Site uses cookies to provide basic functionality.

OK
LUKE
Prev Up Next Toggle notes
Chapter 8
Luke CSlEliza 8:1  И бысть посем, и Той прохождаше сквозе грады и веси, проповедуя и благовествуя Царствие Божие: и обанадесяте с Ним,
Luke CSlEliza 8:2  и жены некия, яже бяху изцелены от духов злых и недуг: Мариа нарицаемая Магдалина, из неяже бесов седмь изыде,
Luke CSlEliza 8:3  и Иоанна жена Хузаня, приставника Иродова, и Сусанна, и ины многи, яже служаху Ему от имений своих.
Luke CSlEliza 8:4  Разумевающу же народу многу, и от всех градов грядущым к Нему, рече притчу:
Luke CSlEliza 8:5  изыде сеяй сеяти семене своего: и егда сеяше, ово паде при пути, и попрано бысть, и птицы небесныя позобаша е:
Luke CSlEliza 8:6  а другое паде на камени, и прозяб усше, зане не имеяше влаги:
Luke CSlEliza 8:7  и другое паде посреде терния, и возрасте терние, и подави е:
Luke CSlEliza 8:8  другое же паде на земли блазе, и прозяб сотвори плод сторицею. Сия глаголя, возгласи: имеяй ушы слышати, да слышит.
Luke CSlEliza 8:9  Вопрошаху же Его ученицы Его, глаголюще: что есть притча сия?
Luke CSlEliza 8:10  Он же рече: вам есть дано ведати тайны Царствия Божия, прочым же в притчах, да видяще не видят и слышаще не разумеют.
Luke CSlEliza 8:11  Есть же сия притча: семя есть слово Божие:
Luke CSlEliza 8:12  а иже при пути, суть слышащии, потом (же) приходит диавол и вземлет слово от сердца их, да не веровавше спасутся:
Luke CSlEliza 8:13  а иже на камени, иже егда услышат, с радостию приемлют слово: и сии корене не имут, иже во время веруют, и во время напасти отпадают:
Luke CSlEliza 8:14  а еже в тернии падшее, сии суть слышавшии, и от печали и богатства и сластьми житейскими ходяще подавляются, и не совершают плода:
Luke CSlEliza 8:15  а иже на добрей земли, сии суть, иже добрым сердцем и благим слышавше слово, держат и плод творят в терпении. Сия глаголя, возгласи: имеяй ушы слышати, да слышит.
Luke CSlEliza 8:16  Никтоже (убо) светилника вжег, покрывает его сосудом, или под одр подлагает: но на свещник возлагает, да входящии видят свет.
Luke CSlEliza 8:17  Несть бо тайно, еже не явлено будет: ниже утаено, еже не познается и в явление приидет.
Luke CSlEliza 8:18  Блюдитеся убо, како слышите: иже бо имать, дастся ему: и иже аще не имать, и еже мнится имея, возмется от него.
Luke CSlEliza 8:19  Приидоша же к Нему Мати и братия Его, и не можаху беседовати к Нему народа ради.
Luke CSlEliza 8:20  И возвестиша Ему, глаголюще: Мати Твоя и братия Твоя вне стоят, видети Тя хотяще.
Luke CSlEliza 8:21  Он же отвещав рече к ним: мати Моя и братия Моя сии суть, слышащии слово Божие, и творящии е.
Luke CSlEliza 8:22  И бысть во един от дний, Той влезе в корабль и ученицы Его: и рече к ним: прейдем на он пол езера. И поидоша.
Luke CSlEliza 8:23  Идущым же им, успе. И сниде буря ветреная в езеро, и скончавахуся и в беде беху.
Luke CSlEliza 8:24  И приступльше воздвигоша Его, глаголюще: Наставниче, Наставниче, погибаем. Он же востав запрети ветру и волнению водному: и улегоста, и бысть тишина.
Luke CSlEliza 8:25  Рече же им: где есть вера ваша? Убоявшеся же чудишася, глаголюще друг ко другу: кто убо Сей есть, яко и ветром повелевает и воде, и послушают Его?
Luke CSlEliza 8:26  И преидоша во страну Гадаринску, яже есть об он пол Галилеи.
Luke CSlEliza 8:27  Изшедшу же Ему на землю, срете Его муж некий от града, иже имяше бесы от лет многих, и в ризу не облачашеся, и во храме не живяше, но во гробех.
Luke CSlEliza 8:28  Узрев же Иисуса и возопив, припаде к Нему, и гласом велиим рече: что мне и Тебе, Иисусе Сыне Бога Вышняго? Молюся Ти, не мучи мене.
Luke CSlEliza 8:29  Повеле бо духови нечистому изыти от человека: от многих бо лет восхищаше его: и вязаху его узы (железны) и путы, стрегуще его: и растерзая узы, гонимь бываше бесом сквозе пустыни.
Luke CSlEliza 8:30  Вопроси же его Иисус, глаголя: что ти есть имя? Он же рече: легеон: яко беси мнози внидоша в онь.
Luke CSlEliza 8:31  И моляху Его, да не повелит им в бездну ити.
Luke CSlEliza 8:32  Бе же ту стадо свиний много пасомо в горе: и моляху Его, да повелит им в ты внити. И повеле им.
Luke CSlEliza 8:33  Изшедше же беси от человека, внидоша во свиния: и устремися стадо по брегу в езеро, и истопе.
Luke CSlEliza 8:34  Видевше же пасущии бывшее, бежаша, и возвестиша во граде и в селех.
Luke CSlEliza 8:35  Изыдоша же видети бывшее: и приидоша ко Иисусови и обретоша человека седяща, из негоже беси изыдоша, оболчена и смысляща, при ногу Иисусову: и убояшася.
Luke CSlEliza 8:36  Возвестиша же им видевшии, како спасеся бесновавыйся.
Luke CSlEliza 8:37  И моли Его весь народ страны Гадаринския отити от них, яко страхом велиим одержими беху. Он же влез в корабль, возвратися.
Luke CSlEliza 8:38  Моляшеся же Ему муж, из негоже изыдоша беси, дабы с Ним был. Отпусти же его Иисус, глаголя:
Luke CSlEliza 8:39  возвратися в дом твой и поведай, елика ти сотвори Бог. И иде, по всему граду проповедая, елика сотвори ему Иисус.
Luke CSlEliza 8:40  Бысть же егда возвратися Иисус, прият Его народ: беху бо вси чающе Его.
Luke CSlEliza 8:41  И се, прииде муж, емуже имя Иаир, и той князь сонмищу бе: и пад при ногу Иисусову, моляше Его внити в дом свой:
Luke CSlEliza 8:42  яко дщи единородна бе ему, яко лет двоюнадесяте, и та умираше. Егда же идяше, народи угнетаху Его.
Luke CSlEliza 8:43  И жена сущи в точении крове от двоюнадесяте лету, яже врачем издавши все имение, (и) не возможе ни от единаго изцелети:
Luke CSlEliza 8:44  (и) приступльши созади, коснуся края риз Его: и абие ста ток крове ея.
Luke CSlEliza 8:45  И рече Иисус: кто есть коснувыйся Мне? Отметающымся же всем, рече Петр и иже с Ним: Наставниче, народи одержат Тя и гнетут, и глаголеши: кто есть коснувыйся Мне?
Luke CSlEliza 8:46  Иисус же рече: прикоснуся Мне некто: Аз бо чух силу изшедшую из Мене.
Luke CSlEliza 8:47  Видевши же жена, яко не утаися, трепещущи прииде, и падши пред Ним, еяже ради вины прикоснуся Ему, поведа Ему пред всеми людьми, и яко изцеле абие.
Luke CSlEliza 8:48  Он же рече ей: дерзай дщи, вера твоя спасе тя: иди в мире.
Luke CSlEliza 8:49  Еще Ему глаголющу, прииде некий от архисинагога, глаголя ему, яко умре дщи твоя: не движи Учителя.
Luke CSlEliza 8:50  Иисус же слышав отвеща ему, глаголя: не бойся, токмо веруй, и спасена будет.
Luke CSlEliza 8:51  Пришед же в дом, не остави ни единаго внити, токмо Петра и Иоанна и Иакова, и отца отроковицы, и матере.
Luke CSlEliza 8:52  Плакахуся же вси и рыдаху ея. Он же рече: не плачитеся: не умре (бо), но спит.
Luke CSlEliza 8:53  И ругахуся Ему, ведяще, яко умре.
Luke CSlEliza 8:54  Он же изгнав вон всех, и емь за руку ея, возгласи, глаголя: отроковице, востани.
Luke CSlEliza 8:55  И возвратися дух ея, и воскресе абие: и повеле дати ей ясти.
Luke CSlEliza 8:56  И дивистася родителя ея. Он же повеле има ни комуже поведати бывшаго.