VulgConte - Sirach - 18

18:1  Qui vivet in æternum, creavit omnia simul. Deus solus iustificabitur, et manet invictus Rex in æternum.

18:2  Quis sufficit enarrare opera illius?

18:3  Quis enim investigabit magnalia eius?

18:4  Virtutem autem magnitudinis eius quis enunciabit? Aut quis adiiciet enarrare misericordiam eius?

18:5  Non est minuere, neque adiicere, nec est invenire magnalia Dei.

18:6  Cum consummaverit homo, tunc incipiet: et cum quieverit, aporiabitur.

18:7  Quid est homo, et quæ est gratia illius? Et quid bonum, aut quid nequam illius?

18:8  Numerus dierum hominum ut multum centum anni: quasi gutta aquæ maris deputati sunt: et sicut calculus arenæ, sic exigui anni in die ævi.

18:9  Propter hoc patiens est Deus in illis, et effundit super eos misericordiam suam.

18:10  Vidit præsumptionem cordis eorum quoniam mala est, et cognovit subversionem illorum quoniam nequam est.

18:11  Ideo adimplevit propitiationem suam in illis, et ostendit eis viam æquitatis.

18:12  Miseratio hominis circa proximum suum: misericordia autem Dei super omnem carnem.

18:13  Qui misericordiam habet, docet, et erudit quasi pastor gregem suum.

18:14  Miseretur excipientis doctrinam miserationis, et qui festinat in iudiciis eius.

18:15  Fili in bonis non des querelam, et in omni dato non des tristitiam verbi mali.

18:16  Nonne ardorem refrigerabit ros? Sic et verbum melius quam datum.

18:17  Nonne ecce verbum super datum bonum? Sed utraque cum homine iustificato.

18:18  Stultus acriter improperabit: et datus indisciplinati tabescere facit oculos.

18:19  Ante iudicium para iustitiam tibi, et antequam loquaris disce.

18:20  Ante languorem adhibe medicinam, et ante iudicium interroga teipsum, et in conspectu Dei invenies propitiationem.

18:21  Ante languorem humilia te, et in tempore infirmitatis ostende conversationem tuam.

18:22  Non impediaris orare semper, et ne verearis usque ad mortem iustificari: quoniam merces Dei manet in æternum.

18:23  Ante orationem præpara animam tuam: et noli esse quasi homo qui tentat Deum.

18:24  Memento iræ in die consummationis, et tempus retributionis in conversatione faciei.

18:25  Memento paupertatis in tempore abundantiæ, et necessitatum paupertatis in die divitiarum.

18:26  A mane usque ad vesperam immutabitur tempus, et hæc omnia citata in oculis Dei.

18:27  Homo sapiens in omnibus metuet, et in diebus delictorum attendet ab inertia.

18:28  Omnis astutus agnoscit sapientiam, et invenienti eam dabit confessionem.

18:29  Sensati in verbis et ipsi sapienter egerunt: et intellexerunt veritatem et iustitiam, et impleverunt proverbia et iudicia.

18:30  Post concupiscentias tuas non eas, et a voluntate tua avertere.

18:31  Si præstes animæ tuæ concupiscentias eius, faciat te in gaudium inimicis tuis.

18:32  Ne oblecteris in turbis nec in modicis: assidua enim est commissio illorum.

18:33  Ne fueris mediocris in contentione ex fœnore, et est tibi nihil in sacculo: eris enim invidus vitæ tuæ.