Vulgate - II Maccabees - 10

10:1  Macchabeus autem et qui cum illo erant Domino se protegente templum quidem et civitatem recepit

10:2  aras autem quas alienigenae per plateas extruxerant itemque delubra demolitus est

10:3  et purgato templo aliud altare fecerunt et de ignitis lapidibus igne concepto obtulerunt sacrificia post biennium et incensum et lucernas et panes propositionis posuerunt

10:4  quibus gestis rogabant Dominum prostrati in terram ne amplius malis talibus inciderent sed et si quando peccassent ut ab ipso mitius corriperentur et non blasphemis ac barbaris hominibus traderentur

10:5  qua die autem templum ab alienigenis pollutum fuerat contigit eadem die purgationem fieri vicesima et quinta mensis qui fuit casleu

10:6  et cum laetitia diebus octo egerunt in modum tabernaculorum recordantes quod ante modicum temporis diem sollemnem tabernaculorum in montibus more bestiarum egerant

10:7  propter quod tyrsos et ramos virides et palmas praeferebant ei qui prosperavit mundari locum suum

10:8  et decreverunt communi praecepto et decreto universae genti Iudaeorum omnibus annis agere dies istos

10:9  et Antiochi quidem qui appellatus est Nobilis vitae excessus ita se habuit

10:10  nunc autem de Eupatore Antiochi filio impii quae gesta sunt narrabimus breviantes mala quae in bellis gesta sunt

10:11  hic suscepto regno constituit super negotia regni Lysiam quendam Foenicis et Syriae militiae principem

10:12  nam Ptolomeus qui dicebatur Macer iusti tenax erga Iudaeos esse instituit et praecipue propter iniquitatem quae facta erat in eos et pacifice agere cum eis

10:13  sed ob hoc accusatus ab amicis apud Eupatorem cum frequenter proditor audiret eo quod Cyprum creditus a Filometore Nobilem translatus etiam ab eo recessisset veneno vitam finivit

10:14  Gorgias autem cum esset dux locorum adsumptis advenis frequenter Iudaeos debellabat

10:15  Iudaei vero qui tenebant oportunas munitiones fugatos ab Hierosolymis suscipiebant et bellare temptabant

10:16  hii vero qui erant cum Macchabeo per orationes Dominum rogantes ut esset sibi adiutor impetum fecerunt in munitiones Idumeorum

10:17  multaque vi insistentes loca obtinuerunt occurrentes interemerunt et omnes simul non minus a viginti milibus trucidaverunt

10:18  quidam autem cum confugissent in duas turres valde munitas omnem adparatum ad repugnandum habentes

10:19  Macchabeus ad eorum expugnationem relicto Simone et Ioseppho item Macchabeo eisque qui cum ipsis erant satis multis ipse ad eas quae amplius perurguebant pugnas conversus est

10:20  hii vero qui cum Simone erant cupiditate ducti a quibusdam qui in turribus erant suasi sunt pecunia et septuaginta milibus didragmis acceptis dimiserunt quosdam effugere

10:21  cum autem Macchabeo nuntiatum esset quod factum est congregatis principibus populi accusavit quod pecunia fratres vendidissent adversariis eorum dimissis

10:22  hos igitur proditores factos interfecit et confestim duas turres occupavit

10:23  armis autem ac manibus omnia prospere agendo in duabus munitionibus plus quam viginti milia peremit

10:24  Timotheus qui prius a Iudaeis fuerat superatus convocato exercitu peregrinae multitudinis et congregato exercitu asiano advenit quasi armis Iudaeam capturus

10:25  Macchabeus autem et qui cum ipso erant adpropiante illo deprecabantur Deum caput terra aspergentes lumbosque ciliciis praecincti

10:26  ad altaris crepidinem provoluti ut sibi propitius inimicis autem eorum esset inimicus et adversaretur sicut lex dicit

10:27  et ita post orationem sumptis armis longius de civitate procedentes et proximi hostibus effecti resederunt

10:28  primo autem solis ortu utrique commiserunt isti quidem victoriae et prosperitatis sponsorem cum virtute Dominum habentes illi autem ducem belli animum habebant

10:29  sed cum vehemens pugna esset apparuerunt adversariis de caelo viri quinque in equis frenis aureis decori ducatum Iudaeis praestantes

10:30  ex quibus duo Macchabeum medium habentes armis suis circumseptum incolomem conservabant in adversarios autem tela et fulmina iaciebant ex quo et caecitate confusi et repleti perturbatione cadebant

10:31  interfecti sunt autem viginti milia quingenti et equites sescenti

10:32  Timotheus autem confugit in Gazara praesidium munitum cui praeerat Caereas

10:33  Macchabeus autem et qui cum eo erant laetantes obsederunt praesidium diebus quattuor

10:34  at hii qui in turres erant loci firmitate confisi super modum maledicebant et sermones nefandos iactabant

10:35  sed cum dies quinta inlucesceret viginti iuvenes ex his qui cum Macchabeo erant accensi animis propter blasphemiam viriliter accesserunt ad murum et feroci animo incedentes ascendebant

10:36  sed et alii similiter ascendentes turres portasque succendere adgressi atque ipsos maledicos vivos concremare

10:37  per continuum autem biduum praesidio vastato Timotheum occultantem se in quodam reppertum loco peremerunt et fratrem illius Caerean et Apollofanem occiderunt

10:38  quibus gestis in hymnis et confessionibus benedicebant Dominum qui magna fecit cum Israhel et victoriam illi dedit