SPVar - Exodus - 12

12:1  ויאמר יהוה אל משה ואל אהרן בארץ מצרים לאמר

12:2  החדש הזה לכם ראש החדשים ראישון הוא לכם לחדשי השנה

12:3  דברו נא אל כל עדת בני ישראל לאמר בעשור לחדש הזה ויקחו להם איש שה לבית אבות שה לבית

12:4  ואם ימעט הבית מהיות משה ולקח הוא ושכינו הקרוב אל ביתו במכסות נפשות איש לפי אכלו תכסו על השה

12:5  שה תמים זכר בן שנה יהיה לכם מן הכשבים ומן העזים תקחו

12:6  והיה לכם למשמרת עד ארבעה עשר יום לחדש הזה ושחטו אתו כל קהל עדת בני ישראל בין הערבים

12:7  ולקחו מן הדם ונתנו על שתי המזוזת ועל המשקף על הבתים אשר יאכלו אתו בהם

12:8  ואכלו את הבשר בלילה הזה צלי אש ומצות על מררים יאכלהו

12:9  אל תאכלו ממנו נא ובשל מבשל במים כי אם צלי אש ראשו על כרעיו ועל קרבו

12:10  ולא תותירו ממנו עד בקר והנותר ממנו עד בקר באש תשרפו

12:11  וככה תאכלו אתו מתניכם חגרים נעליכם ברגליכם ומקליכם בידיכם ואכלתם אתו בחפזון פסח הוא ליהוה

12:12  ועברתי בארץ מצרים בלילה הזה והכיתי כל בכור בארץ מצרים מאדם עד בהמה ובכל אלהי מצרים אעשה שפטים אני יהוה

12:13  והיה הדם לכם לאות על הבתים אשר אתם שם וראיתי את הדם ופסחתי עליכם ולא יהיה בכם נגף למשחית בהכותי בארץ מצרים

12:14  והיה היום הזה לכם לזכרון וחגתם אתו חג ליהוה לדרתיכם חקת עולם תחגהו

12:15  שבעת ימים מצות תאכלו אך ביום הראישון תשביתו שאר מבתיכם כי כל אכל חמץ ונכרתה הנפש ההיא מישראל מיום הראישון ועד יום השביעי

12:16  וביום הראישון מקרא קדש וביום השביעי מקרא קדש יהיה לכם כל מלאכה לא יעשה בהם אך אשר יאכל לכל נפש הוא לבדו יעשה לכם

12:17  ושמרתם את המצות כי בעצם היום הזה הוצאתי את צבאתיכם מארץ מצרים ושמרתם ועשיתם את היום הזה לדרתיכם חקת עולם

12:18  בראישון בארבעה עשר יום לחדש בערב תאכלו מצות עד יום אחד ועשרים לחדש בערב

12:19  שבעת ימים שאר לא ימצא בבתיכם כי כל אכל מחמצת ונכרתה הנפש ההוא מעדת ישראל בגר ובאזרח הארץ

12:20  כל מחמצת לא תאכלו בכל מושבתיכם תאכלו מצות

12:21  ויקרא משה לכל זקני ישראל ויאמר אליהם משכו קחו לכם צאן למשפחתיכם ושחטו הפסח

12:22  ולקחתם אגדת אזוב וטבלתם בדם אשר בסף והגעתם על המשקף ועל שתי המזוזת מן הדם אשר בסף ואתם אל תצאו איש מפתח ביתו עד בקר

12:23  ועבר יהוה לנגף את מצרים וראה את הדם על המשקף ועל שתי המזוזת ופסח יהוה על הפתח ולא יתן המשחית לבוא אל בתיכם לנגף

12:24  ושמרתם את הדבר הזה לחק לך ולבניך עד עולם

12:25  והיה כי תבאו אל הארץ אשר יתן יהוה לכם כאשר דבר ושמרתם את העבדה הזאת בחדש הזה

12:26  והיה כי יאמרו אליכם בניכם מה העבדה הזאת לכם

12:27  ואמרתם זבח פסח הוא ליהוה אשר פסח על בתי בני ישראל במצרים בנגפו את מצרים ואת בתינו הציל ויקדו העם וישתחוו

12:28  וילכו ויעשו בני ישראל כאשר צוה יהוה את משה ואהרן כן עשו

12:29  ויהי בחצי הלילה ויהוה הכה כל בכור בארץ מצרים מבכור פרעה הישב על כסאו ועד בכור השבי אשר בבית הבור וכל בכור בהמה

12:30  ויקם פרעה לילה הוא וכל עבדיו וכל מצרים ותהי צעקה גדלה במצרים כי אין בית אשר אין שם מת

12:31  ויקרא למשה ולאהרן לילה ויאמר קומו צאו מתוך עמי גם אתם גם בני ישראל ולכו עבדו את יהוה כדבריכם

12:32  גם צאנכם גם בקרכם קחו כאשר דברתם ולכו וברכתם גם אתי

12:33  ותחזק מצרים על העם למהר לשלחם מן הארץ כי אמרו כלנו מתים

12:34  וישא העם את בצקו טרם יחמץ משארתם צררות בשמלתם על שכמם

12:35  ובני ישראל עשו כדבר משה וישאלו ממצרים כלי כסף וכלי זהב ושמלות

12:36  ויהוה נתן את חן העם בעיני מצרים וישאלום וינצלו את מצרים

12:37  ויסעו בני ישראל מרעמסס סכותה כשש מאות אלף רגלי הגברים לבד מטף

12:38  וגם ערב רב עלה אתם וצאן ובקר מקנה כבד מאד

12:39  ויאפו את הבצק אשר הוציאו ממצרים עגות מצות כי לא חמץ כי גרשום מצרים ולא יכלו להתמהמה וגם צדה לא עשו להם

12:40  ומושב בני ישראל ואבתם אשר ישבו בארץ כנען ובארץ מצרים שלשים שנה וארבע מאות שנה

12:41  ויהי מקץ שלשים שנה וארבע מאות שנה ויהי בעצם היום הזה יצאו כל צבאות יהוה מארץ מצרים

12:42  לילה שמרים הוא ליהוה להוציאם מארץ מצרים הוא הלילה הזה ליהוה שמרים לכל בני ישראל לדרתם

12:43  ויאמר יהוה אל משה ואל אהרן זאת חקת הפסח כל בן נכר לא יאכל בו

12:44  וכל עבד איש מקנת כספו ומלת אתו אז יאכל בו

12:45  תושב ושכיר לא יאכל בו

12:46  בבית אחד יאכל לא תוציאו מן הבית מן הבשר החוצה ועצם לא תשברו בו

12:47  כל עדת ישראל יעשו אתו

12:48  וכי יגור אתכם גר ועשה פסח ליהוה המול לו כל זכר ואז יקרב לעשותו והיה כאזרח הארץ וכל ערל לא יאכל בו

12:49  תורה אחת יהיה לאזרח ולגר הגר בתוככם

12:50  ויעשו כל בני ישראל כאשר צוה יהוה את משה ואת אהרן כן עשו

12:51  ויהי בעצם היום הזה הוציא יהוה את בני ישראל מארץ מצרים על צבאתם