Kapingamarangi - Isaiah - 40

40:1  “Haga-manawa lamalia-ina agu daangada,” deenei la-go tadau God e-helehelekai, “Haga-manawa lamalia-ina digaula.

40:2  Haga-maaloo-ina-aga nia daangada o Jerusalem, hagi-anga-ina gi digaula bolo gu-duainau nadau hagaduadua, gei dolomeenei nadau huaidu la-gu-maahede. Au ne-hagaduadua digaula i nadau huaidu huogodoo.”

40:3  Di lee e-wolowolo boloo, “Hagatogomaalia-ina di ala i-lodo di anggowaa ang-gi Dimaadua. Haga-aadee-ina di ala i-lodo di anggowaa e-haele-ai tadau God.

40:4  Haga-honu-ina nia mehanga gonduu, hagababa-ina nia gonduu, nia dama-gonduu la-gi-malallali, gei nia gowaa dungadunga la-heia gii-baba.

40:5  Gei di madamada o Dimaadua la-ga-modongoohia-aga, gei nia daangada huogodoo ga-gidee-ginaadou di-maa. Ma go Dimaadua dela ne-hagababa dana mee deenei.”

40:6  Di lee e-wolowolo boloo, “Hagadele-ina ana helekai!” Gei au ga-heeu, “Nia helekai bolo-aha e-hagadele ko-au?” “Hagadele-ina bolo nia daangada huogodoo le e-hai be nia geinga-tolo, digaula hagalee mouli duai i-nia akai lodo-geinga.

40:7  Nia geinga mono akai e-popo i-di madagoaa Dimaadua ga-ili nia maa gi dono madangi. Nia daangada le e-hai gadoo beenei, hagalee maaloo i-nia geinga.

40:8  Uaa, nia geinga mo ono akai le e-popo, gei-ogo nia helekai o tadau God e-noho-hua beelaa.”

40:9  Jerusalem, hana gi-tomo di gonduu duuduu i-nua, hagadele-ina di longo humalia! Zion, wolowolo gi-nua i doo lee gahigahi! Hagadele-ina di longo humalia ge hudee madagu. Hagi-anga-ina gi-nia waahale o Judah bolo di-nadau God ga-hanimoi!

40:10  Di Tagi go Yihowah ga-hanimoi gaa-dagi gi-nia mogobuna, e-laha-mai madalia Ia digau ala ne-haga-dagaloaha ko-Ia.

40:11  Mee ga-benebene dana hagabuulinga-siibi be tangada hagaloohi-siibi. Mee ga-hagabudu nia dama gi-di gowaa e-dahi, gaa-lahi digaula i-hongo ono lima, gei Mee ga-dagi-mai nia dinana digaula hagahumalia i ono muli.

40:12  Ma iai tangada i-golo e-mee di-hagatau di moana gi-lodo ono babaalima be e-hagatau di langi i-nua gi ono lima? Ma iai tangada i-golo e-mee di-haa nia gelegele o henuailala gi-lodo di ibu, be e-pauna nia gonduu mono gowaa noho-nua gi-hongo di-mee manamana-mee?

40:13  Ma iai tangada i-golo e-mee di-helekai gi Dimaadua bolo gi-heia nia mee belee hai? Ma koai dela e-mee di-aago a-Mee be e-mee di-helekai gi Mee bolo gi-daudalia?

40:14  Ma iai tangada i-golo e-mee di-daudali dono manawa go Dimaadua, gaa-kabe gi-iloo ge gi-modongoohia a-Mee nia mee ala belee hai?

40:15  Nia henua llauehe la-hagalee nia mee ang-gi Dimaadua, e-hai-hua be nia madaua-wai. Nia henua ala e-mogowaa le e-maamaa be nia gohu gelegele.

40:16  Nia manu huogodoo lodo-geinga o Lebanon la-hagalee dohu di tigidaumaha ang-gi tadau God, gei nia laagau ala i-golo la-hagalee dohu di akaa di ahi e-dudu nia tigidaumaha.

40:17  Nia henua la-hagalee di mee gi Mee, nadau hadinga gi Mee ai.

40:18  Ma koai dela e-hagatau ang-gi God? Dehee dau hai e-haga-modongoohia a-Mee?

40:19  Mee hagalee hai be-di ada-balu-god dela ne-hai go nia daangada, dela ne-hai go digau hai-baalanga i di-nadau hii di maa gi-nia goolo, ga-haga-noho i-hongo di gowaa silber.

40:20  Tangada dela e-deemee di-hui ana goolo be nia silber, geia e-halahala ana laagau ala hagalee bala, geia ga-halahala dana dangada paa-mee dela e-mee di-paa di ada-balu-god, ga-haga-duu gii-mau gi-dee hinga.

40:21  Goe e-de-iloo-e-goe? Digi hagia-adu gi-di-goe nia mee ne-hai namua? Goe digi hagalongo gi-di hai o henuailala ne-daamada?

40:22  Maa ne-hai go Mee dela e-noho i-hongo dono lohongo-king i-bahi-i-nua o henuailala mo i-mugi-nua di ahiaalangi, gei nia daangada ala i-bahi-i-lala e-mmada hagalligi-loo ginai be nia loada. Mee ne-holo gi-daha di langi i-nua gii-hai gadoo be-di gahu dela e-hai be-di hale-laa dela e-noho-ai nia daangada.

40:23  Mee ga-daa gi-daha nia mogobuna o-nia dagi o-nia guongo, gaa-hai digaula gi-hagalee nia mee.

40:24  Digaula e-hai gadoo be nia laagau ala dogo tomo-aga lligi, ala hua dogo matilitili ono aga. Di madagoaa Dimaadua ga-hagau-mai dana madangi, gei nia maa ga-maangoo ga-angiangina be nia geinga maangoo.

40:25  Ma koai dela e-hagatau gi God dabuaahia? Ma iai tangada i-golo e-hai be mee?

40:26  Mmada gi-di gili di langi i-nua. Ma koai dela ne-hai nia heduu ala e-mmada ginai goodou? Go Mee go tangada dela e-dagi digaula be digau-dauwa. Mee e-iloo be nia heduu e-hia aalaa, ge e-haga-ingoo digaula gi nadau ingoo! Deai di heduu e-dahi e-ngala ai, mai i ono mogobuna dela e-maaloo huoloo!

40:27  Israel, goe e-aha dela e-hai oo donu gi Dimaadua bolo Mee e-de-iloo-Ia o haingadaa be e-dehei-e-Ia do madagoaa nia daangada ma-ga-hagahuaidu goe?

40:28  Goe e-de-iloo-e-goe? Goe digi hagalongo? Dimaadua dela go di God dono hagaodi ai. Mee ne-hai henuailala hagatau, Mee hagalee duadua be e-buhi. Deai tangada e-iloo ana maanadu ai.

40:29  Mee e-hagamaaloo-aga digau ala e-paagege ge e-duadua.

40:30  Nia dama ala e-lligi, ga-paagege labelaa. Nia dama-daane e-mee di-too i nadau paagege.

40:31  Gei digau ala e-hagadonu Dimaadua i nadau hagamaamaa, ga-gidee-ginaadou di hagamaaloo-aga hoou. Digaula ga-maangi gi-nua i-hongo nadau bakau be nia manu-‘eagle’. Digaula gaa-llele hagalee maanu, digaula ga-haele hagalee paagege.