Kapingamarangi - Leviticus - 18

18:1  Dimaadua ga-helekai gi Moses

18:2  gi-hagi-anga-ina gi digau Israel, “Au go Dimaadua, di-godou God.

18:3  Goodou hudee daudalia nia hangaahai digau Egypt, di gowaa dela nogo noho-ai goodou i-mua, be go nia hangaahai o digau Canaan, di gowaa dela e-lahi ginai goodou ko-Au.

18:4  Goodou daudalia agu haganoho, gei gi-haga-gila-ina-aga agu mee ala ne-hagi-adu gi goodou. Au go Dimaadua, di-godou God.

18:5  Goodou daudalia nia hangaahai mono haganoho ala e-gowadu ko-Au gi goodou. Goodou gaa-hai digau e-benebene godou mouli mai i-di godou haga-gila-aga nia maa. Au go Dimaadua.”

18:6  Dimaadua gaa-wanga nia haganoho aanei: Hudee heia di hiihai o taga-hai-lodo ang-gi tangada i do madahaanau.

18:7  Hudee haga-langaadia-ina do damana i doo hai di hiihai o taga-hai-lodo ang-gi do dinana. Gei goe gi hudee haga-langaadia-ina labelaa do dinana.

18:8  Hudee haga-langaadia-ina do damana i doo hai di hiihai o taga-hai-lodo ang-gi nia lodo o-maa ala i-golo.

18:9  Hudee heia di hiihai o taga-hai-lodo ang-gi do duaahina-ahina, be go tama-ahina di ahina dela ne-hai dono lodo gi do damana, be go tama-ahina taane dela ne-hai dono lodo gi do dinana, ma e-aha maa mee ne-tomo-aga i-di hale dalia goe be i tuai gowaa.

18:10  Hudee heia di hiihai o taga-hai-lodo ang-gi tama-ahina o dau dama-ahina, idimaa di mee deenei le e-haga-langaadia goe.

18:11  Hudee heia di hiihai o taga-hai-lodo ang-gi tama-ahina dela di-gulu dinana e-dahi be di-gulu damana e-dahi, idimaa, mee tuaahina labelaa ni-oou.

18:12  Hudee heia di hiihai o taga-hai-lodo ang-gi tuaahina-ahina o do damana be tuaahina ahina o do dinana.

18:13  Hudee heia di hiihai o taga-hai-lodo ang-gi tuaahina-ahina o do damana be tuaahina ahina o do dinana.

18:14  Hudee heia di hiihai o taga-hai-lodo ang-gi di lodo tuaahina daane o do damana; idimaa, mee tinana labelaa ni oou.

18:15  Hudee heia di hiihai o taga-hai-lodo ang-gi di lodo o dau dama-daane

18:16  be go di lodo o do duaahina.

18:17  Maa goe guu-hai di hiihai o taga-hai-lodo ang-gi di ahina, gei goe hudee heia di hiihai o taga-hai-lodo ang-gi dana dama-ahina be go tama-ahina di ahina deelaa, idimaa, meemaa e-mee-hua di hai nia daangada ni-oou, gei di mee deelaa la di hala o-di hiihai o taga-hai-lodo ang-gi oo gau.

18:18  Goe hudee lodo gi tuaahina o doo lodo i-di madagoaa doo lodo le e-mouli hua igolo.

18:19  Hudee heia di hiihai o taga-hai-lodo ang-gi-di ahina i dono madagoaa dela e-hai dono magi-malama, idimaa, mee e-milimilia ang-gi di hai-daumaha.

18:20  Hudee heia di hiihai o taga-hai-lodo ang-gi di lodo o tei daane, idimaa, di mee deenei la-ga-haga-milimilia goe.

18:21  Goe hudee wanga-ina tei tama i au dama e-hai-ai di mee e-hai-tigidaumaha ang-gi di god Molech, idimaa di mee deenei le e-haga-milimilia di ingoo o God, dela go Yihowah.

18:22  Taane gi-dee-hai di hiihai o taga-hai-lodo ang-gi taane, idimaa, Dimaadua le e-de-hiihai huoloo gi-di mee deenei.

18:23  Taane be-di ahina gi-dee-hai di hiihai o taga-hai-lodo ang-gi di manu, idimaa, ma e-hai goe gi-milimilia.

18:24  Hudee haga-milimilia-ina goodou gi-nia haihai aanei, idimaa, aanei nia mee ala e-haga-milimilia digau ala dee-hagadonu, go digau dee-hagadonu ala nogo noho i tenua deenei i godou mua, ala ne-hagabagi go Dimaadua gi-daha bolo gii-mee-ai goodou di-hula gi-lodo tenua deelaa.

18:25  Nia hangahaihai huaidu digaula guu-hai tenua deelaa gi-milimilia, gei Dimaadua e-hagaduadua tenua deelaa, gaa-daa nia daangada gii-hula gi-daha mo tenua deelaa.

18:26  Digaula guu-hai nia hagadilinga mee huaidu huogodoo aanei gu-haga-milimilia tenua deelaa, malaa, goodou hudee heia nia maa. Goodou huogodoo, digau Israel be digau mai i-daha ala e-noho i godou baahi, goodou huogodoo e-hai gi-haga-gila-aga nia hagamodu mo nia haganoho Dimaadua,

18:27  Digaula guu-hai nia hagadilinga mee huaidu huogodoo aanei gu-haga-milimilia tenua deelaa, malaa, goodou hudee heia nia maa. Goodou huogodoo, digau Israel be digau mai i-daha ala e-noho i godou baahi, goodou huogodoo e-hai gi-haga-gila-aga nia hagamodu mo nia haganoho Dimaadua,

18:28  gei goodou ga-hagalee daa gi-daha mo tenua deelaa, be dana hai dela ne-daa gi-daha digau dee-hagadonu ala nogo noho i tenua deelaa i godou mua.

18:29  Goodou gu-iloo bolo digau ala ma-gaa-hai nia hagadilinga mee huaidu beenei la-hagalee dau bolo nia dama ni God.

18:30  Dimaadua ga-helekai boloo, “Haga-gila-ina-aga nnaganoho ala ne-gowadu ko-Au gi goodou. Hudee daudalia nia hangaahai o digau ala nogo noho i tenua dela i godou mua, gei gi-hudee haga-milimilia-ina goodou i-di godou haga-gila-aga nia mee aanei. Au go Yihowah, go di-godou God.”