Kapingamarangi - Leviticus - 6

6:1  Dimaadua gaa-wanga gi Moses nia haganoho aanei:

6:2  Tigidaumaha le e-hai gii-hai, maa tangada i goodou gu-ihala ang-gi Dimaadua i dono dee-hiihai e-wanga gi-muli di mee dono duaahina Israel ne-dugu i dono baahi, be e-gaiaa dana mee i-baahi o-mee, be e-halahalau a-mee gaa-kae di mee a-maa,

6:3  be e-hai dana kai-dilikai i-di mee dela ne-ngala gaa-hai dana hagamodu bolo ia digi gidee-ia di-maa.

6:4  Maa tangada ga-ihala i-nia hala aanei, gei mee e-hai gii-hui di mee deelaa, idimaa mee gu-kai-dilikai. Di laangi dela ga-modongoohia dana hala dela ne-hai, gei mee e-hai gii-hui gi-muli gi dono duaahina Israel nia goloo huogodoo aalaa, e-hagapuni labelaa ginai dahi baahi e-lima nia maa.

6:5  Maa tangada ga-ihala i-nia hala aanei, gei mee e-hai gii-hui di mee deelaa, idimaa mee gu-kai-dilikai. Di laangi dela ga-modongoohia dana hala dela ne-hai, gei mee e-hai gii-hui gi-muli gi dono duaahina Israel nia goloo huogodoo aalaa, e-hagapuni labelaa ginai dahi baahi e-lima nia maa.

6:6  Gei mee e-hai gi-gaamai gi tangada hai-mee-dabu dana siibi-daane be-di kuudi-daane dela ono milimilia ai, e-hai dana tigidaumaha e-haga-donu ang-gi Dimaadua. Di hui o-di manu deelaa le e-daudali-hua di mee dela gu-haganoho.

6:7  Tangada hai-mee-dabu ga-tigidaumaha di-maa e-hai tigidaumaha wwede nia huaidu o-maa, gei ono huaidu ga-maahede.

6:8  Dimaadua ga-helekai gi Moses

6:9  bolo gi-hagi-anga-ina gi Aaron mo ana dama-daane nia haganoho di hai-tigidaumaha dudu. Tigidaumaha dudu le e-dugu-hua i-hongo di gowaa dudu tigidaumaha i-di boo dogomaalia, gei di ahi le e-hai-hua gii-gaa.

6:10  Gei tangada hai-mee-dabu le e-ulu di gahu-lloo ‘linen’ mo dono bida gahu-wae ‘linen’, ga-daa gi-daha nia luaahi ala i-hongo di gowaa dudu tigidaumaha gaa-dugu nia maa i-baahi di gowaa dudu tigidaumaha.

6:11  Nomuli gei mee ga-ulu ono huai goloo, gaa-kae nia luaahi aalaa gi-daha mo-di waahale gi-di gowaa dela e-madammaa ang-gi di hai-daumaha.

6:12  Di ahi dela i-hongo di gowaa dudu tigidaumaha le e-hai-hua gi-gaagaa, hagalee hai gii-made. I-nia luada huogodoo, gei tangada hai-mee-dabu le e-hai gi-wanga ana dohomu gi-di-maa, ga-hagatau gi-hongo di-maa nia tigidaumaha dudu, gaa-dudu nia kiliidi o-di tigidaumaha hagadaubuni.

6:13  Di ahi dela i-hongo di gowaa dudu tigidaumaha le e-hai-hua gi-gaagaa i-nia madagoaa huogodoo, hagalee hai gii-made.

6:14  Aanei nia haganoho o-di hai-tigidaumaha huwa-laagau. Tangada hai-mee-dabu mai di madawaawa Aaron e-hai gi-wanga gi Dimaadua tigidaumaha huwa-laagau i-mua di gowaa dudu tigidaumaha.

6:15  Gei mee gaa-kae ana palaawaa i-hongo dono babaalima mono lolo, mo nia ‘incense’ e-wanga gi-hongo di-maa, gaa-dudu i-hongo di gowaa dudu tigidaumaha, e-hai di hagamodongoohia bolo nia mee huogodoo gu-tigidaumaha ang-gi Dimaadua. Di hauiha o tigidaumaha deenei le e-haga-tenetene di manawa o Dimaadua.

6:16  Digau hai-mee-dabu gaa-gai nia palaawaa ala ne-dubu. E-hai gii-hai nia palaawaa ne-daa malaa hagalee wanga ginai nia ‘yeast’, gaa-gai i-lodo di gowaa dabu, i-lodo di abaaba di Hale-laa dela e-noho Dimaadua no-lodo. Dimaadua guu-wanga gi digau hai-mee-dabu tigidaumaha deenei e-hai nadau duhongo i tigidaumaha meegai. Tigidaumaha deenei le e-dabuaahia huoloo, e-hai gadoo be tigidaumaha wwede nia huaidu mo tigidaumaha haga-donu.

6:17  Digau hai-mee-dabu gaa-gai nia palaawaa ala ne-dubu. E-hai gii-hai nia palaawaa ne-daa malaa hagalee wanga ginai nia ‘yeast’, gaa-gai i-lodo di gowaa dabu, i-lodo di abaaba di Hale-laa dela e-noho Dimaadua no-lodo. Dimaadua guu-wanga gi digau hai-mee-dabu tigidaumaha deenei e-hai nadau duhongo i tigidaumaha meegai. Tigidaumaha deenei le e-dabuaahia huoloo, e-hai gadoo be tigidaumaha wwede nia huaidu mo tigidaumaha haga-donu.

6:18  I-di waalooloo o-di madagoaa dela ga-dau-mai, gei nia daane huogodoo di madawaawa Aaron le e-mee-hua di gai nia palaawaa aanei, idimaa ma tuhongo ni digaula mai i-nia meegai ala ne-tigidaumaha ang-gi Dimaadua. Maa tangada i-daha mo digau aanei gaa-bili gi tigidaumaha meegai deenei, le e-huaidu ang-gi deia, idimaa tigidaumaha deelaa le e-dabuaahia.

6:19  Dimaadua gaa-wanga gi Moses nia haganoho aanei

6:20  i-di hai o-di hagadabu tangada hai-mee-dabu mai di madawaawa Aaron: I-di laangi dela e-hagadabu-iei mee, gei mee e-tigidaumaha ang-gi Dimaadua ana pauna palaawaa e-lua (e-logo be nia mee ala e-hai-tigidaumaha huwa-laagau i-nia laangi huogodoo), di baahi e-dahi luada, di hoo di baahi la hiahi.

6:21  Di palaawaa deenei le e-unugi gi-nia lolo gaa-dunu i-hongo di mee pilain mee. Nomuli gei mee ga-ginigini di-maa ga-tigidaumaha gadoo be tigidaumaha huwa-laagau. Di hauiha o di-maa le e-haga-tenetene di manawa o Dimaadua.

6:22  Digau huogodoo di madawaawa Aaron ala ma-gaa-hai nnegau o tagi aamua hai-mee-dabu le e-hai gii-hai tigidaumaha deenei i-nia madagoaa huogodoo. Nia mee aanei le e-hai gii-dudu hagatau e-hai tigidaumaha ang-gi Dimaadua.

6:23  Tangada e-gai dana mee i tigidaumaha huwa-laagau dela ma-ga-tigidaumaha go tangada hai-mee-dabu ai, huogodoo e-hai gii-dudu.

6:24  Dimaadua ga-helekai gi Moses,

6:25  bolo gi-hagi-anga-ina gi Aaron mo ana dama-daane nia haganoho aanei i-di hai o tigidaumaha wwede nia huaidu: Di manu dela e-hai di mee e-tigidaumaha wwede nia huaidu, le e-daaligi i-baahi ngeia di gowaa dudu tigidaumaha, i-di gowaa dela e-daaligi-ai nia manu ang-gi tigidaumaha dudu. Tigidaumaha deenei le e-dabuaahia huoloo.

6:26  Tangada hai-mee-dabu dela ma-ga-tigidaumaha di manu deenei le e-hai gii-gai nia goneiga di manu i-lodo di gowaa dabu, i-lodo di abaaba di Hale-laa Dimaadua.

6:27  Tangada, be-dahi mee dela ma-gaa-bili gi-nia goneiga o-di manu deelaa, le e-huaidu ang-gi deia, idimaa di manu deelaa le e-dabu. Ma nia dodo o-di manu gaa-tale gi-di-ingoo-hua di gahu, gei di gahu deelaa e-hai gi-nnogu i-lodo di gowaa dabu.

6:28  Nia goneiga di manu gaa-dunu i-lodo di boolo dela ne-hai gi-nia gelegele, gei nomuli, ohoina di boolo deelaa. Gei di-maa gaa-dunu i-lodo di boolo ne-hai gi-nia baalanga, gei di-maa e-hai gii-olo ga-gaugau gi-nia wai.

6:29  Nia daane huogodoo di madahaanau o tangada hai-mee-dabu le e-mee-hua di-gai tigidaumaha deenei. Tigidaumaha deenei le e-dabuaahia huoloo.

6:30  Maa digaula gaa-kae nia dodo o-di manu deelaa gi-lodo di Hale-laa e-hai-hegau i taumaha e-tigidaumaha e-wwede nia huaidu, nia goneiga o-di manu deelaa la hagalee gai, e-hai gii-dudu.