LinVB - Jonah

Chapter 1

1:1  Yawe alobi na Yona, mwana wa Amitayi, maloba maye :

1:2  « Te­leme, kende o engumba enene Ninive, mpe yebisa bango ’te nakomi koyeba mabe ma bango. »

1:3  Yona akei, kasi akani kokima epai ya Tarsis, mosika na Yawe. Akomi o Yope, akuti masuwa malingi makende o Tarsis elongo na bani­nga, mosika na Yawe.

1:4  Kasi Yawe atindi mompepe makasi likolo lya mbu, ekumbaki enene eningisi ya­ngo, masuwa mali­ngi mabukana.

1:5  Bato ba masuwa babandi kobanga. Moto na moto aba­ndi kobelela nko­mbo ya nzambe wa ye. Mpo ya kokutola bozito bwa masuwa, ba­bwaki biloko biike o mai. Yona oyo akitaki kin’o nkobe, azalaki kolala wana mpe mpongi ekangaki ye.

1:6  Kapiteni wa masuwa abelemi na ye mpe alobi : « Boni, yo ozali kolala mpongi boye ? Teleme mpe belela Nzambe wa yo ! Mbele akokanisa biso mpe biso tokokufa te. »

1:7  Bato ba masuwa balobani : « Malamu tobete zeke, toyeba nani azali ntina ya likambo liye ! » Zeke babeti elakisi Yona.

1:8  Balobi na ye : « Yebisa biso nani azali ntina ya lika­mbo liye. Outi wapi ? Ozali moto wa mokili kani ? Ekolo ya yo nani ? »

1:9  Yona azongiseli bango : « Nazali mo-Ebrei, nakosambelaka Yawe Nzambe wa likolo oyo akeli mbu enene na nse mobimba. »

1:10  Bato ba masuwa bayoki nsomo enene, batuni ye : « Osali nini ? », mpo bayoki o lisolo lya ye ’te azalaki ko­kima mosika na Yawe.

1:11  Batuni ye : « Tosala yo nini mpo mai matombokela biso lisusu te ? », mpa­mba te mai matombwami makasi mpenza.

1:12  Azongisi : « Bokanga ngai mpe bobwaka ngai o mai mpo mai motomboko lisusu te. Nayebi ’te mompepe mwa ekumbaki eye moyei se mpo ya ngai. »

1:13  Bato ba nkai baluki makasi mpo ya koseme o libongo, kasi se mpamba, mpo mbo­nge itombokeli bango, ileki iye ya liboso.

1:14  Bongo babondeli Yawe, balobi : « Mokonzi, tolingi kokufa mpo ya moto oyo te, tozwa lika­mbo o miso ma yo te mpo ya makila ma moto azali na likambo te ; yo, Yawe, olingisaki likambo liye. »

1:15  Na nsima bakangi Yona mpe babwaki ye o mai. Na mbala yoko mbonge inso ikiti, mai makomi nye.

1:16  Bato banso babangi Yawe, babonzeli Yawe libonza mpe balakeli ye bilako.

Chapter 2

2:1  Yawe atindi ebuki ya mbisi emele Yona. Yona atikali o libumu lya mbisi mikolo misato, butu moi.

2:2  O kati ya libumu lya mbisi Yona abondeli Yawe Nzambe wa ye,

2:3  alobi : O kati ya mpasi enene ya ngai nabeleli Yawe mpe andimeli ngai ; ut’o mboka ya bawa nabeleli mpe ayoki lolaka la ngai.

2:4  Obwaki ngai o mbu bozindo, mai mazingi ngai bipai binso, mbonge ya mai izindisi ngai.

2:5  Nalobi : Obengani ngai o miso ma yo. Boniboni natala lisusu Tempelo ya yo esantu ?

2:6  Nazindi o mai tee o nkingo, mbonge ya mbu izingi ngai, nsoló izingi ngai motó.

2:7  Nakiti kin’o nse ya ngomba, nakiti o mboka ya bawa, bakangi bikangeli nsima ya ngai seko. E Yawe Nzambe wa ngai, bimisa ngai o libulu lya liwa, natikala na bomoi.

2:8  Awa mpema esileli ngai, nakanisi Yawe, mpe losambo la ngai lokomi epai ya yo, o Tempelo ya yo esantu.

2:9  Bato bakosalelaka banzambe ba lokuta batiki nzela ekozwela bango bolimbisi.

2:10  Ngai nakoyembela yo nzembo ya kokumisa yo, nakobonzela yo mabonza, nakokokisa elako nalakelaki yo. Libiki likouta se epai ya Yawe.

2:11  Yawe atindi mbisi etinda, yango esanzi Yona o libongo.

Chapter 3

3:1  Yawe alobi na Yona mbala ya ibale :

3:2  « Teleme, kende o engu­mba enene Ninive, mpe loba maloba maye ngai nakoyebisa yo. »

3:3  Yona atelemi, mbala eye akei o Ninive lokola Yawe alobaki na ye. Ninive ezalaki engumba enene mpenza, okotambola mikolo misato mpo ya kokatisa yango.

3:4  Yona ayingeli o engumba, atamboli mokolo mobi­mba ; asakoli boye : « Etikali mikolo ntuku inei babebisa Ninive. »

3:5  Bato ba Ninive bandimi Nzambe. Batindi ’te bato banso balala nzala, bakolo na bana, mpe balati ngoto.

3:6  Nsa­ngo ekomi o matoi ma mokonzi wa Ninive ; mokonzi alongwi o ngwende ya ye, atiki elamba ya lokumu, alati ngoto mpe akei kofanda o kati ya mputulu.

3:7  O Ninive mobimba bayebisi mobeko mwa mokonzi mpe mwa bankumu ba engumba ’te : « Ná bato ná nyama, ngombe na bibwele, banso balia elo­ko yoko te, bamele mpe mai te.

3:8  Banso balata ngoto mpe babondela Nzambe mingi mpenza. Moto na moto atika ezalela ebe ya ye mpe aboya mabe azalaki kosala.

3:9  Mbele Nzambe akotika mokano mwa ye, akoyoka mawa mpe akokitisa motema, bongo tokufa te. »

3:10  Nzambe amoni maye basali mpo ya kotika bizalela bibe bya bango. Ayoki motema mawa mpe atiki mokano mwa koyokisa bango mpasi.

Chapter 4

4:1  Yona asepeli na mokano moye te, asiliki :

4:2  Abondeli Yawe, alobi : « E Mokonzi, nakanisaki bobele bongo ntango nazalaki naino o mokili mwa ngai ! Yango wana nake­ndeki mbangu o Tarsis. Nayebaki ’te ozali Nzambe wa boboto mpe okoyokelaka bato mawa. Okosilikaka noki te, opusi bolingi mpe oyebi kolimbisa.

4:3  E Yawe, tika nakufa sikawa. O miso ma ngai bomoi bozali lisusu na ntina te, malamu nakufa. »

4:4  Kasi Yawe atuni ye : « Awa osiliki boye, okanisi ’te olo­ngi ? »

4:5  Yona abimi o engumba mpe akei kofanda o Esti ya engumba. Atongi esasa, amifandisi wana o mo­lili. Bongo amono makambo nini makokwela engumba.

4:6  Yawe Nza­mbe akolisi lititi lyoko noki kin’o likolo lya motó mwa Yona, epesa ye mwa mpio mpo ’te ayoka malamu. Yona asepeli na lititi liye mingi.

4:7  Kasi etani ntongo Nzambe atindi nkusu eswa lititi ; lititi likauki.

4:8  Ebimi moi makasi, Nzambe ati­ndi mompepe mouti o Esti, mopesi molunge mingi. Moi mobeti Yona o motó ; moyokisi ye mpasi mingi. Yona asengi Nzambe ’te akufa, alobi : « O miso ma ngai bomoi bozali lisusu na ntina te, malamu nakufa. »

4:9  Yawe atuni ye : « Awa osiliki mpo ya mwa lititi lina, okanisi ’te olongi ? » Yona ayanoli : « Na­koki kosilika mingi, ntina ezali. »

4:10  Kasi Yawe alobi na ye : « Yo ozali koyoka motema mpasi mpo ya mwa lititi liye. Oloni lyango te, okolisi lyango mpe te. Likolaki na butu moko, mpe likufi na butu bwa nsima.

4:11  Bongo ngai náyokela Ninive mawa te, engumba enene, ezali na bato soki nkoto monkama na ntuku ibale, mpe bayebi te nini ezali malamu mpe nini ezali mabe ; engu­mba ezali mpe na nyama ebele ! »