Kapingamarangi - Proverbs - 27

27:1  Hudee hagaamuina i-nia mee o daiaa. Goe e-de-iloo be nia ma ni-aha ala ma-gaa-hai daiaa.

27:2  Hudee bida hagaamuina goe. Heia nia daangada ala i-golo mo digau ala e-de-iloo-ginaadou goe, gi-hagaamuina goe.

27:3  Taamaha o-nia hadu mo nia gelegele la-hagalee tau-loo gi-di haingadaa o tangada dadaulia ma-ga-haga-gila-aga.

27:4  Di hagawelewele le e-haga-mmaemmae, ge e-hiihai e-oho, gei di hagawelewele e-hagalee tau-loo gi-di dubua.

27:5  Koia e-humalia maa goe ga-haga-donu haga-madammaa nia hai-hala o tangada. Koia e-humalia i mee ma-ga-hagamaanadu bolo goe hagalee hila ang-gi deia.

27:6  Do ehoo e-humalia-hua, ma e-aha maa mee ga-hagahuaidu oo lodo. Gei do hagadaumee ma-ga-daabudi goe, pula i-di-goe!

27:7  Maa goe ga-maaluu, goe hagalee hiihai gi-nia meegai maangala, gei goe ma-ga-hiigai, nia meegai mmala e-kala be nia meegai maangala.

27:8  Tangada dela e-mogowaa i dono hale, le e-hai gadoo be-di manu dela e-mogowaa i dono waehongo.

27:9  Di lolo-kala mo nia ‘incense’ hagakala e-haga-manawa tenetene goe, malaa, nia haingadaa e-oho gi-daha di-noho o-di aumaalia o do hagabaubau.

27:10  Hudee haga-de-langahia-ina o ehoo be nia hoo o do damana. Maa goe gaa-tale gi-di haingadaa, hudee halahala-ina di hagamaamaa mai do duaahina. Tangada hoohoo-mai e-noho i doo baahi e-mee di-hagamaamaa goe laa-hongo di hagamaamaa o do duaahina dela e-mogowaa-loo.

27:11  Dagu dama-nei, heia goe gi-kabemee, gei au ga-tenetene. Agu helekai hagahonu i-golo, e-mee di-helekai-ai gi digau ala e-helekai hai-baahi mai gi-di-au.

27:12  Tangada hagabaubau ga-gidee nia haingadaa e-lloomoi, geia e-hagapaa gi-daha, gei tangada ono hagabaubau ai, e-haele haga-huudonu gi-nia maa, nomuli ga-tilikai-hua-laa.

27:13  Tangada dadaulia dela e-hagababa bolo ia gaa-hui-laa di boibana o tangada mai-i-daha, le e-humalia e-daa dana gowaa donu e-hai-ai di hui modongoohia.

27:14  Di hagaaloho o ehoo hagaluada dela e-hagalongoaa gi-nua, le e-hai gadoo be-di haga-huaidu halauwa digaula.

27:15  Di ahina hai-lodo wou leelee logo, le e-hai gadoo be nia mada-wai doodoo madaua i-di laangi uwauwa.

27:16  Dehee dau hai e-hai a-mee gii-noho dee-muu? Goe gu-hagamada e-hai di madangi gii-noho gi-hagalee gono, be goe gu-hagamada e-daahi doo lima honutulu oel?

27:17  Nia daangada e-kabe mai baahi nia daangada, gadoo be tulumanu e-olo dana hulumanu gii-gaa.

27:18  Benabena-ina di laagau-‘fig’, gei goe ga-miami nia huwa-‘fig’. Di hege dela e-benebene dono dagi aamua la-ga-hagalaamua.

27:19  Ma go o golomada donu ala e-gidee goe i-lodo di ada o-nia wai, gei di-maa go do mouli donu dela e-gidee goe i-lodo do hadu-manawa.

27:20  Nia hiihai o tangada le e-hai gadoo be tenua o digau mmade: I-nia madagoaa huogodoo ma e-hiihai gi-nia mee ala i-golo.

27:21  Di ahi e-haga-madammaa nia goolo mono silber. Nnangahaihai o tangada e-mee di-hagamodongoohia-aga labelaa.

27:22  Ma e-aha maa goe e-daaligi tangada dadaulia gi-hagalaumae, gei goe e-deemee di-daa dono dadaulia gi-daha mo mee.

27:23  Benabena-ina au siibi mo au kau hagahumalia gii-dau hai dela e-mee,

27:24  idimaa di maluagina hagalee noho-mau. Nia henua llauehe hogi hagalee noho-hua beelaa.

27:25  Goe gu-haala gi-daha nia geinga-tolo, mo nia geinga i-hongo nia gowaa nnoonua, gei di madagoaa hua deelaa, nia geinga-tolo nomuli e-tomo-aga labelaa.

27:26  Goe e-mee di-hai au gahu mai nia gili-siibi, goe e-mee di-hui dau gowaa gi-nia bahihadu mai di huihui o hunu kuudi i au kuudi.

27:27  Nia kuudi ala i-golo ga-haangai goe mo do madahaanau mo au hege-ahina gi-nia milugu.