SPVar - Leviticus - 7

7:1  וזאת תורת האשם קדש קדשים הוא

7:2  במקום אשר ישחטו את העלה ישחטו את האשם ואת דמו יזרק על המזבח סביב

7:3  ואת כל חלבו יקריב ממנו את האליה ואת החלב המכסה את הקרב ואת כל החלב אשר על הקרב

7:4  ואת שתי הכליות ואת החלב אשר עליהן אשר על הכסלים ואת היותרת על הכבד על הכליות יסירנה

7:5  והקטיר אתם הכהן המזבחה אשה ליהוה אשם הוא

7:6  כל זכר בכהנים יאכלנו במקום קדוש יאכל קדש קדשים הוא

7:7  כחטאת כאשם תורה אחת להם הכהן אשר יכפר בו לו יהיה

7:8  והכהן המקריב את עלת איש עור העלה אשר יקריבו לכהן לו יהיה

7:9  וכל מנחה אשר תאפה בתנור וכל נעשה במרחשת ועל המחבת לכהן המקריב אתה לו תהיה

7:10  וכל מנחה בלולה בשמן וחרבה לכל בני אהרן תהיה איש כאחיו

7:11  וזאת תורת זבח השלמים אשר יקריבו ליהוה

7:12  אם על תודה יקריבנו והקריב על זבח התודה חלות מצות בללות בשמן ורקיקי מצות משחים בשמן וסלת מרבכת חלות בללות בשמן

7:13  על חלת לחם חמץ יקריב קרבנו על זבח תודת שלמיו

7:14  והקריב ממנו אחד מכל קרבן תרומה ליהוה לכהן הזרק את דם השלמים לו יהיה

7:15  ובשר זבח תודת שלמיו ביום קרבנו יאכל לא יניח ממנו עד בקר

7:16  ואם נדר או נדבה זבח קרבנו ביום הקריבו את זבחו יאכל וממחרת והנותר ממנו יאכל

7:17  והנותר מבשר הזבח ביום השלישי באש ישרף

7:18  ואם אכל יאכל מבשר זבח שלמיו ביום השלישי לא ירצה המקריב אתו לא יחשב לו פגול יהיה והנפש האכלת ממנו עונה תשא

7:19  והבשר אשר יגע בכל טמא לא יאכל באש ישרף הבשר כל טהור יאכל בשר

7:20  והנפש אשר תאכל בשר מזבח השלמים אשר ליהוה וטמאתו עליו ונכרתה הנפש ההיא מעמיה

7:21  ונפש כי תגע בכל טמא בטמאת אדם או בבהמה טמאה או בכל שרץ טמא ואכל מבשר זבח השלמים אשר ליהוה ונכרתה הנפש ההיא מעמיה

7:22  וידבר יהוה אל משה לאמר

7:23  דבר אל בני ישראל לאמר כל חלב שור וכשב ועז לא תאכלו

7:24  וחלב נבלה וחלב טרפה יעשה לכל מלאכה ואכל לא תאכלהו

7:25  כי כל אכל חלב מן הבהמה אשר יקריב ממנה אשה ליהוה ונכרתה הנפש האכלת מעמיה

7:26  וכל דם לא תאכלו בכל מושבתיכם לעוף ולבהמה

7:27  כל הנפש אשר תאכל כל דם ונכרתה הנפש ההיא מעמיה

7:28  וידבר יהוה אל משה לאמר

7:29  ואל בני ישראל תדבר המקריב את זבח שלמיו ליהוה יביא את קרבנו ליהוה מזבח שלמיו

7:30  ידיו תביאנה את אשי יהוה את החלב על החזה יביאנו את החזה להניף אתו תנופה לפני יהוה

7:31  והקטיר הכהן את החלב המזבחה והיה החזה לאהרן ולבניו

7:32  ואת שוק הימין תתנו תרומה לכהן מזבחי שלמיכם

7:33  המקריב את דם השלמים ואת החלב מבני אהרן לו תהיה שוק הימין למנה

7:34  כי את חזה התנופה ואת שוק התרומה לקחתי מאת בני ישראל מזבחי שלמיהם ואתן אתם לאהרן הכהן ולבניו לחק עולם מאת בני ישראל

7:35  זאת משחת אהרן ומשחת בניו מאשי יהוה ביום הקריב אתם לכהן ליהוה

7:36  אשר צוה יהוה לתת להם ביום משחו אתם מאת בני ישראל חק עולם לדרתם

7:37  זאת התורה לעלה ולמנחה ולחטאת ולאשם ולמלאים ולזבח השלמים

7:38  אשר צוה יהוה את משה בהר סיני ביום צותו את בני ישראל להקריב את קרבניהם ליהוה במדבר סיני