Kapingamarangi - Matthew - 23

23:1  Jesus ga-helekai gi digau dogologo mo ana dama-agoago,

23:2  “Digau haga-donudonu haganoho mono Pharisee e-mogobuna di haga-donudonu Nnaganoho Moses.

23:3  Goodou e-hai-loo gi-hagalongo, gi-hagagila-aga-ina nadau agoago. Gei goodou hudee hagagila-aga-ina nadau hangaahai, idimaa, digaula hagalee daudali nadau mee ala e-agoago ai.

23:4  Digaula e-hagabudu nia mee daamaha di-aamo ga-lawalawa gi-hongo nia bakau o-nia daangada, gei digaula hagalee-loo e-haga-ngalua di madaalima hua-e-dahi e-hagamaamaa digaula, e-aamo nia mee daamaha aalaa.

23:5  Digaula e-hai nia mee huogodoo bolo gii-mmada ginai nia daangada. Digaula e-ulu nia tuu gahu lloo madamada ge palaha e-tai gi nadau huaidina ala e-hihi ginai nia helekai di Beebaa-Dabu, e-nnoo gi nadau lae mono lima, gei e-hai gi-llauehaa ge gi-palaha huoloo nia labalaba o nadau gahu.

23:6  Digaula e-hiihai e-noho i-nia lohongo mugi-mua i-teebele hagamiami, gei e-noho i-nia lohongo o digau aamua i-lodo nia synagogee.

23:7  Digaula e-hiihai bolo nia daangada gi-hagalabagau-ina ginaadou i-lodo nia gowaa huihui-mee, gei gi-gahia ginaadou bolo ‘Tangada Agoago.’

23:8  Goodou hudee hai bolo nia daangada la-gi-gahia goodou bolo ‘Tangada Agoago’, idimaa, goodou di-godou Dangada Agoago hua-e-dahi, goodou guu-hai tagahaanau e-dahi.

23:9  Goodou hudee gahia dahi dangada i henuailala bolo ‘Tamana’, idimaa, di-godou Damana hua e-dahi dela e-noho i-di langi.

23:10  Goodou gi-hudee hiihai bolo nia daangada gi-gahia goodou bolo nia ‘Dagi’, idimaa, di-godou Dagi dela-hua e-dahi go di Mesaia.

23:11  Tangada dela koia e-aamua i godou lodo, la-go mee dela go di-godou dangada hai-hegau.

23:12  Idimaa, tangada dela gaa-bida hagalaamua-ia, geia gaa-hai tangada i-muli-loo, gei tangada dela ga-dugu-eia gi-lala-loo, geia gaa-hai tangada aamua.

23:13  “E-huaidu-adu gi goodou digau haga-donudonu haganoho mono Pharisee! Goodou digau hai-hegau ngudu-golomada! Goodou guu-tai di bontai Teenua King o God di Langi gi-nia daangada, gei goodou hagalee e-ulu-ai, ge hagalee dumaalia gi-nia daangada ala e-hagamahi bolo ginaadou e-ulu i Teenua deelaa.

23:14  [“E-huaidu-adu gi goodou digau haga-donudonu haganoho mono Pharisee! Goodou digau hai-hegau ngudu-golomada! Goodou e-daa nia hale nia ahina guu-mmade nadau lodo, gei e-hai godou dalodalo gii-lloo. Malaa e-donu, goodou e-hai-loo gii-kae di hagaduadua damana i godou hai huaidu beenei.]

23:15  “E-huaidu-adu gi goodou digau haga-donudonu haganoho mono Pharisee! Goodou digau hai-hegau ngudu-golomada! Goodou e-deledele i-hongo di moana, e-hula gi-nia madagowaa e-logo i henuailala, belee huli nia daangada gi-daudali goodou. Maa gaa-hai beenei, gei goodou ne-hai digaula gi-ulu gi-lodo di ahi dee-odi holongo-lua gi godou nua.

23:16  “E-huaidu-adu gi goodou nia dagi deegida! Goodou e-agoago bolo maa tangada ga-hagamodu ang-gi di Hale Daumaha, la-hagalee lawalawa go dana hagamodu ne-hai. Gei tangada ma-ga-hagamodu gi-nia goolo ala i-lodo di Hale Daumaha, deelaa tangada e-lawalawa go dana hagamodu.

23:17  Goodou nia daangada deegida ge dadaulia! Dehee di mee e-mada-hagalabagau: go nia goolo, be go di Hale Daumaha dela e-hai nia goolo gii-dabu?

23:18  Goodou e-agoago labelaa boloo, ‘Maa tangada ga-hagamodu gi-di gowaa hai-tigidaumaha, la-hagalee e-lawalawa go dana hagamodu. Gei tangada ma-ga-hagamodu gi-di mee dela i-hongo di gowaa tigidaumaha, deelaa tangada e-lawalawa go dana hagamodu dela ne-hai.’

23:19  Goodou e-dee-gida huoloo! Dehee di mee e-hagalabagau: go di mee dela e-hai-tigidaumaha, be go di gowaa hai-tigidaumaha dela e-hai tigidaumaha gii-dabu?

23:20  Malaa, tangada ga-hagamodu ang-gi di gowaa hai tigidaumaha, la-ne-hagamodu ang-gi di gowaa tigidaumaha mono mee huogodoo ala i-nonua.

23:21  Gei tangada ma-ga-hagamodu gi-di Hale Daumaha, la-ne-hai dana hagamodudahi gi-di Hale Daumaha mo God dela e-noho i-no-lodo.

23:22  Gei tangada ma-ga-hagamodu gi-di langi, la-ne-hagamodu ang-gi di lohongo-king o God, mo Mee dela e-noho i-no-nua.

23:23  “E-huaidu adu gi goodou go digau haga-donudonu haganoho mono Pharisee! Goodou digau hai-hegau ngudu-golomada e-tigidaumaha ang-gi God dahi baahi e-madangaholu o godou goloo, haga-puni ang-gi nia mee-hai-suub, go nia ‘mint’, ‘dill’, mo ‘cumin’, gei goodou hagalee hagamadabouli e-hagalongo gi-nia agoago hagalabagau o-nia haganoho aanei: tonu, aloho, mo manawa-dahi. Aanei e-hai-loo gi-haga-kila-aga i-daha mo nia mee ala i-golo!

23:24  Nia dagi deegida go goodou! Goodou e-daa gi-daha di lamu dela i-lodo godou wai-inuinu, gei goodou e-holo di manu-‘camel’!

23:25  “E-huaidu-adu gi goodou go digau haga-donudonu haganoho mono Pharisee! Goodou digau hai-hegau ngudu-golomada! Goodou e-haga-madammaa di gili godou ibu mono pileedi, gei i-lodo e-honu i-nia goloo gaiaa, ge ne-hagagailaa ginai!

23:26  Goodou go nia Pharisee deegida! Tono-ina i-lodo i-mua, gei i-tua la-ga-madammaa!

23:27  “E-huaidu-adu gi goodou go digau haga-donudonu haganoho mono Pharisee! Goodou digau hai-hegau ngudu-golomada! Goodou e-hai be taalunga ne-tono ga-humalia dono gili, gei e-honu i-nia iwi-dangada-made mo nia hagadilinga bilau.

23:28  E-hai gadoo beenei, i-mua nia daangada goodou e-humalia, gei godou lodo e-honu haihai huaidu mo nia haga-magiaa.

23:29  “E-huaidu-adu gi goodou go digau haga-donudonu haganoho mono Pharisee! Goodou digau hai-hegau ngudu-golomada! Goodou e-hai nia daalunga o-nia soukohp gi-humalia, gei e-humu nia daalunga digau hai-hegau-donu.

23:30  Gei goodou e-helekai bolo maa goodou ne-mouli i-di madagoaa o godou maadua-mmaadua, gei goodou digi dau gi digau ala ne-daaligi nia soukohp.

23:31  Malaa, goodou guu-bida haga-modongoohia-aga, bolo goodou digau ni-di hagadili dela ne-daaligi nia soukohp.

23:32  Malaa, goodou dudagia di moomee o godou maadua-mmaadua ne-hai!

23:33  Goodou la nia gihaa ge nia dama ni digaula. Goodou e-mee di-llele gi-daha behee mo-di gowaa hagaduadua?

23:34  Goodou gi-iloo, bolo Au ga-hagau-adu agu soukohp, gau kabemee mono gau agoago. Hunu gau i digaula ga-daaligi go goodou, ga-daudau, ga-haga-mamaawa i-lodo nia synagogee, ge ga-waluwalu i-lodo nia waahale.

23:35  Di hagaduadua o-di haga-hali nia dodo o digau nadau ihala ai, la-gaa-dau-adu gi goodou, daamada mai Abel gaa-dae gi Zechariah, tama ni Berekiah, taane dela ne-daaligi go goodou i-mehanga di Hale Daumaha mo-di gowaa hai-tigidaumaha.

23:36  Au e-hagi-adu gi goodou di tonu bolo nia hagaduadua o-nia mee huaidu aanei huogodoo gaa-dau ang-gi nia daangada dolomeenei!

23:37  “Jerusalem, Jerusalem! Goe e-daaligi nia soukohp, ge e-dilidili digau kae-hegau a God ala ne-hagau-adu! Holongo e-hia Au nogo hiihai belee bulubulu-mai au daangada huogodoo, gadoo be teduu-ahina dela e-bulubulu ana dama gudugudu gi-lala ono bakau, gei goe digi dumaalia-mai.

23:38  Gei di Hale Daumaha la-ga-diiagi go ono daangada.

23:39  Au e-hagi-adu bolo daamada dangi-nei, goodou ga-de-gidee Au, gaa-dae-loo gi goodou ga-helekai boloo, ‘God gi-hagahumalia-ina a-Mee dela e-hanimoi i-di ingoo o Dimaadua.’ ”