Kapingamarangi - Isaiah - 42

42:1  Dimaadua e-helekai boloo, “Deenei go dagu Dangada Hai-hegau dela e-hagamaaloo-aga ko-Au, dagu Dangada dela ne-hilihili-aga gei e-aloho-iei Au gei e-tene ginai Au. Mee gu-haga-honu ko-Au gi dogu Hagataalunga, gei Mee gaa-wanga gi-nia henua llauehe huogodoo di hai o-di tonu.

42:2  Mee hagalee wolowolo be e-haga-hohooho, be e-agoago gi-nua i-hongo nia ala.

42:3  Mee hagalee hadi gi-daha di aalek dela e-biga, be e-diinai di malama dela ga-hoohoo gaa-made. Mee e-wanga gi-nia daangada di tonu dee-odi.

42:4  Mee hagalee hudu gi-daha dono hagadagadagagee be hagalee manawa-bagege. Mee ga-haga-duu-aga di tonu i henuailala. Nia henua ala e-mogowaa-loo e-talitali gei e-hidihidi gi-nia agoago a-Maa.”

42:5  Dimaadua go God dela ne-hai di langi gaa-haa gi ono hagahonu. Mee dela ne-hai henuailala mo nia mee ala e-mouli huogodoo no-lodo. Mee guu-wanga nia mouli gi-dogidogi nia daangada huogodoo. Gei dolomeenei gei-ogo Dimaadua go God ga-helekai gi dana Dangada Hai-hegau boloo,

42:6  “Au go Dimaadua ne-gahi-mai Goe, ga-gowadu gi-di-Goe di mogobuna bolo di tonu la-gii-gila i-hongo henuailala. Mai doo baahi, gei Au gaa-hai dagu hagababa gi-nia daangada huogodoo. Mai doo baahi, gei Au ga-haga-maalama nia henua llauehe.

42:7  Goe gaa-huge nia golomada o digau dee-gida, ga-haga-maahede digau ala e-noho i-lodo di bouli o-di hale-galabudi.

42:8  “Ko-Au modogo-Au dela go Yihowah, deelaa go dogu ingoo. Deai di god i-golo e-hai-mee ngaadahi gi dogu madamada ai. Au hagalee dumaalia gi dahi ada-mee e-hai-mee ngaadahi gi dogu hagaamu.

42:9  Nia mee ala nogo haga-modongoohia ko-Au, la-gu-kila-aga guu-donu. Dolomeenei, gei Au e-hagi-adu nia mee hoou i-mua nia maa ma-ga-kila-mai.”

42:10  Huwa-ina taahili hoou ang-gi Dimaadua. Daahili hagaamuina a-Mee go henuailala hagatau. Hagaamuina a-Mee go goodou ala e-deledele i-di moana. Hagaamuina a-Mee go nia mee huogodoo ala e-mouli i-lodo tai! Gi-daahili-ina go goodou go nia henua ala e-mogowaa-loo mo goodou go digau ala e-noho i-golo!

42:11  Heia di anggowaa mo ono waahale gi-hagaamuina a God. Heia digau Kedar gi-hagaamuina a-Mee. Heia digau ala e-noho i-lodo di waahale o Sela gi-wwolowwolo i-di tenetene mai i-tomo nia gonduu!

42:12  Heia digau ala e-noho i-nia henua haga-mogowaa gi-haga-hagaamuina mo-di haga-madamada Dimaadua.

42:13  Dimaadua e-hana e-hai dana dauwa gadoo be tangada-dauwa. Mee gu-togomaalia ge e-hagadaba di tauwa. Mee gaa-wolo gi-nua, ga-daamada tauwa. Mee e-haga-modongoohia-aga dono mogobuna dela e-hai-baahi ang-gi ono hagadaumee.

42:14  Dimaadua e-helekai boloo, “Gu-waalooloo dagu noho dee-muu, Au digi helekai gi agu daangada. Gei dolomeenei di madagoaa e-haga-ngalua guu-dau-mai, Au ga-wolowolo gi-nua be-di ahina ma-ga-haanau.

42:15  Au gaa-oho gi-daha nia dama-gonduu mono gonduu nnoonua, ga-haga-maangoo nia geinga mono laagau. Au gaa-huli nia monowai gii-hai nia anggowaa, gaa-hai nia monowai gi-maangoo.

42:16  “Au gaa-dagi agu daangada ala e-dee-gida gi-nia ala digi hula-ai digaula mai i-mua. Au gaa-huli nadau bouli dongoeho gi-di maalama, gaa-hai nia gowaa dungadunga gi malallali i-mua digaula. Aanei go agu hagababa ala e-daahi beelaa ko-Au.

42:17  Gei-ogo digau huogodoo ala e-hagadonu nia ada-mee, ala e-haga-ingoo nia ada-mee bolo nadau god, la-ga-haga-langaadia, gaa-tee.”

42:18  Dimaadua e-helekai boloo, “Goodou go digau ala e-longoduli, hagalongo! Goodou ala e-dee-gida, mmada maalia!

42:19  Ma iai tangada i-golo e-mada-dee-gida i dagu dangada hai-hegau, ge e-mada-longoduli i dagu dangada kae-hegau dela ne-hagau ko-Au?

42:20  Israel, goodou gu-gidee nia mee logowaahee, gei di-maa e-hai dono hadinga bolo-aha adu gi goodou? Goodou la-godou dalinga i-golo belee hagalongo ai, gei nia maa ni-aha ala ne-longono-ai goodou?”

42:21  Dimaadua la di God dela e-manawa-tene i-di hagamouli, malaa Mee e-haga-duu-aga ana haganoho mo ana agoago, gei Mee e-hiihai gi ana daangada gi-hagalaamua-ina nia maa.

42:22  Gei dolomeenei ana daangada la-guu-kumi i tauwa. Digaula la-guu-tai i-lodo nia hale-galabudi i-lodo di gelegele gei gu-daalo hagammuni i-lodo nia hale-galabudi. Digaula guu-hai digau guu-kumi i tauwa, deai tangada e-hanimoi gi digaula belee hagamaamaa digaula ai.

42:23  Ma iai tangada i goodou e-hagalongo gi-di mee deenei? E-hai behee? Tugi dolomeenei gaa-huli gi-muli, goodou ga-hagalongo hagahumalia?

42:24  Ma koai dela ne-wanga a Israel gi digau gaiaa? Ma go tuaidina hua Dimaadua dela ne-hai-baahi ginai gidaadou i tadau haihai huaidu. Gidaadou hagalee nogo mouli be dana hiihai bolo gidaadou gi-mouli-ai. Gidaadou hagalee nogo daudali ana agoago ne-gaamai gi gidaadou.

42:25  Gei Mee guu-hai gidaadou gi-longono di mahi o dono hagawelewele, ga-hagaduadua gidaadou gi-di duadua o-di tauwa. Dono hagawelewele la-gu-ulaula gadoo be-di ahi laa-lodo Israel. Gei gidaadou gu-de-iloo be di-maa di-aha dela ne-hai, gidaadou digi kabe di agoago deelaa.