VulgSistine - Sirach - 36

36:1  Miserere nostri Deus omnium, et respice nos, et ostende nobis lucem miserationum tuarum:

36:2  et immitte timorem tuum super Gentes, quae non exquisierunt te, ut cognoscant quia non est Deus nisi tu, et enarrent magnalia tua.

36:3  Alleva manum tuam super Gentes alienas, ut videant potentiam tuam.

36:4  Sicut enim in conspectu eorum sanctificatus es in nobis, sic in conspectu nostro magnificaberis in eis,

36:5  ut cognoscant te, sicut et nos cognovimus quoniam non est Deus praeter te Domine.

36:6  Innova signa, et immuta mirabilia.

36:7  Glorifica manum, et brachium dextrum.

36:8  Excita furorem, et effunde iram.

36:9  Tolle adversarium, et afflige inimicum.

36:10  Festina tempus, et memento finis, ut enarrent mirabilia tua.

36:11  In ira flammae devoretur qui salvatur: et qui pessimant plebem tuam, inveniant perditionem.

36:12  Contere caput principum inimicorum, dicentium: Non est alius praeter nos.

36:13  Congrega omnes tribus Iacob: ut cognoscant quia non est Deus nisi tu, et enarrent magnalia tua: et hereditabis eos, sicut ab initio.

36:14  Miserere plebi tuae, super quam invocatum est nomen tuum: et Israel, quem coaequasti primogenito tuo.

36:15  Miserere civitati sanctificationis tuae Ierusalem, civitati requiei tuae.

36:16  Reple Sion inenarrabilibus verbis tuis, et gloria tua populum tuum.

36:17  Da testimonium his, qui ab initio creaturae tuae sunt, et suscita praedicationes, quas locuti sunt in nomine tuo prophetae priores.

36:18  Da mercedem sustinentibus te, ut prophetae tui fideles inveniantur: et exaudi orationes servorum tuorum

36:19  secundum benedictionem Aaron da populo tuo, et dirige nos in viam iustitiae, et sciant omnes qui habitant terram, quia tu es Deus conspector saeculorum.

36:20  Omnem escam manducabit venter, et est cibus cibo melior.

36:21  Fauces contingunt cibum ferae, et cor insensatum verba mendacia.

36:22  Cor pravum dabit tristitiam, et homo peritus resistet illi.

36:23  Omnem masculum excipiet mulier: et est filia melior filia.

36:24  Species mulieris exhilarat faciem viri sui, et super omnem concupiscentiam hominis superducit desiderium.

36:25  Si est lingua curationis, est et mitigationis et misericordiae: non est vir illius secundum filios hominum.

36:26  Qui possidet mulierem bonam, inchoat possessionem: adiutorium secundum illum est, et columna ut requies.

36:27  Ubi non est sepes, diripietur possessio: et ubi non est mulier, ingemiscit egens.

36:28  Quis credit ei, qui non habet nidum, et deflectens ubicumque obscuraverit, quasi succinctus latro exiliens de civitate in civitatem?