangada o-hee? Dehee do henua?”

1:9  Jonah ga-helekai gi digaula, “Au tangada Hebrew. Au e-daumaha gi Yihowah, go di God o-di langi dela ne-hai di moana mo nnenua.”

1:10  Gei mee ga-haga-modongoohia ang-gi digaula dono lele hagammuni i Dimaadua. Digau o-di wagabaalii gu-mmaadagu huoloo ga-helekai gi mee, “E-huaidu go dau hai dela ne-hai!”

1:11  Di madangi gu-damanaiee huoloo, malaa, digau o-di wagabaalii ga-heeu gi Jonah, “Ma di aha dela e-hai go gimaadou adu gi-di-goe gei di madangi la-gaa-kila?”

1:12  Jonah ga-helekai gi digaula, “Goodou taiaga-ina au, hudua gi-lodo di moana, gei di-madangi gaa-kila. Au gu-iloo bolo ma ko-au dela ne-hidi-ai goodou gaa-tale gi-di madangi deenei.”

1:13  Gei-ogo digau di wagabaalii gu-hagamahi belee aalo gi-hoohoo gi-tongo-tai, gei di-maa e-deemee i-di madangi e-gono huoloo.

1:14  Gei digaula ga-dangidangi gi Dimaadua, ga-helekai, “Meenei Dimaadua, gimaadou e-dangidangi-adu bolo gi-hudee hagaduadua-ina gimaadou gii-mmade i-di madau daaligi taane deenei gii-made! Ma Kooe hua, meenei Dimaadua, dela ne-gaamai gi gimaadou di haingadaa deenei, ma Kooe dela ne-hai nia hagadilinga mee aanei.”

1:15  Malaa, digaula ga-taiaga a Jonah gaa-hudu gi-lodo tai, malaa, i-di madagoaa-hua deelaa, di tai gu-limalima-hua, gu-bapaba.

1:16  Di mee deenei ne-hai gaa-hidi-ai digau di wagabaalii gu-mmaadagu huoloo i Dimaadua, gaa-hai di-nadau tigidaumaha, e-hai di-nadau hagababa bolo ginaadou ga-hai-hegau gi Mee.

1:17  Gei-ogo Dimaadua ga-hagau-mai dana iga damanaiee, gaa-holo a Jonah. Gei-ogo Jonah guu-noho i-lodo tinae o-di iga deelaa i-nia laangi e-dolu ge dolu boo.

Chapter 2

2:1  Jonah ga-dalodalo ang-gi Dimaadua go dono God mai i-lodo tinae o-di iga deelaa, ga helekai:

2:2  “Meenei Dimaadua! Mai i-lodo dogu haingadaa, au gu-gahigahi-adu Goe, gei Goe gu-helekai-mai gi-di-au. Au gu-gahigahi-adu Goe mai i-lodo di gowaa o digau mmade, e-dangidangi i dogu hagamaamaa, gei Goe gu-longono-e-Goe au.

2:3  Goe guu-hudu au gi-lodo di gowaa llala i taluiha di moana, di gowaa dela e-haganiga-iei au go di moana mo au beau llauehaa gu-haga-holi i ogu nua.

2:4  Au gu-hagamaanadu bolo Goe gu-hagabagi au, gei au gu-deemee hogi di-mmada gi-di Hale Daumaha dabuaahia.

2:5  Di moana gu-haga-holi au, gu-hagamelemu au, di tai gu-hagaholi au, gei nia geinga o lodo-tai guu-didi dogu libogo.

2:6  Gei au gu-hana-loo guu-noho i tono nia gonduu, i-lodo tenua dela e-tai dono abaaba gaa-hana-hua beelaa. Meenei Dimaadua go dogu God, Goe gu-hila-mai gi-di-au, gu-laha-aga au gi-daha mo-di gowaa llala.

2:7  Dogu hagalongo-ia i-di-au bolo dogu mouli la-gu-ngudu-mai, meenei Dimaadua, malaa, au gu-dalodalo-adu gi-di-Goe, gei Goe gu-hila-mai gi-di-au i-lodo do Hale Daumaha dabuaahia.

2:8  Digau ala e-daumaha gi-nia balu-ieidu gu-diiagi nadau manawa-dahi adu gi-di-Goe.

2:9  Gei au ga-daahili-adu gi-di-Goe i taahili hagaamu. Au gaa-hai dagu tigidaumaha adu gi-di-Goe, ga-haga-gila-aga dagu mee dela ne-hagababa-adu gi-di-Goe. Meenei Dimaadua, di hagamouli le e-hanimoi i doo baahi!”

2:10  Malaa, Dimaadua ga-helekai gi-di iga bolo gi-buia-aga a Jonah, gei di iga deelaa gaa-bui-aga a Jonah gi tongotai.

Chapter 3

3:1  Dimaadua ga-helekai labelaa ang-gi Jonah, ga-helekai,

3:2  “Hana gi-di waahale damana go Nineveh. Hagi-anga-ina gi digaula agu helekai ala ne-hai-adu gi-di-goe.”

3:3  Gei Jonah gu-haga-gila-aga di manawa o Dimaadua, guu-hana gi Nineveh. Nineveh la di waahale damanaiee. Nia daangada ma-ga-taele e-waalooloo i-nia laangi e-dolu gaa-dau-laa i-di baahi gi-golo di waahale.

3:4  Jonah ga-daamada gaa-hana i-lodo di waahale deelaa, malaa i-muli-hua dono hana i-di laangi e-dahi, geia ga-daamada ga-hagahaga-iloo bolo i-muli nia laangi e-madahaa gei-ogo di waahale Nineveh la-ga-haga-mooho!

3:5  Digau o-di waahale Nineveh gu-hagadonu nnelekai a God, malaa, digaula guu-donu ginai bolo nia daangada huogodoo gi-haga-hiigai-ina ginaadou, mai digau aamua gaa-tugi i digau ala lligi. Digaula huogodoo gii-gahu i-nia gahu haga-manawa-gee, e-haga-modongoohia-aga di-nadau huli hoou.

3:6  Di madagoaa di king o Nineveh ga-longono-ia di mee deenei, geia ga-du-gi-nua gi-daha mo dono lohongo-king, ga-liagi dono gahu-laa-tua, gaa-gahu gi-nia gahu haga-manawa-gee, gaa-hana gaa-noho gi-lodo nia lehu,

3:7  gaa-hai dana haga-iloo gi digau o-di waahale Nineveh boloo, “Deenei di haganoho mai baahi di king mo ana gau aamua, bolo deai tangada e-miami ai. Nia daangada huogodoo mono kau mono siibi hagalee e-miami be e-inu nia wai.

3:8  Nia daangada huogodoo mono manu huogodoo gi-ulu nia gahu haga-manawa-gee, huogodoo gi-dalodalo hagamahi ang-gi God. Tangada-nei mo tangada-nei gi-diagia ana hangahaihai huaidu ge e-hala!

3:9  Holongo God gaa-huli dono manawa, ga-hagalee hagawelewele, gei gidaadou ga-hagalee mmade!”

3:10  God gu-iloo nia mee ala ne-hai go digaula, gu-iloo labelaa di-nadau huli gi-daha mo nadau ihala, gei Mee guu-huli dono manawa gu-hagalee wanga gi digaula di hagaduadua damana dela ne-hagatogomaalia gi digaula.

Chapter 4

4:1  Gei-ogo Jonah gu-manawa-gee huoloo gi-di mee deenei, geia gu-hagawelewele,

4:2  ga-dangi-anga gi Dimaadua, “Meenei Dimaadua, ma hagalee deenei dagu mee dela ne-helekai-iei au adu gi-di-Goe i-mua dogu hagatanga gi-daha mo lodo dogu guongo?! Deelaa-laa ne-hidi-ai-iei au ga-hagamahi gaa-lele gi Spain. Au gu-iloo-eau bolo Goe go di God dumaalia ge aloho. Nia madagoaa huogodoo gei Goe e-manawa hagakono ge dumaalia. Nia madagoaa huogodoo gei Goe e-mee di-huli do manawa, hagalee e-hagaduadua nia daangada.

4:3  Meenei Dimaadua, Goe daawa gi-daha dogu mouli. Dogu made la-koia e-humalia i dogu mouli.”

4:4  Dimaadua ga-helekai gi mee, “E-hai behee? Do hagawelewele le e-donu?”

4:5  Jonah ga-hagatanga gi-daha mo-di waahale deelaa, gaa-hana gaa-noho i-di baahi gi-dua di waahale, gaa-hai dana dama-hale e-haga-malu-ieia di laa, gaa-noho i-lala di hale deelaa, e-talitali di mee dela ga-hai ang-gi Nineveh.

4:6  Gei-ogo Yihowah=God ga-haga-tomo-aga di laagau belee haga-malu a Jonah gi-manawa lamalia a-mee. Jonah gu-tenetene huoloo gi-di laagau deenei.

4:7  Malaa, heniheni-loo di laangi nomuli, gei-ogo God ga-hagau dana manu-gai-laagau e-gai nia aga di laagau, gei di laagau deelaa guu-made.

4:8  Malaa, i-muli di laa ne-hobo, God ga-hagau-mai dana madangi welengina mai bahi-i-dua, gei Jonah gu-hagalibeina i-di welengina o-di laa gu-dowwaina dono libogo, geia ga-helekai, “Dogu made le e-koia e-humalia i dogu mouli.”

4:9  God ga-helekai gi Jonah, “E-hai behee? Do hagawelewele gi-di laagau le e-donu?” Jonah ga-helekai gi mee, “Uaa, Meenei, dogu hagawelewele deenei le e-donu, gei dogu hagawelewele deenei le e-mee-hua di-daaligi au!”

4:10  Dimaadua ga-helekai, “Di laagau deenei ne-tomo-aga-hua i-di boo hua e-dahi, gaa-lawa gaa-mmade hua luada di laangi deelaa, gei goe digi hai dau mee gi-di laagau deenei, gei goe digi haga-tomo-ina-aga di-maa, gei goe e-aloho-ai!

4:11  Malaa, dehee-laa tamanaiee o dogu aloho i digau o-di waahale deenei go Nineveh, di waahale damanaiee huoloo. I-lodo di waahale deenei, la nia dama nadau huaidu ai dogologowaahee i-hongo di lau-madalua-mana-(120,000), mo nia manu logowaahee labelaa!”