Kapingamarangi - Malachi

Chapter 1

1:1  Nnelekai a Dimaadua ne-hai gi Malachi bolo gi-agoago-ina ang-gi digau Israel.

1:2  Dimaadua ga-helekai gi ana daangada, “Au nogo aloho i goodou i-nia madagoaa huogodoo.” Digaula ga-helekai, “Dehee dau hai ne-haga-modongoohia do aloho i gimaadou?” Dimaadua ga-helekai, “Esau mo Jacob tagahaanau, malaa, go Jacob mo dono madawaawa dela gu-aloho-iei Au.

1:3  Gei Esau mo dono madawaawa, Au gu-de-hiihai ginai. Au gu-oho nia gowaa gonduu a Esau ge gu-diiagi di gowaa deelaa ang-gi nia manu lodo-geinga-‘jackal’.”

1:4  Dolomaa di madawaawa Esau, ala go digau Edom, ga-helekai, “Madau waahale la-gu-mooho, gei gimaadou ga-haga-duu-aga labelaa.” Gei Dimaadua Koia e-Aamua ga-helekai, “Dumaalia-anga gi digaula e-haga-duu-aga labelaa nadau waahale, gei Au gaa-oho labelaa. Digau o-di guongo Edom ga-haga-ingoo boloo, ‘Di guongo huaidu,’ gei ga-haga-ingoo labelaa boloo, ‘Tenua gu-noho-hua beelaa i-lala di hagawelewele o Dimaadua.’ ”

1:5  Nia daangada Israel gaa-bida mmada-hua di mee deenei gi nadau golomada, ga-helekai, “Dimaadua le e-mogobuna huoloo, e-mogobuna hogi i-nia henua ala i-daha mo Israel!”

1:6  Dimaadua Koia e-Aamua ga-helekai gi digau hai-mee-dabu, “Nia dama e-hagalabagau nadau maadua, gei nia daangada hai-hegau e-hagalabagau nadau dagi. Malaa, Au go di-godou Damana, ma e-aha goodou hagalee hagalabagau Au? Au go di-godou dagi, ma e-aha goodou hagalee hagalaamua Au? Goodou e-haga-balumee Au, gei goodou e-heeu, ‘Dehee di-madau haga-balumee Goe?’

1:7  Goodou e-haga-balumee Au, mai di-godou hai-tigidaumaha gi-nia meegai deai dono dahidamee ai i-hongo dagu gowaa dudu tigidaumaha. Gei goodou e-heheeu, ‘Dehee di-madau hai dela hagalee hagalaamua Goe?’ Au ga-helekai-adu, ‘Mai di-godou haga-balumee dagu gowaa hai-tigidaumaha.’

1:8  I-di-godou gaamai godou manu deegida, be-di manu magi, be-di manu habehabe belee tigidaumaha mai gi-di-Au, e-hai behee, goodou e-hagamaanadu bolo deenei le e-donu? Maa goodou ma-gaa-wanga gi-di-godou gobinaa nia hagadilinga manu beenei, e-hai behee, mee e-tenetene gaa-hai-adu gi goodou dana hagahumalia?”

1:9  Goodou digau hai-mee-dabu, goodou tangi-anga gi God gi-hila-mai gi gidaadou. Mee ga-hagalee hila-adu gi goodou, idimaa, goodou e-hala.

1:10  Dimaadua Koia e-Aamua ga-helekai, “Au bolo dahi dangada i goodou gi-taidia di bontai di Hale-Daumaha, e-duuli goodou gi-daha gi-dee dudu di ahi dono dahidamee ai i-hongo dagu gowaa dudu-tigidaumaha. Au hagalee e-manawa-tene gi goodou, gei Au hagalee e-manawa-tene e-kae di-godou tigidaumaha ma-ga-gaamai gi-di-Au.

1:11  Nia daangada huogodoo i-nia madagoaa huogodoo i henuailala e-hagalabagau Au. Nia madagoaa huogodoo e-dudu nadau ‘incense’ mai gi-di-Au, mo-di hai nadau tigidaumaha ala e-tau-anga. Digaula huogodoo e-hagalabagau Au!

1:12  Gei goodou hagalee hagalabagau Au, i godou helekai bolo dagu gowaa hai-tigidaumaha la-hagalee dahidamee, mo di-godou haga-balumee labelaa nia meegai ala e-tigidaumaha go goodou i-di gowaa deelaa.

1:13  Goodou e-helekai boloo, ‘Gimaadou gu-duadua di hai nia mee aanei!’ Gei goodou e-haga-modongoohia-aga di-godou de-hiihai mai gi-di-Au. Goodou e-tigidaumaha mai gi-di-Au di manu gaiaa be-di manu habehabe be-di manu magi. E-hai behee, goodou e-maanadu bolo Au e-manawa-tene di-kae di-godou hagadilinga tigidaumaha deenei?

1:14  Tangada halahalau-dangada dela ne-hagababa bolo ia ga-tigidaumaha dana manu humalia mai gi-di-Au, gei mee ga-tigidaumaha dana manu deai dono dahidamee ai. Mee gu-halauwa, idimaa, Au go Dimaadua Koia e-Aamua, Au go di King aamua, gei-ogo nia daangada huogodoo o-nia henua e-mmaadagu i-di-Au.”

Chapter 2

2:1  Dimaadua Koia e-Aamua ga-helekai gi digau hai-mee-dabu, “Deenei taganoho adu gi goodou:

2:2  Godou hangahaihai gii-hai di mee e-haga-modongoohia-aga di-godou hagalabagau Au. Maa goodou hagalee hagalongo-mai gi dagu mee dela e-hai-adu gi goodou, gei Au ga-haga-halauwa goodou. Au ga-dugu-anga di halauwa gi-hongo nia hagadilinga mee ala e-kae go goodou i-di-godou hai di moomee o digau hai-mee-dabu. Au guu-lawa di-haga-halauwa nia maa, idimaa, goodou digi hagalabagau agu haganoho.

2:3  Au ga-hagaduadua godou dama, mo-di mmili godou golomada gi-nia duudae-manu o godou manu ala e-tigidaumaha. Au gaa-kili goodou gi-hongo di hagabae duudae-manu.

2:4  Goodou ga-iloo-laa bolo ma ko-Au dela ne-gowadu gi goodou taganoho deenei. Gei di hagababa ang-gi digau hai-mee-dabu o-di madawaawa Levi la-hagalee mooho.

2:5  “I-lodo dagu hagababa, Au ne-hagababa ang-gi digaula di mouli mo-di aumaalia humalia. Au guu-wanga gi digaula nia mee huogodoo aanei, bolo gii-mee di-nadau hagalabagau Au. Malaa, di madagoaa hua deelaa, gei digaula gu-hagalabagau Au mo-di mmaadagu i-di-Au.

2:6  Digaula gu-agoago digau ala i-golo di hai o-nia mee donu, hagalee go nia mee hala. Nadau hangahaihai i ogu mua le e-humalia, hagalee bolo anga-hua gi ginaadou e-haihai nia mee donu, gei e-hagamaamaa digau dogologo gi-dugua gi-daha nadau haihai huaidu.

2:7  Deenei tegau o digau hai-mee-dabu, bolo gi-aago-ina digau ala i-golo bolo gi-iloo-ginaadou di tonu o God. Nia daangada e-hai gii-hula gi-baahi digaula gi-iloo-ai di hai o dogu manawa, idimaa, aanei go digau kae-hegau ni Dimaadua Koia e-Aamua.

2:8  “Dolomeenei, goodou digau hai-mee-dabu, goodou guu-nngala i-di ala dela e-donu. Godou agoago ne-hidi-ai digau dogologo gaa-hai nia mee hala. Goodou gu-haga-hala di hagababa dela ne-hai-adu gi goodou.

2:9  Malaa, godou haihai aanei ne-hidi-iei Au, gaa-hai digau Israel gi-haga-balumee-ina goodou, idimaa, goodou hagalee hagalongo-mai gi dogu manawa, mo di-godou hilihili dangada i-di godou haihai agoago ang-gi digaula.”

2:10  E-hai behee? Gidaadou huogodoo hagalee tadau Damana hua e-dahi? E-hagalee donu bolo ma di God hua e-dahi dela ne-hai gidaadou? Ma e-aha gidaadou e-oho tadau hagababa i tadau mehanga? Ma e-aha gidaadou e-haga-balumee di hagababa a God dela gu-hai-anga gi tadau maadua-mmaadua?

2:11  Digau Judah guu-oho di-nadau hagababa ang-gi God, ge guu-hai di huaidu huoloo i-lodo Jerusalem mo i-lodo Israel hagatau. Digaula gu-haga-milimilia di Hale-Daumaha o Dimaadua dela e-aloho-ai. Nia daane gu-hai-lodo gi nia ahina ala e-daumaha gi-nia god tuadimee.

2:12  Dimaadua gi-daawa-ina gi-daha mo digau Israel digau ala ne-hai di mee deenei, hagalee dumaalia-anga gi digaula gii-buni gi di-madau hai-tigidaumaha o di-madau guongo dela e-hai-anga gi Dimaadua Koia e-Aamua.

2:13  Deenei di mee e-hai labelaa go goodou: Nia wai o godou golomada gu-haga-hontula di gowaa hai-tigidaumaha o Dimaadua i tangitangi, idimaa, Mee gu-hagalee hila-adu gi godou haihai tigidaumaha ang-gi de-Ia.

2:14  Goodou e-heheeu be di-maa e-aha Mee dela hagalee manawa-tenetene gi godou haihai tigidaumaha. Idimaa, Mee e-iloo-Ia bolo goodou guu-oho di-godou hagababa ne-hai gi godou lodo i-di godou madagoaa nogo dama-daane. Di ahina deenei la di hoo ni-oou, gei goe dela guu-oho dau hagababa dela ne-hai gi mee, ma e-aha maa goe gu-hagababa i-mua o God bolo goe ga-manawa-dahi ang-gi Mee.

2:15  God guu-hai bolo goolua guu-hai-hua tuaidina mo-di hagataalunga hua e-dahi. Dehee di hai a-Maa ne-hai di mee deenei? Idimaa, goodou gi-hagadili godou dama ala go nia daangada donu a God. Gei goodou gii-pula i goodou, gi-dee oho di-godou hagababa ang-gi godou lodo.

2:16  Dimaadua Koia e-Aamua dela go di God o Israel ga-helekai, “Au e-de-hiihai huoloo gi-di maewae taga-hai-lodo! Au e-de-hiihai huoloo gi dahi dangada i goodou e-hai tagadilinga huaidu deenei ang-gi dono lodo. Malaa, goodou gii-bida hagadina-ina goodou gi-humalia gi-dee oho-hua di-godou hagababa dee-odi ang-gi godou lodo.”

2:17  Dimaadua gu-duadua i godou helekai! Goodou e-heheeu, “Dehee tadau hai ne-hai gaa-hidi-iei Mee ga-duadua?” Mai i godou helehelekai boloo, “Dimaadua e-hagamaanadu bolo nia daangada huogodoo ala guu-hai di huaidu, aanei go digau ala e-humalia, gei e-donu, Mee e-hila-anga gi digaula.” Be mai i godou heheeu boloo, “Dehee di God dela bolo Ia e-donu?”

Chapter 3

3:1  Dimaadua Koia e-Aamua ga-helekai, “Au ga-hagau dagu dangada kae-hegau e-hagatogomaalia dogu ala i ogu mua. Malaa, di Tagi dela e-talitali go goodou ga-limalima-hua ga-hanimoi gi-lodo di Hale-Daumaha. Tangada kae-hegau dela e-talitali go goodou bolo e-mmada ginai, ga-hanimoi ga-hagadele dagu hagababa.”

3:2  Ma koai dela e-mee di-manawa-maaloo, e-duu-aga i-di laangi dela e-hanimoi-iei Mee? Koai dela e-mee di-mouli i-di madagoaa dela ma-ga-gila-mai-iei Mee? Mee gaa-hai gadoo be-di ‘soap’ dela koia e-maaloo, gadoo labelaa be-di ahi dela e-haga-madammaa nia baalanga.

3:3  Mee ga-hanimoi e-hai dana gabunga, gadoo be tangada dudu baalanga, e-haga-madammaa ana silber. Tangada kae-hegau a Dimaadua ga-haga-madammaa digau hai-mee-dabu, gadoo be tangada ngalua baalanga dela e-haga-madammaa ana silber mono goolo, gei digau hai-mee-dabu aalaa ga-gaamai gi Dimaadua nia hagadilinga tigidaumaha ala e-donu.

3:4  Malaa, nia tigidaumaha digau Judah mo Jerusalem ga-gaamai gi Dimaadua, la-ga-haga-tenetene dono manawa, gadoo be-di hai dela ne-hai i-mua.

3:5  Dimaadua Koia e-Aamua ga-helekai, “Au ga-hanimoi ga-gabunga goodou. Au gaa-hai di haga-modongoohia dela e-hai-baahi ang-gi digau ala e-hai nadau buubuu, mo digau ala e-hai be nia manu, mo digau ala e-hai-kai tilikai, mo digau ala e-halahalau nadau gau hai-hegau, mo e-halahalau nia ahina guu-mmade nadau lodo, mo nia dama guu-mmade nadau maadua, mo digau tuadimee. Au ga-hai-baahi ang-gi digau huogodoo ala hagalee hagalabagau Au.

3:6  “Au go Dimaadua, Au hagalee huli. Deenei di hai ne-hidi-ai goodou, go di madawaawa Jacob digi odi gi-daha.

3:7  Goodou e-hai gadoo be godou maadua-mmaadua ala ne-kili gi-daha agu haganoho hagalee haga-gila-aga. Malaa, goodou huli-mai gi-di-Au, gei Au ga-huli-adu gi goodou. Malaa, goodou ga-heeu, ‘Dehee di-madau mee e-hai gii-hai, gei gimaadou gaa-huli adu gi-di-Goe?’

3:8  Au ga-heeu labelaa, ‘E-hai behee, ma e-donu bolo tangada e-mee di-halahalau a God?’ Deeai! Gei goodou e-halahalau Au! Malaa, goodou ga-heeu, ‘Dehee di-madau hai dela e-halahalau Goe?’ Mai i-nia hangaahai o godou tigidaumaha, go dahi baahi e-madangaholu i godou maluagina mo godou tigidaumaha ala i-golo.

3:9  Goodou huogodoo gu-halauwa, idimaa, digau o tenua deenei huogodoo gu-halahalau Au.

3:10  Goodou gi-gaamai gi-lodo di Hale-Daumaha dahi baahi e-madangaholu o godou goloo huogodoo, gi-dohu-ai nia meegai i-di gowaa deelaa. Goodou gi-hagamada-ina Au i-di hai o ogu mogobuna, gei goodou ga-gidee bolo Au ga-huge-adu gi goodou nia bontai llauehe o-di langi, mo-di llingi-adu gi goodou nia hagadilinga hagahumalia ala llauehe.

3:11  Au hagalee dumaalia-anga gi nia manu gai laagau gi-hunahuna-ina godou laagau. Godou laagau-‘grape’ gaa-huwa huoloo.

3:12  Digau nnenua huogodoo ga-haga-ingoo goodou bolo digau maluagina, idimaa, di-godou henua gaa-hai di gowaa noho humalia.”

3:13  Dimaadua ga-helekai, “Goodou e-helekai huaidu i-di-Au, gei goodou e-heeu, ‘Ma di-aha gu-helekai-iei gimaadou i-di-Goe?’

3:14  Goodou gu-helekai, ‘Hagalee dahidamee go tadau hai-hegau ang-gi God. Dehee tahidamee tadau haga-gila-aga ana helekai, be e-hagamada e-haga-modongoohia ang-gi Dimaadua Koia e-Aamua bolo gidaadou e-lodo-huaidu gi-nia mee ala ne-hai go gidaadou?

3:15  Tadau hai e-mmada gi digau ala e-hagapuu, aanei go digau ala e-manawa lamalia. Digau huaidu e-kila humalia, gei digaula e-hagamada di manawa-hagakono a God gi nadau haihai huaidu, gei digaula digi kae di-nadau hagaduadua.’ ”

3:16  Gei-ogo digau ala e-mmaadagu i Dimaadua e-hagadau-leelee i nadau mehanga, gei Dimaadua gu-hagalongo mo-di hila-anga gi nadau helekai. Nia ingoo o digau ala e-mmaadagu i Dimaadua mo-di hagalaamua di ingoo o-Maa la-guu-hihi gi-lodo di beebaa i-mua nia golomada o-Maa.

3:17  Dimaadua Koia e-Aamua ga-helekai, “Digau aanei gaa-hai agu daangada. Di laangi ma-ga ngalua-iei Au, gei digaula gaa-hai nia daangada donu ni-aagu. Gei Au ga-manawa-dumaalia-anga gi digaula, gadoo be tamana dela e-manawa-dumaalia ang-gi dana dama dela e-hai-hegau ang-gi deia.

3:18  Goodou gaa-mmada labelaa gi-di hai-geegee o digau ala e-donu mo digau ala e-huaidu, digau ala e-hai-hegau mai gi-di-Au, mo digau ala hagalee hai-hegau mai gi-di-Au.”

Chapter 4

4:1  Dimaadua Koia e-Aamua ga-helekai, “Dahi laangi ga-hanimoi, gei-ogo nia daangada huogodoo ala e-hagamuamua mo-di haihai huaidu gaa-dudu gadoo be nia geinga maangoo. Di laangi deelaa digaula huogodoo gaa-wwele, deai tangada e-dubu i digaula ai.

4:2  Gei goodou ala e-hagalongo-mai gi-di-Au, goodou gaa-noho i-lala agu mogobuna haga-mouli, dela e-hai gadoo be-di laa dela e-hobo i godou nua, dela e-hagahumalia godou mouli. Goodou ga-maahede mo-di tenetene, gadoo be tamaa-kau dela ma-gaa-ulu gi-daha mo-di abaaba.

4:3  Dogu laangi ma-ga-ngalua, goodou ga-aali i digau huaidu, gei digaula gaa-hai gadoo be nia gelegele dogolia ala i-lala godou babaawae.

4:4  “Goodou gi-langahia nnaganoho dagu dangada hai-hegau go Moses, nia haganoho mono mee ne-haga-noho ala ne-wanga ko-Au gi mee i-hongo di Gonduu Sinai, bolo digau Israel huogodoo gi-hagalongo ginai.

4:5  “Gei Au ga-hagau-adu gi goodou dagu soukohp Elijah i-mua di laangi aamua ge haga-madagudia o Dimaadua dela gaa-dae-mai.

4:6  Mee ga-hagabudu-mai labelaa ga-hagahumalia mehanga nia damana mo nadau dama. Maa deeai, ko-Au hua ga-hanadu ga-hagahuaidu di-godou henua.”