VulgSistine - Sirach - 11

11:1  Sapientia humiliati exaltabit caput illius, et in medio magnatorum consedere illum faciet.

11:2  Non laudes virum in specie sua, neque spernas hominem in visu suo.

11:3  brevis in volatilibus est apis, et initium dulcoris habet fructus illius.

11:4  In vestitu ne glorieris umquam, nec in die honoris tui extollaris: quoniam mirabilia opera Altissimi solius, et gloriosa, et absconsa, et invisa opera illius.

11:5  Multi tyranni sederunt in throno, et insuspicabilis portavit diadema.

11:6  Multi potentes oppressi sunt valide, et gloriosi traditi sunt in manus alterorum.

11:7  Priusquam interroges, ne vituperes quemquam: et cum interrogaveris, corripe iuste.

11:8  Priusquam audias, ne respondeas verbum: et in medio sermonum ne adiicias loqui.

11:9  De ea re, quae te non molestat, ne certeris: et in iudicio peccantium ne consistas.

11:10  Fili ne in multis sint actus tui: et si dives fueris, non eris immunis a delicto. si enim secutus fueris, non apprehendes: et non effugies, si praecucurreris.

11:11  Est homo laborans, et festinans, et dolens impius, et tanto magis non abundabit.

11:12  Est homo marcidus egens recuperatione, plus deficiens virtute, et abundans paupertate:

11:13  et oculus Dei respexit illum in bono, et erexit eum ab humilitate ipsius, et exaltavit caput eius: et mirati sunt in illo multi, et honoraverunt Deum.

11:14  Bona et mala, vita et mors, paupertas et honestas a Deo sunt.

11:15  Sapientia et disciplina, et scientia legis apud Deum. Dilectio, et viae bonorum apud ipsum.

11:16  Error et tenebrae peccatoribus concreata sunt: qui autem exultant in malis, consenescunt in malo.

11:17  Datio Dei permanet iustis, et profectus illius successus habebit in aeternum.

11:18  Est qui locupletatur parce agendo, et haec est pars mercedis illius.

11:19  in eo quod dicit: Inveni requiem mihi, et nunc manducabo de bonis meis solus:

11:20  et nescit quod tempus praetereat, et mors appropinquet, et relinquat omnia aliis, et morietur.

11:21  Sta in testamento tuo, et in illo colloquere, et in opere mandatorum tuorum veterasce.

11:22  Ne manseris in operibus peccatorum. Confide autem in Deo, et mane in loco tuo.

11:23  Facile est enim in oculis Dei subito honestare pauperem.

11:24  Benedictio Dei in mercedem iusti festinat, et in hora veloci processus illius fructificat.

11:25  Ne dicas: Quid est mihi opus, et quae erunt mihi ex hoc bona?

11:26  Ne dicas: Sufficiens mihi sum: et quid ex hoc pessimabor?

11:27  In die bonorum ne immemor sis malorum: et in die malorum ne immemor sis bonorum:

11:28  quoniam facile est coram Deo in die obitus retribuere unicuique secundum vias suas.

11:29  Malitia horae oblivionem facit luxuriae magnae, et in fine hominis denudatio operum illius.

11:30  Ante mortem ne laudes hominem quemquam, quoniam in filiis suis agnoscitur vir.

11:31  Non omnem hominem inducas in domum tuam: multae enim sunt insidiae dolosi.

11:32  Sicut enim eructant praecordia foetantium, et sicut perdix inducitur in caveam, et ut caprea in laqueum: sic et cor superborum, et sicut prospector videns casum proximi sui.

11:33  Bona enim in mala convertens insidiatur, et in electis imponet maculam.

11:34  A scintilla una augetur ignis, et ab uno doloso augetur sanguis: homo vero peccator sanguini insidiatur.

11:35  Attende tibi a pestifero, fabricat enim mala: ne inducat super te subsannationem in perpetuum.

11:36  Admitte ad te alienigenam, et subvertet te in turbine, et abalienabit te a tuis propriis.