Kapingamarangi - Isaiah - 3

3:1  Tagi go Yihowah di Gowaa Aamua ga-daa gi-daha nia mee huogodoo ala i Jerusalem mo Judah ala e-hagadagadagagee ginai nia daangada. Mee ga-daa gi-daha nadau meegai mo nadau wai,

3:2  nadau gau ala e-dau, gau-dauwa, gau hai-gabunga, soukohp, gau hagiaga mee, nadau gau aamua,

3:3  nadau dagi-dauwa, nia dagi o-nia daangada, nadau dagi oobidi, mo huogodoo ala e-hai-hegau gi-nia buubuu belee dagi nia mee ala e-kila-aga.

3:4  Dimaadua gaa-wanga nia dama-daane lligi gi-dagia nia daangada.

3:5  Nia daangada huogodoo ga-hagadau hai-hegau gi nadau madagoaa haingoohia e-kae nia hagahumalia digau ala gu-deemee. Nia damagiigi ga-hagalee hagalaamua digau mmaadua, gei nia balu-daangada ga-hagalee hagalaamua nadau dagi.

3:6  Dahi madagoaa e-dau-mai, gei dahi madahaanau ga-hilihili dahi dangada i nadau lodo, ga-helekai gi-mee boloo, “Kooe dela o goloo i-golo, goe gaa-dagi gidaadou i-lodo di madagoaa haingadaa dolomeenei.”

3:7  Gei mee ga-helekai, “Deeai, au e-deemee di-hagamaamaa goodou. Agu meegai ai, ogu goloo ai. Hudee dugu-mai gi-di-au gi-dagia goodou!”

3:8  Uaa, Jerusalem la-ga-mooho! Judah la-ga-meeheu gi-lala! Nadau helekai huogodoo mo nadau mee huogodoo ala e-hai le e-hai-baahi gi Dimaadua. Digaula e-helekai hagamadammaa e-hagahuaidu a God.

3:9  Nadau haga-maanadu hai-gee gaa-bida hagahuaidu ginaadou. Digaula e-hai-hala haga-madammaa be di hai o-nia daangada Sodom ne-hai. Digaula gaa-bida hagahuaidu ginaadou.

3:10  Digau ala e-mouli donu ga-tenetene, nia mee huogodoo gaa-kila humalia i nadau baahi. Digaula ga-tenetene gi-nia huwa o nadau ngalua.

3:11  Digau huaidu ga-mooho, nadau mee ala ne-hai gi-nia daangada ala i-golo, gaa-hai ang-gi ginaadou.

3:12  Digau hai ‘loan’ le e-haga-daamaha agu daangada, digau hai boibana e-halahalau digaula. Agu daangada nei, godou dagi e-dagi-gee goodou, ga-de-iloo di-godou ala dela belee hula-ai.

3:13  Dimaadua gu-hagatogomaalia e-hagiaga ana daangada.

3:14  Dimaadua ga-laha-mai digau mmaadua, mo nia dagi o ana daangada gi-di gowaa hai-gabunga. Mee ga-helekai hagiaga digaula, “Goodou gu-gaiaa nia hadagee waini, gei godou hale guu-honu nia mee digau hagaloale.

3:15  Godou donu ai bolo e-hagaduadua agu daangada, e-haga-hai-hegau digau hagaloale gi godou hiihai. Koau, go Tagi go Yihowah di Gowaa Aamua deenei e-helekai.”

3:16  Dimaadua ga-helekai, “Mmada gi-nia ahina Jerusalem ala e-hagapuu huoloo! Digaula e-heehee ge hila beelaa-nua nadau golomada, e-hagapuu i-nia madagoaa huogodoo, e-taele maalia loo, ge hagatangitangi nia hau o nadau wae.

3:17  Malaa, Au ga-hagaduadua digaula, gaa-dahi nadau libogo gi-ngaadihole.”

3:18  Di laangi ga-dau-mai, gei Dimaadua ga-daa gi-daha nia mee huogodoo ala e-hai nia ahina Jerusalem gi-hagapuu, aalaa go nia hau ala e-humu nadau wae, nadau libogo, nadau uwa,

3:19  mo nadau lima. Mee ga-daa gi-daha nadau gahu libogo,

3:20  nadau goobai, nia duu buubuu i-di gili nadau lima mo nadau huaidina,

3:21  nia buulei ala e-ulu i nadau madaalima mo nadau madauhi,

3:22  nadau gahu lloo humalia, gahu ahina, gahu laa-tua, nadau gada dugu bahihadu,

3:23  nadau gahu humalia, angkadi linen, mono gahu lloo e-gahu nadau libogo.

3:24  Digaula hagalee hagakala ginaadou, gaa-tongo. Digaula hagalee hai-hegau gi-nia duu madamada, gaa-nnoo nadau gahu-wae gi-nia loahi. Nia ngaahulu nadau libogo ga-mmoonono, ga-ngaadihole. Digaula ga-hagalee ulu i-nia gahu humalia, gaa-hai nia mee gahu balumee. Nadau madamada gaa-huli gaa-hai di haga-langaadia.

3:25  Nia daane o-di waahale, mo digau maaloo gaa-mmade i-lodo tauwa.

3:26  Digau ala i-di ngudu di abaaba di waahale ga-tangitangi, gei di waahale gaa-hai be-di ahina ma-gaa-noho i-hongo di gelegele, ono goloo ai.